Thursday, December 28, 2006

شتا


كل سنه وانتوا طيبين
الشاعر العظيم محمود درويش سؤل يوما
ما هو أول شيء ستفعله إذا أصبح للفلسطينين دوله
فقال
أزرع الحدائق للعشاق

عيدسعيد
وسنه سعيده ان شاء الله

Friday, December 15, 2006

أدباتي أراجوز نديم صاحبي وخلاني أو catch me if you can


عارفين
الرقم الصعب في معادله الكتابه هو المتلقي
والغلطه الكبيره اللي ممكن يقع فيها أي كاتب في الدنيا هي التفكير في المتلقي يا تري هيعجبه اللي انا كاتبه ده ولا لأ

يعني مثلا ان وانا بكتب دلوقتي حسيت ان اللي بكتبه ممكن ما يعجبش شويه من صحابي
وبعدين رحت قايل مش مهم لأنه هيعجب ناس تانيه
علي سبيل المثال الموضوع قبل اللي فات اللي نشرت فيه صورتي
ناس افتكرت اني حطيت صورتي منظره (مش فاهم علي ايه ) وناس تانيه فهمت الموضوع زي ما كنت عايز بالظبط
وهكذا
وحقيقه المتلقي أو التفكير فيه قد يسبب للكاتب إرباكا هو في غني عنه تماما
عارفين انا بقول الكلام ده ليه؟
لأني النهارده كنت عايز اكتب عن مواضيع كتيره وكل ما اجي اكتب موضوع اقول يمكن ما يعجبهمش
طيب وبعدين؟
نبتدي الكلام

انا هكتب وكأني بكلم نفسي وخلاص
عنوان هذا الموضوع زي ما حضرتكم شايفين بالعربي والانجليزي ربما يكون لهما علاقه ببعضهما البعض وقد لا يكون
أدباتي
أراجوز
نديم
صاحبي وخلاني
زجال مهرج مركب صوتي في لساني
و
catch me if you can
من اربع سنين تقريبا اتعرض فيلم فيلم ليوناردو دي كابريو الذي يحمل العنوان السابق كنا انا ورشا مراتي في شهر العسل وكان الفيلم ده تاني فيلم نشوفه مع بعض بعد الجواز بالمناسبه الفيلم الأول اللي شفناه كان (عصابات نيويورك ) بتاع ليوناردو دي كابريو برضه المهم لما خرجنا من السينما بعد ما شفنا الفيلم رشا قالتلي
عارف الفيلم ده بيفكرني بمين؟
قلتلها
عارف طبعا
بيفكرك بيا
علي فكره الفيلم ده من اجمل أفلام دي كابريو بس من أقلهم حظا ربما لأن الناس ما فهمتوش

ملحوظه (أرجوا ان تنتبهوا إني بكلم نفسي لسه ) شكرا
ما علينا
نرجع تاني لموضوعنا وهوكنت عايز تكتب ايه النهارده؟
كنت عايز اكتب عن اهميه اللي الأهلي عمله في اليابان وانعكاسه علي الشعب المصري وده (موضوع كبير جدا علي فكره ) وانا فخور بيه رغم كوني زملكاوي متعصب
وكنت عايز أكتب عن النقشبندي اللي بيغني دلوقتي (أقول أمتي يارب أمتي ) اللي بترجعني لأيام ثانوي لما كنت انزل اصلي الفجر
وعايز اكتب عن بطوط هذا الأسطوره (يجسدها أسطوره ) الذي لم أقترب من الكتابه عنه حتي الان رغم انه جدير بالتوقف امامه طويلا
وكتير من الأفكار والمواضيع اللي ما بتخلصش ولو عديتهالكم مش هنخلص
طيب نخليها لمره تانيه
وخلينا في بطوط المره دي
كما أسلفت القول في احد موضوعاتي السابقه كان بطوط هو بطل طفولتي بامتياز أحببت هذا الكائن الأسطوري بشده إلي درجه انني كنت احلم به أحيانا وانتبهت أمي إلي ذلك لدرجه انها حينما كانت تريدني ان ألتزم بالصلاه كانت تقول لي يا عمر إذا صليت هتدخل الجنه وتقابل بطوط
وحيث ان العرض كان مغري جدا كنت بصلي طبعا علي أمل لقاء بطوط في الجنه
لغايه ما كبرت شويه وحد ابن حلال صدمني وقاللي ان ما فيش حاجه اسمها بطوط
يعني مش هقابله
وكانت هذه صدمه ما بعدها صدمه
من حوالي كام سنه قريت موضوع بيقول ان بطوط هو الشخصيه الأكثر شعبيه في التاريخ
وبكل تأكيد هو جدير بكل هذه الشعبيه
لماذا؟
اولا هو شخصيه ليست قيميه علي الإطلاق الناس وخصوصا الأطفال تكره الشخصيات القيميه التي تبدو حريصه علي طرح قيم بعينها من نوعيه الاجتهاد والجد والشجاعه إلخ ولذلك لم تحقق شخصيه ميكي نجاحا يذكر مقارنه بشخصيه بطوط المنحوس الكسول خفيف الظل الفاشل دائما والذي لا يكف أبدا عن المحاوله رغم ما يلاقيه دائما من سوء حظ
بشكل شخصي جدا اشعر ان هذا الكائن الكارتوني الأسطوري لعب دورا كبيرا في حياه الملايين من البشر وأنا منهم طبعا
بالمناسبه مش والت ديزني هو مبتكر شخصيه بطوط
اللي ابتكر شخصيه بطوط حد غير والت ديزني انا مش فاكر اسمه دلوقتي
لكن بكل أسف النجاح في ابتكار هذه الشخصيه نسب ل والت ديزني
ويالها من مفارقه
الشخص الذي ابتكر بطوط أهم شخصيه كارتونيه في التاريخ لا يذكر احد إسمه
منحوس
بالظبط زي الشخصيه اللي ابتكرها
و والت ديزني الذي ابتكر شخصيه ميكي ماوس هذا الفأر الماسخ
نسب إليه الفضل في ابتكار بطوط
لكن المدهش
أن مبتكر بطوط مات مكتئبا
لأن بطوط نسب لشخص أخر هو والت ديزني
و والت ديزني
مات مكتئبا أيضا
لأن شعبيه بطوط الذي لم يبتكره
تفوق علي ميكي

