مش نافع الكلام ده أبدا
كل ما اقول فيه أمل أرجع تاني وأقول ما فيش فايده وده طبعا بسبب اللي بشوفه واسمعه في الشارع
النهارده يا عم كنت راكب المترو وماسك في إيدي كالعاده جرنان من بتوع المعارضه وكان من ضمن الموضعات الرئيسيه في الصفحه الاولي موضوع بعنوان (أنباء عن قرب عوده ممدوح اسماعيل صاحب عباره الموت ) ماشي
المهم ألاقيلك اتنين واقفين جنبي عينهم في الجرنان اللي في أيدي وواحد منهم بيقول للتاني : إلحق يا عم بقي اسمها عباره الموت عشان مات فيها كام واحد
والله العظيم الكلام ده حصل نصا
تخيلوا
بالذمه ده يتسمي أيه ؟
واضح تماما ان ما فيش غير الحل الفردي للي يلاقي حل فردي طبعا
إهرب يا زكي قدره هو شعار المرحله
وتولع
Subscribe to:
Post Comments (Atom)
22 comments:
احنا بقينا رخاص كده حتى على نفسنا؟
حاجة مؤسفة فعلا
بعد ما قريت الفصل التاني و علقت عليه .. قريت ده و حسيت ان عايزة اضرب اي حد ..
الفكرة مش ان احنا بقينا رخاص .. المصيبة انها بقت حاجة عادية .. لازمة من لوازم الحياة .. انا مصري اذن انا رخيص .. و هي ده فعلا الكارثة .. تحس انها بقت حاجة عاملة زي علامة الجودة للمصريين أو الختم اللي بيختموا بيه الدبايح في المدبح ... بس الفرق ان البقر عارفين هما متساقين على فين و مش ليهم غير سكة واحدة ... بس احنا متساقين و لا عارفين هترسى بينا على ايه بس اكيد النتيجة واحدة في الآخر ( انتقل الى رحمة الله تعالى المذكور ----- ، اردم يا ابني و هات اللي بعده )
(( مفزعة هي أيامك يا بهية و شقاء هو فراقك مادام فيك أغلى الناس ))
ريــكـــا
اهلا يانديم
مافهمت العنوان لاختلاف الثقافات بالتأكيد... بس كتبتلك اليوم أسألك عن الجزء الثالث والاخير... لو كنت غير قادر خلي الحاج جرجس يساعدك فيه ولاتتخيل ليلة البارحة افكار تجيبني وتوديني على الرد...
اشوفك بخير
عاجبك كدة؟؟
كل الناس مش فاهمة العنوان
لدرجة انه اندرج تحت بند
اختلاف الثقافات
حسستنى انى جاهلة وجاية من كوكب تانى
شوف يا نديم يخويا
اللى انت بتتعجب منه دة
من حالة الامبالاة اللى اصبحت تشكل كيان شعبنا العزيز
من كتر عدد الحوادث البشعة ومن كتر الاموات والضحايا
ومن كتر اعتيادنا على الحاجات دى
بقت عادية كدة عندنا
زى الانفلونزا
وزى ما السرطان فى مصر بقا زى الزكام كدة
مبقاش حد يستغرب ولا يندهش من حاجة
بقت عادة معتادة
يعنى اية العنوان بقا؟؟؟؟
يابنى مش قلتلك استمناء ؟؟ ببساطه الأتنين دول مش لاقيين طريقه يتغلبوا بيها على جبنهم فى مواجهة الظلم .. فببساطه قرروا يصنعوا واقعهم المتخيل باعتبار أنه مافيش مشكله .. شفت بقى الأستمناء بيوصل لفين ؟
العزيز النديم
يا بنى لخبطت البشر بالعنوان بتاعك ده يعنى على حد علمى انه
رمز او شعار بيستخدمه المثقفون كناية عن الخوف
بس مكنش اسمه خالد سعد كان اسمه سعد
بس بالذمة مش عندهم حق ايه يعنى شوية ماتو لازم كل حاجة نسميها كده عبارة الموت ولا كوبرى الموت ولا طريق الموت
ظالمين الموت معانا دايما
يا نديم احنا شعب من كم الكوارث اصبح لا يكترث الا لحظيا ومع الهوجة بس وبعد كده يهدى وينسى
تحياتى على التدوينة
هانت علينا انفسنا فهُنا على الناس
اقعد بالعافية بقى
أخى النديم
القاعده العريضه من الناس قررت أن تعيش مهمشه عن أقتناع وتحت راية الأمثال الشعبيه
اللى نعرفه احسن من اللى منعرفوش
وأمشى جنب الحيط
أنت مستغرب من الناس دى
وهم أكيد مستغربين منك
يقولك يعنى كلامك ده هايغير الكون
كل واحد فى وادى
