كرباج سعاده وقلبي بيه انجلد

رمح شمال ويمين ولف البلد
ورجع لي أخر الليل وسأ لني ليه
مكسوف تقول انك سعيد
يا ولد

جمهوري الحبيب
من المحيط الهادر إلي الخليج الثائر

بناء علي رغبه الملايين من أصدقاء المدونه في كافه انحاء المعموره (المخروبه حقيقه) قررت إداره مدونه النديم إجراء بعض التعديلات الفنيه في المدونه

وعلي ذلك ستتحول المدونه بدءا من تاريخه إلي محطه إذاعيه فنيه تعني بتقديم الأغاني والأعمال الموسيقيه فقط ومؤقتا لحين عوده الرغبه في الكتابه

ارجو منكم جميعا ان تساهموا بأرائكم واختياراتكم للأغاني التي ترغبون في سماعها

ويسعدنا تلقي اقتراحاتكم

وسوف تتغير الأغاني تباعا كل 4 ساعات وفقا لاختياراتكم

خالص مودتي وجزيل شكري

النديم

وقهوه أمي

تبقي في الذاكره دوما أطياف من الطفوله أصدقاء عبروا ثم غابوا أقارب انقطعت صلتنا بهم أحداث شكلت شخصياتنا ووجداننا تفاصيل صغيره أو كبيره تبقي صورها أو أطيافها في المخيله وتلح علي الذاكره من أن لأخر
ربما تكون الصوره الأكثر إلحاحا في ذاكرتي من صور الطفوله هي صوره أمي وهي تشعل لنا بعض قطع من الأخشاب للتدفئه بها في الشتاء
كنا زمان ساكنين فوق سطوح في شارع مصر والسودان في الحدايق أبي رحمه الله اختار هذا المكان لأنه كان أفضل من كل الشقق التي كانت متاحه وقتها كانت رؤيته ثاقبه تماما فأي سكن اخر كان سيضيق بهذا العدد الكبير من الأبناء ثمانيه
هذا المكان الرائع لعب دورا كبيرا في تشكيل وجداننا وشخصياتنا سطح واسع فسيح تتجاوز مساحته ألف متر مربع ينقسم إلي نصفين بعد ان تدخل من الباب يقابلك نصفه الأيمن الذي يطل علي شارع مصر والسودان مباشره في مواجهه جامع الشيخ (كشك ) رحمه الله والذي لا أنسي أبدا انني صليت خلفه في سبتمبر سنه واحد وتمانين قبل اعتقاله مباشره وشاهدت بعيني اول خبره سياسيه في حياتي حينما اعتقله السادات في تلك الأيام وخرج الألاف من المسجد منددين باعتقاله واشتبك معهم الأمن بالأسلحه البيضاء
النصف الثاني من السطح يضم غرفنا الثلاثه وباقي السطح وكان يطل علي حديقه فسيحه تابعه للعماره كنا نتكفل برعايتها وبها شجره ضخمه عاليه وكنا نمسك أوراقها بيدينا ونحن فوق السطوح
بالنسبه لنا كأطفال وقتها لم نكن نحلم ببيئه أفضل من هذه لنسكن فيها السطح الواسع كان هو ملعبنا الكبير الذي أغنانا عن اللعب في الشارع مؤقتا وجعلنا مقصد كل اطفال الشارع الذين وجدوا في منزلنا ملعبا متاحا ومفتوحا أمامهم طوال الوقت وبترحيب وتشجيع من اهلهم الذين وجدوا فيه أيضا ملعبا امنا لأولادهم بعيدا عن مشاكل الشارع كما أنهم يستطيعوا مراقبه أبنائهم من البلكونات المطله علي منزلنا
لكن الاجمل من ذلك علي الإطلاق كان الشتاء
كان من ضمن هواياتي وانا صغير إني اسرح في ملكوت الله زي ما قلت لكم قبل كده ربما يكون هذا المكان هو المسؤول عن هذه العاده الأفق كان مفتوح قدامك طول الوقت ما فيش عمارات وراك او قدامك يعني منك للسما ليل ونهار قاعد بتراقب السما وهي بتغيم أو بتمطر وبتراقب النجوم والقمر من غير أي حاجز بينك وبينها
أسعد لحظات حياتي كانت لما السما تبتدي تمطر أطلع اقف في السطح دون ادني استجابه لنداءات امي أتبل واغرق طبعا وتقعد تزعق وانا ولافي دماغي عايش مع نفسي في ملكوت الله وقاعد بتفرج ع الناس اللي بتجري في الشارع من المطره والهدوء المدهش والمفاجيئ للكون من حواليا والشجر اللي اتغسل وبحس بغيره صحابي اللي اتقفلت عليهم البلكونات
بالليل تشعل أمي شويه قطع من الخشب نقعد نتدفي عليهم واحنا مشغلين الراديو ونقعد نتدفي ونحكي حكايات اللي بيذاكر يذاكر واللي يحكي يحكي وصوت العواصف والمطره بره ياااااااااه
كأنه كان عالم افتراضي
حكايات جدي وجدتي الطيارات الورق اللي كنا بنطيرها انا وصحابي ماتشات الكوره اللي ما بتنتهيش وأغاني فيروز في الشتا
كنت دايما بحس ان طعم أغاني فيروز بيختلف في الشتا عن الصيف في الشتا كنت اما اسمعها أحس اني في غابه او جزيره في الصيف بحس بحاله مختلفه يمكن اقرب لنشوه الحب الحقيقي
وانا قاعد بفتكر دلوقتي حاسس بمشاعر ما تتوصفش وده أجمل ما في الموضوع الذاكره أحيانا بتعيد اتزان الواحد وترجعله مشاعر كان قرب ينساها بفعل الهموم المتراكمه
ساعات كتير بحلم لو الواحد يقدر يسافر في الزمن زي ما بيسافر في المكان بحلم لو اقدر ارجع للطفوله واعيش في نفس المكان اللي كنت عايش فيه وما اكبرش ابدا
التفاصيل والأسامي كتير قوي في الذاكره يمكن كل إسم وتفصيله عايزه موضوع لوحده جامع كشك والجيران وبتاع الفطير وطنط شفيقه وعماد نبيل و حماده سلومه وغيرهم وغيرهم
البيت ده اتهد سنه 1991 عشان تتبني مكانه عماره كبيره المهم بعد ما كل السكان خدوا فلوسهم ومشيوا واحنا كمان طبعا كنت بروح ابات في البيت لوحدي ومش قادر اصدق ان البيت ده هيتهد فضلت ع الحال ده شهرين لغايه ما ابتدوا يهدوا فيه فعلا
أول يوم ابتدوا يهدوا فيه وقفت ع الرصيف مش مصدق وقعدت اعيط
وكل ما افتكر البيت ده
بحس كأنه كان حلم ليله صيف
وبفهم
يعني أيه كلمه وطن