Sunday, December 10, 2006

بشاير النصر



مبروك لعمال غزل المحله نصرهم التاريخي
أظن أن الصور أعلاه تشرح لنا جميعا كيف تحقق هذا النصر

Saturday, December 09, 2006

أكبر تدوينه في التاريخ


هي عيشه ولا موته ولا فوته في حاره سد

Sunday, December 03, 2006

ديسمبر وبس

بالذات ديسمبر
الحداشر شهر التانيين بتحس انهم شهور وخلاص أو علي الأقل انا بحس كده بس حقيقه مش لوحدي لأني قابلت ناس كتير زي حالاتي بتحس بحاله مختلفه بينها وبين ديسمبر
طيب ليه؟
يمكن عشان ديسمبر هو البدايه الحقيقيه للشتا؟
جايز
أو عشان اتولدت فيه؟
جايز برضه
أو عشان بنحس اننا بنودع سنه وبنستعد لسنه جديده ؟
جايز جدا خصوصا اننا بنعشق حاله الوداع (كله في المواني يا ابا ) وبنميل للشجن بالفطره
بس اللي القلم عايز يكتبه دلوقتي عن ديسمبر مش كتير قوي
عايز يكتب باختصار
عايز يكتب عن تلاتين نوفمبر بالليل وانت بتقلب النتيجه وبتلاقي بعدها واحد ديسمبر
وعن اربعه ديسمبر عيد ميلادك
وعن 13 ديسمبر 96
وعن 16 ديسمبر 2005 عيد ميلاد نور
وعن مشيك لوحدك في الشوارع لحد الفجر في عز البرد والمطره أييييه (حنيت لحياه العزوبيه) علي رأي ريكو