عشان كده فكرت فى أقالة الحكومه الحاليه وتشكيل حكومه جديده وفرضها على الشعب ورغم كده برضه مش هايهتموا
تمثال رمسيس وهم بينقلوه كانت الناس فرحانه وماشيه وراه
سألت واحد أفندى أنتوا بتعملوا أيه وفرحانين ليه
رد قال أصلهم بينقلوا تمثال خوفو
الناس بقت فى الطراوه يا جدعان
عشان كده اللى يمسك البلد دى
هايستريح بقيت عمره
الناس مش واخده بالها أنهم بيتسرقوا
معكش خمسه جنيه سلف يا عم عمر
طيب مش هفهمكم العنوان
معلش انا الكومبيوتر عندي بايظ و ما بعرفش اتعامل من النت كافيه والحاجات دي
رفاهيه بقي بعيد عنكم
هرد عليكم قريبا جدا واحد واحد
لأنكم واحشيني خالص
عزيزي النديم
أنا متعاطف جدا معك ومع الأخين اللي في المترو اللي شاركوك استغرابك من تسمية العبارة بعبارة الموت
الصحافة بقت صفرا ونفسيتها وحشة
وطبعا إنت أول واحد عارف كدة
وأنا عارف مشاعرك كانت إزاي لما قريت الجرنان وفيه خبر رجوع الأستاذ ممدوح إسماعيل رجل الأعمال صاحب شركة العبارات الشهير الذي بفضل الله تمكن على مدى سنين طويلة من نقل آلاف مؤلفة من الحجاج والنعتمرين إلى الأراضي المباركة
وفي الآخر هؤلاء الكفرة في بلدنا يحملوه مسئولية وفاة تسعمية مواطن مصري
(لا كانوا في حج ولا عمرة)
الموت بالطبع وأنت مؤمن وأعرف إيمانك وتقواك هو قدر وقضاء
يعني لا هي مشيئتي ولا مشيئتك ولا مشيئة الحاج ممدوح الراجل الفاضل اللي بينقل الحجاج والمعتمرين لبيت الله الحرام كل سنة
وفي الآخر يحملوه مسئولية موت التسعميت واحد
(قوام عملوهم ألف الكفرة ولاد ال... ولا بلاش شتيمة)
شفت كفر بالطريقة دي؟
يكفون بقضاء الله وقدره ويحملون الراجل الطيب المتدين مسئولية موت الكام واحد دول
دي بقت عيشة تقرف
أعداء النجاح دول جتهم نيلة ملوا البلد
مش عارفين إن رجوع الحاج ممدوح هينهي مشكلة مئات المعتمرين المتلقحين في نويبع وهيشغل مئات الأحياء
(الحي أبقى من الميت)
أما الأخت الحاقدة التي تقول بأن البني آدم المصري رخص
أقول لها
أيتها الحاقدة الجاحدة
لقد غلى الحاج ممدوح تمنكم أيها المصريين
وبقى سعر النر فيكوا فوق الأربعين ألف جنيه يا كفرة
دا اللي نجوا من "حادذة" العبارة دول النهاردة بيعضوا على أصابع الندم إنهم نجوا وهيعيشوا ويموتوا فقريين هم وعيالهم وأحفادهم
أهو لو ماتوا كانوا الورثة طلعوا بقرشين
اشكر ربنا إنه بعت لك في الوقت المناسب اتنين من الأبرار
(أكيد كانوا من الحجاج على مراكب الحاج ممدوح أو كان ليهم مفقود أو قتيل على المركب الغارقة)
(شوف التسمية ... المركب الغارقة مش غبارة الموت)
الاتنين دول هم اللي حسسوك بإن الدنيا لسة فيها ناس بتفهم ومؤمنين بقضاء الله وقدره
لا أجد كلمات تصف هذه الصلافة الصحفية والإساءة المتعمدة للشرفاء سوى صرختك الأخيرة ... بالذمه ده يتسمي أيه ؟
لو كنا ف مدونة أبيحة زي مدونة وائل عباس كنت قلت لك دا يتسمى إيه
بس للأسف المكان دا مكان محترم وعيب الواحد يقول كلام عيب
في ظل أن الأغلبية بقت عربجية وبيكرهوا النجاح وأشكال واطية كافرة بتسمي المركب الغارقة عبارة الموت
يبقى زي ما انت قلت
واضح تماما ان ما فيش غير الحل الفردي للي يلاقي حل فردي طبعا
وطبعا الحل الفردي هيكون بالهروب على مركب من مراكب رجل البر والتقوى اللي غلى تمنكم يا مصريين
الحاج الفاضل ممدوح اسماعيل
(موضوع تسجيلي مدفوع الأجر من الحاج ممدوح اسماعيل والسيد رئيس الديوان صاحبه ونصيبك محفوظ با عم النديم وشكرا لنشرك البوس دفاعا عن الشرفاء)
ياكش تولع
إلا مين خالد سعد دا؟
دا محترف في أسيك؟
خالد سعد سلامه