إتمخطري يا عروسه

أكيد معظمنا عارف اللحن بتاع سيد درويش اتمخطري يا عروسه واتهني بعريسك سيد العرسان
اللحن ده من الألحان الغريبه جدا
مفترض انه لحن فرح لكنه لحن شديد الشجن والحزن ورغم ان كلمات الأغنيه يفترض أنها كلمات مبهجه إلا انك لا تشعر أن اللحن متناقض معها
عموما سيد درويش كان معجزه موسيقيه لا شك فيها وكل شيئ متوقع منه

إمبارح وانا راكب المترو شفت بنت شكلها في أوائل العشرينات تقريبا شكلها كان غريب جدا حاطه كم من البودره ومساحيق التجميل بشكل مبالغ فيه لبسها شديد الغرابه أيضا ومعبر بوضوح عن عن افتقادها لأي معايير جماليه ومستوي مادي واجتماعي شديد الفقر وتأكدت وجهه نظري حينما بدأت في الكلام في التليفون
المهم شكلها الغريب ده كان مثار تعليقات وسخريه الكثيرين من الركاب ووصل الأمر إلي الاشتباك اللفظي بينها وبين إحدي الفتيات التي كانت تسخر بوضوح وصوت مسموع
لا أخفيكم سرا إنني تعاطفت بشده مع الفتاه وهو عموما موقف متوقع من أي أحد لكن انا الحاجات دي بتاخد معايا مساحه زياده عن اللزوم شويه لدرجه اني فضلت طول اليوم افكر فيها
كلنا عندنا تعاطف مع المظلوم طبعا ده شيئ مفروغ منه بس أكتر حاجه بتعاطف معاها انا شخصيا لما بشوف طفل نفسه في حاجه ومش طايلها أو لما اشوف بنت عندها مشكله مع جمالها خصوصا لما يكون نقص الجمال ده مرتبط بفقر وتدني مستوي اجتماعي