وعن أول طفل مسك حجر من ع الأرض ورماه علي جنود الاحتلال سنه 87
في شهر ديسمبر

Friday, November 24, 2006

و اسمع إسمع يا رضا

مره من ذات المرات واحد صاحبي سألني قاللي يا عمر: تفتكر أيه أهم منجز أو اختراع في تاريخ البشريه؟
وحيث أن انا مواطن كلاسيكي جدا كانت إجابتي الواضحه والتي مازلت مقتنع بها حتي الأن هي الراديو الراديو هو أهم منجز في تاريخ البشريه
المهم بعيدا عن وصله الردح والسباب التي تلقيتها من صديقي العزيز والذي أضطرني أن أعايره بنوع الفاكههه الذي يفضله (الجوافه ) ؟ تخيلوا في بني أدم في الدنيا فاكهته المفضله الجوافه؟
بعيدا عن ذلك كما أسلفت فما زال الراديو في نظري هو أهم منجز في تاريخ البشريه
كان الراديو ومازال هو رفيقي الدائم في كافه التفاصيل هو كائن مخلص لأقصي حد ورفيق غير مرهق علي الإطلاق ولا يحتل من جيبك أكتر من الوزن والحجم الذي تحتله علبه السجائر
إكتشافي لأهميه هذا الاختراع العظيم بدأ وأنا في العاشره من عمري في يوم مطره بالليل كنت قاعد اقرا مغامره من مغامرات بطل طفولتي الأثير (بطوط طبعا ) وكل شويه اقعد ابص من الشباك علي المطره وهي نازله علي أرضيه سطح البيت كنا وقتها ساكنين فوق السطوح وكانت هوايتي اني اقعد اتفرج علي السما والسحاب والمطره وممكن كنت اقعد ساعات ما بعملش حاجه غير اني ابحلق في السما من غير ما انطق ولا كلمه وكان الموضوع ده بيلفت انتباه بابا وماما دايما هذا التأمل الدائم في ملكوت الله ساب أثر ممتد جوايا لغايه النهارده وتوج في المرحله الجامعيه باللقب الذي أطلقه علي بعض الأصدقاء
لقب (سرحان عبد البصير ) طبعا
المهم وانا قاعد اقرا بطوط النور قطع وقفلت الكتاب ولقيت الراديو جنبي رحت مشغله
ويا اللللللللللللللللللله
فيروز بتغني والصوت جاي بالعافيه من إذاعه بعيده وقاعد بيروح وييجي (علي فكره انا منفعل جدا وانا بكتب دلوقتي لأني ابتديت احس بالموقف وكأني في لحظتها بالظبط ) وكأن صوتها جاي من عالم أخر وانا ببص من الشباك علي المطره وهي نازله علي السطح إخواتي نايمين كلمهم وواقف ع الشباك لوحدي وصوت فيروز بيوديك لعوالم سحريه تتداخل مع العوالم التي تركك فيها بطوط قبلها بقليل
ومن لحظتها رحت وما رجعتش
أصبح الراديو وصوت فيروز رفيقي الدرب الذين لا غني عنهما أبدا
السر في أسطوره هذا الكائن تنبع من أنه صوت صوت فقط بلا صوره الصوره بتقتل الخيال في معظم الأحيان وده مثلا سبب عدائي للتليفزيون أو للكليبات أنا ما اعرفش اشوف أغنيه لأن الأغنيه ببساطه اتعملت عشان تتسمع مش عشان تتشاف
وهكذا أدمنت منذ الطفوله الاستماع إلي هذا الجهاز قبل ما اروح المدرسه أشغل الراديو واسمع صلاه الفجر كانوا وقتها دايما بيذيعوا من الحسين بصوت شيخ عبقري بكل أسف فاتني أن أتذكر اسمه وبعدها أسمع يا صباح الخير ياللي معانا علي إذاعه الشرق الأوسط وكمان فاكر كويس أغنيه غريبه جدا وما بقيتش اسمعها لما كبرت أغنيه بتغنيها مجموعه مش مطرب كانت بتقول (حليوه حليوه والله ) ومش عارف مين اللي بيغنيها ولا أي حاجه عنها بس كنت بحبها قوي
أعذروني علي ضعف الذاكره دي حاجات فات عليها 20 سنه
أرجع من المدرسه أذاكر علي صوت الراديو وكانت إذاعتي المفضله في مرحله ابتدائي هي الشرق الأوسط إذاعه خفيفه وإيقاعها سريع وفاكر من برامجها كتير فكر برنامج الأطفال (فانتستيكا ) وبرنامج (تحت العشرين ) وبرنامج (علشانك يا مصر) وغيرها كتير أظرف حاجه في الإذاعه دي إنها كل 10 دقايق بتذيع أغنيه
وافضل كده طول اليوم مشغل الراديو لغايه ما انام اقعد اقلب بين الإذاعات ادور علي أغنيه حلوه وخصوصا أغاني فيروز بالمناسبه أنا كانت (أيدي مبروكه )في موضوع أغاني فيروز كنت أول ما اشغل الراديو لازم وحتما تيجي أغنيه لفيروز ومراتي شاهده علي كده لغايه النهارده ويمكن في واقعه شديده الغرابه يشهد عليها محمد خير صاحبي
من 6 سنين كنا أنا وخير وخالد سعد (فاكرينه ؟) مسافرين العريش وخدنا معانا طبعا شرايط فيروز عشان نسمعها هناك المهم واحنا بنركب البيجو اللي هيودينا العريش قلنا للسواق :والنبي يا اسطي شغلنا شريط من الشرايط دي نسمعه والسواق قالنا والله يا جماعه الكاسيت بايظ ما فيش غير الراديو عندي
وشغل الراديو فعلا
وسبحان الله الراديو لمده 3 ساعات ما بيذيعش غير أغاني لفيروز

لكن اكتر لحظات استمتاعي بالراديو كانت مساء لما اجي انام خصوصا في الشتا أتغطي واشغل الراديو واعيش مع الأصوات اللي جايه بتقتحمني من اماكن مجهوله وتحدفني في أماكن مجهوله برضه في غابات وجبال وتلال وجزر ومطره وسحاب وكهف وشلال وكوخ ودفايه في غابه ضلمه
من أكبر النعم اللي انعمت بيها الطبيعه علي الإنسان هي نعمه الخيال
وهو ده سر الراديو
وسحره