يشرفني ان اتقدم بخالص التهاني وأطيب التمنيات القلبية بمناسبة عيد الفطر المبارك اعادة الله علينا وعليكم وعلى مصرنا الحبيبة بكل خير .. مع خالص تحياتي وكل عام وانتم والأسرة الكريمة في أسعد حال
عزيزي أرابيسك
قلت المفيد والله يا ابني احنا بقينا رخاص علي نفسنا
----------------
ريكا
أولا وحشتينا
ثانيا باختصثار كما تكونوا يولي عليكم
إحنا نستاهل اللي بيحصل فينا
--------------
إكرام العراقيه بلد المحبوب
سأشرح لكم العنوان في تدوينه أخري
أما المسرحيه
فهناك مفاوضات بيني وبين الامن للتوقف عنها وإلا
هههههههههه
-----------------
إبيتاف
يا حلولي يا حلولي ده أيه ده اللي بيحصلي
--------------------
شهروزه
إنتي بتزعقيلي ؟
ضيعتي نفسك
يا بنتي مستحيل حد يفهم العنوان لأنه مرتبط بحدث خاص بس البت الدكتوره توتا قربت من من فهمه
طيب يا عم نديم
ابقا يعنى تنازل شوية كدة
وانزل لمستوى عقولنا الضعيفة الجاهلة
واتكرم علينا واشرحه
او بلاش تشرحه
ابقا بعد كدة راعى ان فيه ناس جاهلة زى حالاتى كدة ومتعرفش فى كلام الناس المثقفين دة
ومتبقاش تكتب بمصطلحات مكلكعة زى كدة
عموما
بسيطة
المرة الجاية ابقا خد بالك من الناس اللى زى حلاتى
الفارس الأخير
طاب وبعدين أخرتها ايه
بس انا متهيألي برضه قبل ما نزايد ع الناس لازم احنا كمان نراجع نفسنا
-----------------
توتا
انتي الوحيده اللي قربتي من فهم ا
لعنوان هكافئك لما اشوفك النهارده
--------------------------
المزاجنجي
واحشني جدا والله وانا مقصر في حقك جامد بس الدنيا ملخبطه بس انت لخصت وقلت المفيد
الست أوسا
نورتي المدونه أولا
ثانيا الطراةه بتاعتهم دي هيفضلوا عايشين فيها لغايه إمتي ده إذا اعتبرنا ان دي عيشه أصلا
وبعدين انتي كل ما تشوفيني تقوليلي هات فلوس انا ابتديت اشك انك مصاحباني عشان فلوسي
عموما هبعتهملك مع توتا او الحاج جرجس وهاتيلك بيهم بمب وبلالين وانبسطي كده بالعيد
تحياتي جدا
-----------------
جرجس حبيبي
واحشني جدا يا ولدي
فعلا احنا حزب اعداء النجاح وما بنسيبش حد في حاله
عموما خلينا في المفيد
في إقتلااح ان حضرتك تكتب الجزء الثالث من المسرحيه وانا شخصيا مرحب جدا خصوصا انا انا متأكد ان حبايبنا الحلوين في أمن الدوله مستنيين الجزء التالت بفارغ الصبر وعشان كده انا معلقهم ومش راضي انزله
وبعدين ما تنساش الحقبقه ان انت اللي كاتب المسرحيه أصلا
ولا هنهرب ساعه الجد؟
سلام يا معلم
----------------------
المواطن المتخفي
عرفتك يا سيد اخلع الباروكه
بقي بتقول اسمه ثلاثي كمان؟
غطسان ليه يا ابني إظهر خلينا نشوفك لأنك واحشني
سلام
------------------------
يا مصر أكتب
وانت بالصحه والسلامه يا معلم
-------------------------
شهروزه مره تانيه
ما تزعليش يا ستي في أيه بس
العنوان هشرحهولكم قريب
وبعدين يا ستي اذا ما كنتش هاخد بالي منك هاخد بالي من مين يعني
إهدي ياحمقيه
تحياتي يا شهرزاد المدونات
ميرسي على ذوقك يا نديم .. و وحشتني كتاباتك انت و فارس .. و أحب أهدي الشعب المصري شعبا و حكومة هذه الكلمات الخيالية
ده لا باظت و لا خربت ، و لا جابت جاز لا مؤاخذة ، ده عيشة ظريفة جدا
و لا بيتنا اتخرب ، و لا حد بيشتكي لحظة ، ماشية و الآشية معدن
عايشين بحرية ،زمن القيود انتهى ، اتحدى لو واحد يوم انضرب بالقفا
و الناس بتختشي و لا حد بيرتشي
الله على الحياه بقى لونها شفتشي
ده احنا لا صوتنا اتنبح و لا في مالطا بندن
متأمنين من الفقر الضنك ، تعليم علاج و حساب في البنك
شقق مرمية و الشغل في كل حتة ، و اللحمة بسبعة جنيه و ساعات تلاقيها بستة.
