وقهوه أمي مره أخري

رغم قناعتي الشديده ببيت الشعر (كم منزل في الأرض يألفه الفتي وحنينه أبدا لأول منزل ) إلا أن (ثاني منزل ) له عندي مكانه كبري أيضا تقترب كثيرا من مكانه بيتنا الاول في حدايق القبه

المطريه كانت وجهتنا بعد ما سيبنا الحدايق سنه 91
الإنسان ده كائن غريب جدا إوعي تصدق انك فاهم نفسك ابدا إحنا بنكتشف نفسنا واحنا ما شيين في السكه وتفضل كده حضرتك تكتشف وتستكشف لغايه ما تموت بعد عمر طويل ان شاء الله

أول يوم قضيته في شقه المطريه وكنت لوحدي قبل ما اخواتي وبابا وماما ييجوا اكتشفت اني من الفصيله اللي لو راحت شبرا هتقول يا غربتي تخيلوا حسيت بغربه لمجرد اننا عزلنا رحنا المطريه
قعدت في البلكونه وشغلت الراديو ولقيت عبد الحليم بيغني (حاول تفتكرني ) ورحت فاتح في العياط زي العيال
مع الوقت ابتدي إحساس الغربه يروح تدريجيا كان بيكسر الإحساس ده ان مدرستي كانت في الحدايق فبقابل صحابي وجيراني واروح اسهر معاهم كل خميس زي ما كنا بنعمل طول عمرنا
شقه المطريه كانت في اخر دور وما كانش في سلم يطلع للسطوح أول حاجه فكرت فيها بعد ما تأقلمت ع المكان إزاي ممكن اطلع السطح واتصرفت بقيت احط رجلي علي الدرابزين بتاع السلم ورجل ع الطوب واطلع وعادت ريما لعادتها القديمه في تامل الملكوت من فوق السطوح ومعي رفيق دربي الراديو الحبيب
هناك في شقه المطريه كانت اول مره في حياتي اصطدم بفكره التغيير والمسها أول مره احس ان الشتا طعمه مختلف إخواتي بيتغيروا بقوا رجاله بيتجوزوا واخواتي البنات بقوا عرايس حلوين وبيستنوا نتيجه التنسيق ما بقيناش احنا نفسنا الاطفال اللي بيلعبوا فوق السطوح حتي فيروز اللي سمعتها في المطريه كانت غير فيروز اللي سبتها في الحدايق في المطريه قابلت فيروز (كيفك إنت ) تزامن مش قادر اساه ابدا بين نزول الشريط ده وانتقالنا للسكن الجديد
حسيت وكأن فيروز نفسها بقت حاجه تاني من ساعتها أحسن أو أو حش مش مهم وكأنها عزلت هي كمان
في المطريه ابتدت ملامح الشباب تفرض نفسها عليك ابتديت تهتم بلبسك أو تحوش عشان تجيب بنطلون سبحان الله دلوقتي بس خدت بالي اني قربت ما بقاش شاب
حيطان النسيان مالهاش مكان عندي ابدا انا تقريبا شخص ما بينساش دي أول مره اقرب فيها بالتذكر او الكتابه عن الفتره دي وحاسس ان الصور بتزق بعضها قدام عيني ومش عارف اكتب ايه
صوره لأول مره بسمع فيها (إعترافات ليليه )والسحر اللي في صوت بثينه كامل والموسيقي بتاعت البرنامج وكانت اول مره اسمع فيروز (أنا صار لازم ودعكن ) في ختام الحلقه وقعدت اسقف تحت البطانيه من شده السعاده
صوره لمشوار بقطعه كل يوم بالليل من ميدان المسله ( بيتنا ) مشي لغايه ميدان المطريه عشان اجيب الجرايد
صوره لأصدقاء جزائريين بيزورونا في البيت عايشين في فرنسا بقالهم عشرين سنه وهما قاعدين معانا في البلكونه واحد منهم قال انه حاسس وكانه في وطنه قالها بتأثر شديد جدا وقاللي ان بيتكم دافي جدا واتبسطت جدا ان بيتنا فكره بوطنه
صوره ليحيي أصغر اخواتي لما كان عنده 8 سنين كان راكب ع العجله مع واحد صاحبه وشافني وانا بدخن في الشارع وزعقلي مش ناسي شكله ابدا قلب وشه بزعل حقيقي وحسيت اني قصاد راجل بجد
صوره لسحر اختي الصغيره (دكتوره دلوقتي ) خدتها معايا الاستاد مره من 12 سنه وشافتني وانا بشتم وبحدف طوب زي أي مشجع صايع محترف وبشرب سجايروقالتلي يا عمر هقول لماما
صوره لصديق عمري واخويا احمد اب علي ابن عمتي سهراتنا في الصيف وكلامنا في السياسه
صور لكفاح أمي لظبط الأمور في البيت بعد الاضطرابات النفسيه والغريبه لأخوتي بالتتابع وأبي من قبلهم