Sunday, November 19, 2006

مسرحيه هاله حبيبتي

يا جماعه أرجو من الجميع قراءه الحوار الذي أجرته جريده المصري اليوم في عدد اليوم الأحد 19 نوفمبر مع الشخصيه اللامعه في لجنه السياسات الدكتوره هاله مصطفي
الدكتوره اللامعه اللي صدعت دماغ اللي خلفونا طول السنه اللي فاتت برؤاها الإصلاحيه صرحت عيانا بيانا أنه لابيوجد أي بديل في مصر سوي جمال مبارك
الحوار فضيحه فضيحهههههههههههههههه بكل ما تحمله الكلمه من معاني
إدخلوا اقروه

Tuesday, November 14, 2006

يا اللي فتحت البتاع فتحك علي مقفول

لأن الجهل يكون أحيانا هو سيد الأخلاق فمن الطبيعي جدا ان يتحدث هؤلاء البلهاء عن العبور للمستقبل
بس الحقيقه هما بينسوا حاجات كتير مهمه وأساسيه ولازمه لمن يريد العبور إلي المستقبل
الدوله التي تريد العبور للمستقبل يا ساده يا افاضل تستعين بالعلماء ولا تستعين بالبلطجيه
الدوله التي تريد العبور للمستقبل تسود فيها قيم الحق والاجتهاد والعداله وليست قيم الواسطه والفهلوه والرشوه
دونا عن شعوب الأرض جميعا يتميز المصريين بقيمه فريده من نوعها وهي قيمه (الفهلوه ) المصري هو الكائن الوحيد علي سطح الأرض الذي يمتلك قدره فريده علي الفتوي في أي قضيه أو أي موضوع حتي ولو كان هذا الموضوع في الفيزياء النوويه مثلا ولأن قيمه الفهلوه هي القيمه السائده في هذا المجتمع فمن الطبيعي جدا أن يتصور القائمون علي الأمور في البلاد انهم بإمكانهم البقاء للأبد في مناصبهم بل وتوريث أبنائهم من بعدهم أيضا
لكنهم بالطبع يتناسون (عن جهل غالبا ) أن الفهلوه قد تمكن طالب فاشل من النجاح بمجموع خمسين في الميه لكنها أبدا لن تجعله الأول علي الجمهوريه
وهذا هو ملخص ما يحدث في مصر
بشكل او بأخر تمكن نظام حسني مبارك من الاستمرار لمده خمسه وعشرين عاما رغم أنه لم يقدم أي شيئ يذكر لمصر
وقد يتمكن من البقاء لعام او أثنين أو ثلاثه علي اكثر تقديرلكن ليس أبعد من ذلك أبدا
نظام مبارك أو ولده باختصار لا يمتلك الأدوات التي تمكنه من البقاء أو التوريث
فكل ما يمتلكه هذا النظام هو جهازه الأمني
وهذا الجهاز لن يبني له مصنع
ولن يحل له ازمه بطاله
أو ازمه تعليم متدني المستوي لا ينتج عنه الا أنصاف متعلمين
الرهان علي قدرات الجهاز الامني في تمرير مشروع التوريث هو رهان خاسر تماما يا ساده
ومن يتصور ان امريكا ستدعم وجود جمال مبارك في السلطه هو واهم أيضا
امريكا طبعا تبحث عن من يخدم مصالحها الاستراتيجيه في المنطقه
وأكيد مش جمال مبارك هو اللي هيحدم مصالح امريكا في الممنطقه
مش لأن حضرته صاحب موقف لا سمح الله
ولكن لأن مصر وزنها في المنطقه بقي صفر ولله الحمد
دوله زي لبنان مع كل تقديرنا العظيم ليها طبعا عدد سكانها ما يزيدش عن سكان شبرا وزنها الاستراتيجي اكبر مننا بمراحل
يا ولاد مصر داخله علي أيام سودا مالم تحدث معجزه
وإذا كان البعض يتحدث عن عام ألفين وسبعه باعتباره عام التوريث
أنا شايف حاجه تانيه خالص
أنا شايفه عام الكوابيس
وربنا يستر علي مصر