ارجو ان الكلام يكون عجبكم ... زي ما أنتم عارفين احنا كل حياتنا بقت شوية اغاني ... و ربنا على المفتري و اللي يكسر بخاطر الغلابة .
سوري يا نديم على اسلوب الشحاتة ده بس نضحك على الهم بدل ما هو يضحك علينا .
ريــكــا
ملحوظة (ده كلمات تتر النهاية لمسلسل سكة الهلالي و بيغنيها مدحت صالح بس مش فاكرة كلمات مين .. هاشوف الاسم الحلقة الجاية بس اعتقد انه عبدالرحمن الابنودي )
كاتب الكلمات هو الشاعر الجامد أيمن بهجت قمر
وفي رأيي أن هذه الأغنية هي أحسن حاجة حصلت في مسلسلات رمضان كلها على بعضها
وبالطبع لا يخفى عليكم أن دا يتضمن أن الأغنية وهي أغنية تتر مسلسل سكة السلامة أفضل وأمتع بكثير وأفن بكثير من المسلسل العقيم نفسه
يا شباب أنا متبهدل في المدونة بتاعتي وشوية عيال تعبانة قوي نازلين عليا هجوم في التدوينة بتاعة "أهذا هو إسلامكم شكرا" والموضوع مش سخن .. دا ولع وبقى طعمه ماسخ أوي
والعيال التعبانة دي مدخلينه في مسيحي ومسلم وأنه دين بيحرض على التاني والكلام الفقيع دا كله... بالإضافة إلى تكذيب هذه الأشكال الفقيعة في قصة الاعتداء على والدي
ما تيجوا تردوا انتوا وتعلقوا بدالي لأن نفسي مسدودة جدا عن التعليق في مدونتي بعد كل هذا القرف
ما حدش يقول لي أستعمل الكومنت موديراتور وأريح نفسي
مش عاوز أعمل كدة لأني مازلت مؤمنا أن الحرية ومزيد من الحرية هي الحل وهي الطريق
ما تيجوا بقى
ومردودة لكوا بعون الله لما الظلاميين دول ييجوا عندكوا
سايبيني لوحدي كدة في الموقف دا؟
هي دي الصداقة؟
طب لما النديم يبقى رئيس هاطلع دين أبوكوا كلكم
بالنسبة لكتابة الجزء التالت
طبعا أنا مرحب جدا
بس بشرط نحط النقط على الحروف ونعمل عقد جامد يحفظ لي حقوقي الأدبية (والأمنية) والمالية قبل أي حاجة... يعني أنا مش أقل من بلال فضل ولا من وحيد حامد ولا حتى خالد سعد سلامة
(مين خالد سعد ده؟)
أنا عملية زي دي ما أقبضش فيها أقل من سبعة جنيه وربع
ده غير إسقاط كل الديون اللي عليا لسيادتك من مشاريب لم أدفع تمنها لسة
وسجاير إل إم لسة ما اتحاسبناش عليها
أنا محبط جدا
ابقى تعال
ريكا
لا شكر علي واجب وميرسي علي الأغنيه
وياريت نشوفك قريب
----------------------
الحاج جرجس
والله انا موافق فعلا انك تكتب الجزء الثالث وتنشره عندك في المدونه كمان عشان نعرف الكلاب دول يعني أيه وحده وطنيه
وليكن تحت شعار
معنا ذلك أفضل جدا
ولا الحوجه للهلال والصليب
ببساطة لان مخنا نحس من كتر الحوادث، قطر صعيد ومنصورة، أكل مسرطن، مياه مسببة للتسموم، طب وايه يعنى لما يبقي فى عبارة موت، عادى خالص،ايه اللى هيحصل؟ هل لسمح الله حد هيستقيل؟أو ينتحر على طريقة الهارى كاري، لان طبعا، وسلملى على حموم الانماء، والتشرد السكانى، وحتى مخابز عمن الدولة لو عايز، يا عم نديم احنا فى مصررررررر، وليس اوروبا والدول المعندمة..سلم ع نور
RANDA
ياخواننا تاريخ الشعوب ليه علاقة بالبصمة اقصد طبائع الامم واللى يريد يغير يشيل مصر التاريخ والجغرافيا ويلصقها فوق فرنساونبتدى من ايام الثورة الفرنسية .....ساعتها نص اللى بتقولوه يجيب نتيجة احسن الف مرة ... ارجو المعزرة
Post a Comment