صور كتير ملو الخيال
وألف مليون احتمال

مبروك يا عراق

الف مبروك للعراق
العظيم

شعار المرحله

يا ريت تسمعوا كويس الأغنيه اللي شغاله

أعتقد انها معبره بشده


ما فيش فايده

أسامه فؤاد في ساقيه الصاوي

صديق العمر وأستاذي في المزيكا والفنان اللي بجد أسامه فؤاد عنده حفله في ساقيه الصاوي يوم اربعه اغسطس

روحوا الحفله علي ضمانتي

وساعات بتودعنا

إتوترت جدا بعد ما كتبت موضوع فاطمه وماريكا وراشيل حسيت ان ناس كتير مستنيه انا هكتب ايه سواء عنهم أو عن غيرهم

والانتظار ده بالنسبه لي يبوظ الموضوع علي بعضه انا بصراحه ما احبش ابدا يكون في أي عنصر خارجي يأثر علي اللي هكتبه
الخميس اللي فات قصاد الامبراطوريه جالي ناس كتير انتبهت انه الامبراطوريه بس هي اللي ممكن تضم التوليفه دي من البشر بكل بساطه مدونين ونجوم سينما و وصحفيين وقرايبي وسيناريستات وشعرا وناس عاديه
وكلهم متفاعلين مع بعض كأنهم صحاب من زمان
الغريب اني ما حسيتش ان الناس دي جايه علشاني
حسيت ان الناس بتيجي علشان حاله بيعملها المكان
أو عشان صدفه هيقابلوها في المكان يمكن تغير المسار

ونرجع تاني لاصحابي المدونين

من 5سنين كانت أول مره اسمع فيها إسم زنزانه مش لازم طبعا اقول اسمها الحقيقي هنا قبل ما استأذنها المهم كان إسمها بيتردد قدامي من ناس مالهاش علاقه ببعض
وكان سؤالي لنفسي عنها هي مين دي اللي باسمع إسمها في كل حته وبتعمل ايه بالظبط في الحياه
حقيقه شهرتها فكرتني بنفسي ههههههههههه
لما عرفتها فهمت سبب الشهره والقبول الكبير ليها من كل الناس لأنها ببساطه شخصيه خاليه من العقد
بحب مدونتها لما بتبعد عن السياسه وتتكلم عن الحاجات الإنسانيه البسيطه

محمدد عبد الغفار هو المدون اللي بحس ان عنده نفس همومي رغم ان تدويناتنا ما فيهاش شبه كبير بالمره
محمد و كأن في حاجه وقعت منه في السكه ولسه بيدور عليها ومش راضي يعترف ابدا إنها ضاعت للابد
عدم اعترافه انها ضاعت هو اللي هيخليه يلاقيها في النهايه

ياسر نعيم مرايتي اللي بشوف فيها نفسي طفل شقي في حدايق القبه حالف ما يكبر ابدا

إبيتاف عازف ربابه وحيد في وابور الساعه 12 وجرس نحاس من بتوع زمان علي رصيف محطه قطر فاضي في الشتا بالليل

هيضحكوكي بقي بالأمر

أنا مكتئب جدا

جدا