Wednesday, November 01, 2006

إبنك يا دنيا وإمتي هتصادفيه

هي بتيجي كده والله
كل ما اجي اكتب موضوع ألاقي العنوان فرض نفسه وما بقاش قاصد ابدا انه يكون متاخد من قصيده من شعراءنا الكبار
بس هعمل ايه يعني
خبره الأبوه هي من أجمل الخبرات اللي مريت بها في حياتي رغم كل ما تحمله من تناقضات
نور ابني اتولد يوم 16 ديسمبر اللي فات يعني من مواليد برج القوس
وتاريخ ميلادي هو 4 ديسمبر 1974 يعني برج القوس برضه
صدفه جميله
الصدفه الأجمل ان انا قضيت 17 سنه من عمري في شارع مصر والسودان 75 شارع مصر والسودان هو عنوان البيت اللي اتولدت فيه
البيت ده اتهد سنه 1992 وطلعت مكانه عماره كبيره اتعمل الدور الأول منها مستشفي
اتولد فيها نور
يوم ما نور اتولد أخدت الورقه اللي المستشفي اديتهالي ومكتوب فيها محل الميلاد 75 شارع مصر والسودان ووريتها لأمي
والله العظيم عينها دمعت
بدايه التناقضات أو الخبرات المتناقضه حقيقه ابتدت بعد تالت يوم من ميلاده جاتله الصفرا والدكتور نصحنا اننا نوديه المستشفي ونحطه في الحضانه هناك المهم خدت الولد وطلعت بيه علي هناك عشان احجزله فلما دخلت قالولي (ما ينفعش يا افندم لازم ابوه هوه اللي يحجزله بنفسه ) ابتدينا
أااه نسيت اقول لكم انا شكلي صغير جدا وساعات ناس كتير تتصور ان انا عندي 20 سنه ولو حد حب يجاملني بيقول مثلا 26 أو 25 وده مسأله سايبه أثر كبير جوايا
من كتر ما الناس بتقوللك شكلك صغير بقيت حاسس انك صغير فعلا
بقيت حاسس انه لسه بدري مع انه ما لساش ولا حاجه
بقيت أب بمشاعر وأداء شاب صغير عنده 20 سنه
بتظبط نفسك بتفكر في مستقبلك
وبعدين تظبط نفسك بتفكر في مستقبل ابنك
بتحن لحريه ما قبل الزواج
وما تستحملش انه يغيب عنك يومين
بتتمني له تجربه مختلفه عن تجربتك
وبتتبسط جدا لما الناس تقول انه شبهك في كل حاجه
مستني اليوم اللي تشوفه فيه بيقرا كتاب او ماشي في مظاهره
وانت بتلعن اليوم اللي اتحدفت فيه ع السكك دي
والا أيه والا أيه والا أيه
تناقضات كتيره بس الحقيقه انا ساعات بحس اني بكتشف نفسي معاه
أوقا ت بحس بالخوف لإني خلفته في الظروف دي
بس عمري ما حسيت بالندم
بالعكس
ساعات كتير والله العظيم بحس اني حققت نصر ما
ومش قادر افسر الموضوع ده أبدا