من حوالي 10 سنين كنت رايح الكليه المهم وانا في السكه حبيت اشرب عصير قصب أنا فيا داء غريب شويه إني بكلم نفسي وانا ماشي احيانا المهم وانا داخل المحل افتكرت حاجه ضحكتني فضحكت وتصادف إن كان فيه في المحل برضه بنتين شكلهم في الجامعه برضه وواحده فيهم كانت حاطه شويه مكياج زياده حبتين شكلها طيب جدا وفوجئت انها اتكسفت قوي لما لقيتني بضحك افتكرت اني بضحك علي شكلها لدرجه ان صاحبتها بصت لي وقالت بصوت واطي بتضحك علي ايه
إنتبهت لحظتها إني أحرجت البنت وما عرفتش اكلمهم واقول لهم اني والله كنت بكلم نفسي وشربت العصير ومشيت بس أبدا ما نسيتش هذا الموقف رغم انه فات عليه عشر سنين
حسيت اني من غير ما اقصد كسرت قلب بني أدمه كان نفسها تحس بجمالها ونفسها حد يقول لها (يا عليا شو حلوين ) أنا فاكر كويس علي فكره عينيها الواسعه مش قادر انساها نهائي مش عارف ليه
أنا مش عارف اكمل كتابه يمكن لأن ما فيش موضوع أصلا بس بصراحه أنا من امبارح في حاله نفسيه غريبه مشحونه بالشجن
شجن جميل صحيح بس تاعبني لأنه بيفكرني بحاجات مش عايز افتكرها
بيفكرني بكل المظلومين اللي الواحد قابلهم في حياته
إمبارح بالليل حلمت اني قابلت واحد من المظلومين دول أهمهم بالنسبه لي طبعا ويمكن هو أكتر واحد اتظلم في الدنيا دي قابلته في حياتي
حلمت اني عنده في البيت لم يعد هو الشخص الذي كنت أعرفه أصبح شخص بائس يحيا حياه بائسه وأصبح لديه أسره بائسه أيضا حلمت انه بيتخانق معايا وبيزعق مسكني من رقبتي قعد يقول انتوا مش مقدريني ليه ويكررها كتيروانا بقوله المشكله ان انا مقدرك جدا وبقولهالوا وانا بعيط
صحيت من النوم مفزوع وفي حاله لا توصف من الحزن مازالت مصاحباني لغايه اللحظه اللي بكتب لكم فيها دلوقتي
وبس

دي مش كوره دي مزيكا

بالصدفه البحته النهارده فتحت التليفزيون علي إعاده الهدف الأول للإسماعيلي في مرمي الأهلي وبسبب الهدوء الذي كان يتحدث به المذيع الأهلاوي طبعا تصورت ان المشهد لهدف قديم في مباراه سابقه بينهما
المهم قلبت علي قناه دريم لقيت ان المشهد مش ماتش قديم ولا حاجه لأ ده من ماتش النهارده والاسماعيلي فعلا متقدم ا/صفر علي الأهلي وفين
ده في استاد القاهره نفسه
رحت قاعد قصاد التليفزيون وقلت والله ما انا رايح الشغل واللي يحصل يحصل ان شاء الله يرفدوني
وتابعت الماتش طبعا بكل انفعال ممكن تتوقعوه من واحد زملكاوي زي حالاتي يري في الإسماعيلي أو يري الإسماعيلي باعتباره شقيقا كرويا للنادي الذي أنتمي إليه هذا طبعا بخلاف ال عنصر الرءيسي في الموضوع وهو استمتاعي الدائم بالكره التي يقدمها الإسماعيلي عبر تاريخه
وبعيدا عن المباراه ونتيجتها الطبيعيه والمنطقيه جدا نتيجه لسير الأحداثوالتفوق الرهيب في المستوي لصالح الإسماعيلي وبعيدا عن سعادتي بالنتيجه وانفعالي الكبير أثناء المباره هذا النفعال الذي افتقدته منذ ردح من الوقت
لكن اكثر ما توفقت أمامه في هذه المباراه هو الأتي:
أولا : لماذا تكون مباريات الأهلي مع الاسماعيلي بكل هذا الشحن المعنوي والجماهيري حتي لو كانت مباراه وديه؟
ولماذا يكون هناك دوما حاله ثأريه بين الفريقين أيا ما كان الوضع
ولماذا لا يكون الأهلي هو نفس الفرق الفريق الذي تعرفه لماذا يكون شيئا مختلفا غالبا عن صوره البطل الذي لايقهر التي يصدرها دائما؟ ولماذا يكون الاسماعيلي هو الأفضل في معظم اللقاءات التي تجمعهما ولماذا يكون الاسماعيلي هو الفريق الوحيد القادر في مرات كثيره علي هزيمه الأهلي في عقر داره ووسط جمهوره بمثل هذه النتائج؟
حقيقه أسئله كثيره تثار حول هذه الحاله التي بين الأهلي والاسماعيلي والإجابات فيها كثيره ومتنوعه ايضا بعضهم يردها لموقف تاريخي حينما رفض الأهلي (نادي المباديئ والوطنيه
) استضافه الاسماعيلي أيام التهجير بعد النكسه وبعضهم يردها لتباين طرق الأداء بين الفريقن والتي تجعل الاسماعيلي صاحب الفلسفه الكرويه المختلفه فريقا قادرا بحكم هذه الفلسفه علي التعامل بنديه امام الأهلي