Monday, October 23, 2006

أنا قلبي كوره والفراوده أكم

امن أكبر الأخطاء اللي ممكن يقع فيها أي كاتب أو مدون هو تأجيل الكتابه عن فكره تحمس لها في وقت من
مشاعرنا تجاه الحاجات بتتغير والكلام اللي ممكن تقوله عن حاجه بتحبها أو بتكرها ممكن يتغير هو كمان
مشاعرنا بتغير مش بالضروره إلي النقيض بالعكس المشكله انها ممكن تتحول إلي لا شيئ إلي لا مشاعر
المره دي كنت عايز اكتب عن الكوره أو عن حاجات في الكوره أو عن لعيبه كوره كنت بحبهم ومش قادر
القلم مش راضي ينطق
بس هحاول
علاقتي بالكوره ابتدت سنه 80 أو 81 مش فاكر بالظبط كان المشهد هو هوهدف حسن شحاته في مرمي الأهلي (أشهر هدف ملغي في تاريخ الكره المصريه ) بابا الله يرحمه كان زملكاوي ولما حسن شحاته جاب الجون اللي المفروض هياخدوا بيه الدوري طار من علي الكرسي مش مصدق نفسه ولما اتلغي الهدف بادعاء إنه تسلل والدي اكتئب
الجون ما كانش تسلل طبعا وما ينفعش يكون تسلل مصر كلها عارفه ده لغايه النهارده ومازال هذا الهدف يضرب به المثل في انحياز الحكام
ومن لحظتها بقيت زملكاوي (كنت أهلاوي قبلها وده سر بقوله لأول مره ) بقيت زملكاوي بمبدأ الانحياز للمظلوم
ومن ساعتها بقيت زملكاوي متعصب وابتديت اروح الاستاد بانتظام
أول ماتش رحته كان الزمالك والأوليمبي في الموسم اللي المقاولين أخد فيه الدوري سنه 83 تقريبا رحت تحديدا عشان اشوف حسن شحاته
والحمد لله كان احتياطي ومصاب وما كانش هيلعب الماتش
لكن تشاء إراده ربنا ان الزمالك طوال 85 مش عارف يجيب جون ولو ما كسبناش يبقي الدوري ضاع وينزل حسن شحاته في أخر 5 دقايق علي أمل انه يعمل حاجه خصوصا ان علي خليل وعبد الرحيم محمد مالعبوش هما كمان ودولا كانوا أهم 2 في الفرقه وقتها (غريبه اني لسه فاكر التفاصيل دي )
وينزل حسن شحاته بالفعل وبعدها بدقيقه بالظبط يستلم كوره ويخش بيها منطقه الجزاء ويجيب ضربه جزاء ونكسب الماتش
بالمناسبه الأسبوع ده في وقتها كان اسمه اسبوع ضربات الجزاء ماتش الزمالك والوليمبي كان يوم خميس والزمالك كسب بضربه جزاء
وتاني يوم كانالأهلي بيلاعب الاتحاد في اسكندريه واتحسبت ضربه جزاء للاتحاد صدها ثابت البطل
ويوم التلات كان الأهلي بيلاعب الهلال السوداني في بطوله أفريقيا في استاد القاهره وبرضه ثابت البطل صد ضربه جزاء
(غريب جدا اني لسه فاكر برضه )
بالمناسبه قبل ما انسي أول مره رحت فيها الاستاد كنت باتفرج علي الناس أكتر ما بتابع الماتش ومن الحاجات اللي فاكرها كويس جدا ان كان فيه تمثال لجمال عبد الناصر عند مدخل الدرجه التالته واتشال بعد كده ماتفهمش ليه
حسن شحاته كان هو نجمي المفضل وكنت أراه أفضل لاعب في تاريخ الكره المصريه لكن لسوء حظه أنه أتي في زمن الخطيب الذي يمتلك كاريزماوقبول جماهيري وإعلامي وذكاء إداري طبعا أكبربكثير مما توفر لدي شحاته كلاهما موهوب لا شك لكن في رأيي المتواضع موهبه حسن شحاته كانت من منطقه أجمل وأرقي من موهبه الخطيب
حسن شحاته كان فرقه لوحده وتتفرج عليه في كل تفصيله بيعملها في الملعب
الخطيب كان لعيب اللمسه الواحده المبهره (الشيك ) سواء في التهديف أو المراوغه مش ابعد من كده
عموما بقيت مشجع زملكاوي متعصب طول التمانينات ولغايه نص التسعينات ورحت الاستاد أكتر من 100 مره كنت مشجعا محترفا وأول مباراه رحتها لوحدي كانت بين الزمالك والمصري وكان عندي 11 سنه (صياعه بعيد عنكوا ) وكسبنا 2/1
دايما كنت يشوف ان انحيازي للزمالك متسق تماما مع شخصيتي الوقت اللي شجعت فيه الزمالك كان بالفعل هوأرقي فريق في مصر طوال الثمانينيات كان الزمالك بيقدم كوره رائعه فعلا الأهلي كان نادي بيكسب ذوق عافيه هيكسب يعني هيكسب (سيكولوجيه بطل ) عارف كويس انه هيفوز في النهايه ساعات بيعمل ده بدون مجهود وساعات بمجهود طبعا لكن كوره الأهلي أخر حاجه ممكن نتكلم عنها هي جماليتها ممكن نتكلم عن إراده الفوز عند الأهلي مثلا ودي حقيقه بالمناسبه وعشان كده أوقات كتير كان الأهلي بيكسب الماتشات في أخر ثواني (وساعات بيكسب بعد ما الماتش يخلص) حتي في واقعه شهيره جدا لما النور قطع عندي في البيت في أخر دقيقه من ماتش الأهلي والمصري سنه 84 وكان المصري كسبا 1/0 المهم رجع النور بعدها بشويه لقيتهم جايبين إعاده الأهداف والأهلي كسبان 3/1 (بالمناسبه بورسعيد يومها حصلت فيها ما يشبه انتفاضه وكانت عايزه تستقل عن مصر ) أيامها كنت بشوف زي معظم الزملكاويه ان الأهلي نادي محظوظ بدليل انه بيكسب في أخر ثانيه لكن النهارده شايفها بشكل مختلف
شايفها إراده نصر قبل أي حاجه
وعشان كده بقيت زملكاوي
لأنه بيلعب كوره أولا (وقتها طبعا ) و عشان مش هو البطل
هو اللي بعد البطل
هو نمره 2
ونمره 2 يكسب
ودي حدوته تانيه وكبيره قوي
إنتظروها قريبا

Wednesday, October 18, 2006

إنجو سعد فقد هلك خالد سعد

مش نافع الكلام ده أبدا
كل ما اقول فيه أمل أرجع تاني وأقول ما فيش فايده وده طبعا بسبب اللي بشوفه واسمعه في الشارع
النهارده يا عم كنت راكب المترو وماسك في إيدي كالعاده جرنان من بتوع المعارضه وكان من ضمن الموضعات الرئيسيه في الصفحه الاولي موضوع بعنوان (أنباء عن قرب عوده ممدوح اسماعيل صاحب عباره الموت ) ماشي
المهم ألاقيلك اتنين واقفين جنبي عينهم في الجرنان اللي في أيدي وواحد منهم بيقول للتاني : إلحق يا عم بقي اسمها عباره الموت عشان مات فيها كام واحد
والله العظيم الكلام ده حصل نصا
تخيلوا
بالذمه ده يتسمي أيه ؟
واضح تماما ان ما فيش غير الحل الفردي للي يلاقي حل فردي طبعا
إهرب يا زكي قدره هو شعار المرحله
وتولع

Friday, September 29, 2006

عوده الباسبور الضال

سنه 1997 كان مخيم ااشباب العربي هيتعمل في مصر وكان المفروض أشارك فيه لكن والدي الله يرحمه مات قبلها بيومين وما شاركتش
وفي 98 اتعمل المخيم في السودان وقلت يعني أول مره أسافر فيها بره البلد تبقي السودان مش مسافر
في 99 اتعمل في العراق وانا شخصيا بحب العراق جدا وقلت يا اما انت كريم يا رب هسافر العراق ببلاش لكن جات الضربه من حيث لا أحتسب لأن الكليه رفضت تسمحلي بالسفر باعتبار اني بقيت في سنه رابعه وعلي ذمه الجيش
سنه2000بقي قلت ما فيش حجه الجيش خدت منه إعغي واتخرجت وما فيش ورايا ولا شغله ولا مشغله هسافر يعني هسافر وكان المخيم في المغرب يقوم يحصل أيه؟
يقرروا ان المره دي اللي عايز يسافر يسافر علي حسابه طاب ليه يا جدعان إشمعني المره دي قاللك هوكده وحيث أنني خريج جديد في وقتها ومفلس طبعا قلت خلينا قاعدين في بلدنا بكرامتنا
ولكن لأن ربك بيقطع من هنا ويوصل من هنا جاللي في نفس التوقيت سفريه للبنان إحتفالا بتحرير الجنوب اللبناني وقالوا أن فيه 100 واحدهيسافروا لمده أسبوع مجانا علي حساب الحكومه اللبنانيه للمشاركه في احتفالات تحرير الجنوب
والحمد لله كان اللي مقدمين للسفر 101
أكيد عرفتوا مين أبو حظ دكر اللي ما سافرش
وفي سنه 2001 كان المخيم في الجزاير واتلغي بسبب الحرب الأهليه
وفي 2002 خلاص ما بقاش من حقي أشارك في مخيمات الشباب لأن سني تجاوز السن المسموح به للمشاركهوانتهت إلي الأبد فرصه مشاركتي في مخيمات الشباب
وراحت الأيام وجات ايام و فجأه أفتح الإيميل بتاعي السنه اللي فاتت ألاقي دعوه جاياللي من ألمانيا للمشاركه في معرض فرانكفورت للكتاب أكتوبر 2005 وقلت فرجت يا ابو (النديم) ووبعتتلهم كل الأوراق المطلوبه المهم راح صاحب المكتبه قايللي بقوللك ايه انت مش ممكن تسألهم إذا كان ممكن أحضر معاك انا كمان يعني ممكن يستضيفونا إحنا الاتنين ؟ قلتله والله هسألهملك ونشوف
وكانت المفاجأه إنهم رحبوا بشده وقالولي خليه يبعت ورقه هوكمان
بس يا عم بعدها بشهر لقيناهم باعتين لنا إيميل بيعتذروا فيه عن عدم قدرتهم علي استضافه شخصين من مؤسسه واحده وإنهم قرروا الاكتفاء بضيف واحد فقط عبد الرحمن صاحب المكتبه
نهايته مسكت الباسبور ورميته من الشباك وقلت أبقي اعمل بدل فاقد لأن شكل أمه باسبور نحس ولكن
رجعلي تاني النهارده

Tuesday, September 26, 2006

المطار السري

يا عالم يا ظلمه المدونه ده إسمها النديم الندييييييييييييييييييييييييييم سامعين ما اهو مش معقول أبدا كل ما واحد يبعتلي تعليق يكتبلي فيه حبيبي عمر صاحبي عمر أخويا عمر ده حتي وانا ماشي جنب القهوه في وسط البلد لقيت اتنين صحابي بيقولوا لبعض ان هم شافوا مدونه عمر
منكم لله فكرتوني بنكته المطار السري

Wednesday, September 20, 2006

إحنا وراك من غير فلوس

السنه الي فاتت يوم 25 مايو كان معاد الاستفتاء علي تعديل الماده 76 الشهيره طبعا كان الهدف من تعديلها واضح وهو فتح السكه أمام الزعيم اللي ماجابيتوش ولاده جمال مبارك لتولي الحكم في مصر المهم قررنا في كفايه يوميها ان احنا نطلع بمظاهره ضد اللي بيحصل وفعلا اتجمعنا حوالي 500 واحد وابتدت الناس تهتف ضد مبارك وضد ابنه و يا بني ما فيش 5 دقايق إلا ونبص نلاقي مظاهره ضخمه فيها بتاع 3000 واحد جايين من بعيد ورافعين صور حسني مبارك وعلي نغمه واحده يا مبارك دوس دوس إحنا وراك من غير فلوس ولأننا كنا سذج قال إيه وقفنا عشان نواجههم بالهتافات وطبعا إنتم عارفين اللي حصل هجموا علينا وهاتك ياضر ب وتقطيع في هدومنا وانتوا عارفين الي حصل للبنات يوميها كل بنت خدت نصيبها من الحاجات الي قلبك يحبها
وبعديها بكام يوم عملنا مظاهره تانيه وقبل ما نوصل مكان المظاهره كان بتاع 1000 واحد احتلوا المكان ورفعوا صور الحرامي الكبير وابنه وهات يا هتاف يا مبارك دوس دوس إحنا وراك من غير فلوس
عموما فات سنه واكتر علي هذه الأحداث وواضح تماما أن الهتاف أصبح حقيقه وكلنا بقينا مفلسين ولله الحمد ونفسي أقابل العبقري إللي ابتكر هذا الهتاف لأنه واضح ان عنده بلوره مسحوره بيشوف بيها المستقبل
أما الكومبارس اللي الحزب الوطني أجرهم ب20 جنيه عشان ينزلو يهتفوا للريس وال كام مليون كومبارس إلي راحوا إدوا صوتهم لحسني مبارك في الانتخابات ف مش هقوللهم غير كلمه واحده إشربوه وربنا يكتر من العبارات الغرقانه والقطارات اللي بتولع عشان تنبسطوا كمان وكمان
المهم يا أصدقائي الأعزاء أنا بكتب الكلام الفاضي اللي انا بكتبه ده لأني النهارده أسعدني الحظ بمشاهده فلته عصره وأوانه السيد جمال مبارك و هو بيتكلم في مؤتمر الحزب الوطني وبعد ماسمعته شويه قلت يا ليله طين هوده اللي هيحكم البلد طاب أيه العمل ما اهوأكيد ال70 مليون كومبارس مافيهمش حد هيتحرك ومش هيتحرك غير 500 أو 600 واحد من كفايه والإخوان والباقي شكرا مش بعيد تلاقيهم طالعين يهتفولوا يا جمال دوس دوس إحنا معاك إلخ والله العظيم مش بعيد تلاقي ناس طالعهتقول أن جمال مبارك هوبطل نصر اكتوبر

خلاصه الكلام أنا عايزكم تساعدوني في حل مشكلتي العويصه وهي أن أنا إستحملت أقضي نص عمري تحت حكم الزغلول الكبير ومش هسمح إن اللي فاضل من عمري يضيع مع إبنه ماذا تفعل لوكنت مكاني ياريت تلحقوني قبل ما أتجنن

Friday, September 15, 2006

صباح الخير أو مساء الخير ما علينا الرساله المهمه اللي عايز اوصلها لأي حد بيقرا هذه المدونه أن انا بكتب وخلاص لا انا عايز ابقي مدون مشهور ولا فارق معايا حد ولا فارق معايا حاجه من الآخر أنا بلعب لأن واضح أنه مش هينفع مع أم الدنيا غير اننا نلعب معاها زي ما بتلعب معانا وانا قررت اخدها لعبه لعبه حتي النهايه
كل مشكلتي ان انا شخص قليل الكلامويمكن ما بيحبش الكلام أصلا بس بما أنها لعبه طاب ما اتكلم هوحد ليه عندي حاجه
ممكن اتكلم عن الحاجات اللي بحبها صحبح هي مسأله مكرره بس طظ
أنا بحب فيروز
وبحب الست الي بتعرف تتكلم وده نادر جدا
وبحب الكرامه لأنها كل حاجه
وبحب قنا لأنها وطني الحققي
وبحب شارع مصر والسودان إتربيت فيه وطفولتي كانت فيه وأول حب كان هناك وأول مظاهره كانت هناك أول خناقه أول تحدي اول إحساس بمعني الكرامه لما أنا واخواتي ضربنا إبن مساعدوزير الداخليه وقلنا اللي يحصل يحصل واول اغنيه لفيروز سمعتها هناك
وبحب اسماعيل يس لأنه الفنان الي بجد اللي جابته البلد دي
بحب ولاد البلد واللي بقوا عمله نادره دلوقتي
بحب المزيكا قوي بس ياخساره اتأخرت
وبحب الاسماعيلي
وبحب العود ونفسي يحبني بقي

Thursday, September 14, 2006

تسالي

يا مسهل يا رب استعنا علي الشقا باله بناء علي رغبه الجمهور وأصدقائي اللي كل ما اقعد مع حد فيهم يقوللي انت ازاي ما عندكش مدونه لغايه دلوقتي ومهما حاولت اقنع فيهم اني مابحبش اتكلم أصلا ولا بحب الرغي واللت والعجن يقولولي لازم تعمل مدونه حاضر يا بشر أديني عملت مدونه وذنبكم عي جنبكم وانتم مسؤولين عن اللي هيحصل