لكن تقديري الشخصي يذهب بالموضوع إلي ما هو أبعد من ذلك
تقديري الشخصي يذهب
إلي مساحه الشرعيه او من هو صاحب الشرعيه في الكره المصريه
الأهلي يري نفسه البطل الشرعي للكره المصريه بحكم بطولاته طبعا
بينما يري الإسماعيلي وأنصاره أنه هو الفريق الافضل في تاريخ الكره المصريه بحكم فلسفه لعبه علي الأقل والتي تعتمد علي الجماعيه والجماليات الفنيه بشكل كبير
إنه صراع بين مدرستين أو فلسفتين
وهذا هو لب الصراع بينهما فيما أعتقد
الاسماعيلي يبدو في هذه اللقاءات حريصا علي تأكيد شرعيته كأفضل فريق كروي في مصر
والاهلي يريد تأكيد جدارته بزعامته للكره المصريه
ولذلك يكون هذا اللقاء استثنائيا أيا ماكان الوضع
والغريب أيضا ان الاسماعيلي هو الفريق الوحيد في مصر الذي كون قادرا علي التعامل مع الأهلي في أشد الظروف إستثنائيه
مثلا منذ أربعه سنوات حقق الأهلي فوزا تاريخيا علي الزمالك بسته أهداف مقابل هدف وكان هذا طبعا حدثا لايمكن أن يتكرر وكان الأهلي بعد هذه المباراه الاستثنائيه سيلاعب الاسماعيلي في القاهره في لقاء سيحسم طبعا من سيفوز بلقب الدوري
وأشفق الجميع علي الإسماعيلي الذي سيلاقي الأهلي في هذا الظرف الاستثنائي والفريد
ومع ذلك لم يخسر الاسماعيلي بل أدي مباراه تاريخيه بكل المقاييس وخرج متعادلا مع الأهلي 4/4 في مباراه هي تقريبا أفضل مباراه في تاريخ الكره المصريه عبر العقود الثلاثه الأخيره إن لم تكن عبر تاريخ الكره المصريه علي الإطلاق صحيح أن الأهلي قدم في هذه المباراه مستوي شديد الرقي أيضا (علي غير العاده ) لكن ما فعله الإسماعيلي كان أرقي بكل المقايس بل يكفيه انه كان المبادر بالتهديف غالبا وحتي عندما تقدم الأهلي في الثواني الأخيره لم يستسلم وتمكن من التعويض
والمواقف والاستشهادات التاريخيه لا تنتهي في هذا الموضوع لكن ما اود ان أشير إليه وهو لب الموضوع أصلا هو أن صراع الشرعيه بين الفريقين (لا مجال هنا لذكر الزمالك والذي هو حاله هجين بين هاتين الفلسفتين وقيمه الجماليه لم تكن حاضره دائما ) صراع الشرعيه هذا يفرض أثره دائما طبعا علي هذه اللقاءات فيكون لاعبي الاسماعيلي عاده حريصين علي تقديم أفضل ما لديهم وكسر هيبه هذا البطل الغير شرعي الموفق دائما علي مستوي الإنجاز رغم غياب الجماليات بسبب مجموعه من العناصر المتكامله التي علي رأسها طبعا قدراته الماديه وجماهيريته اللا محدوده وما يترتب علي هذه الجماهيريه من عوامل اخري مثل الانحياز الإعلامي الشبه دائم لصالحه بينما يكون لاعبي الأهلي عاده أيضا في حاله دفاعيه نفسيا وفنيا نفسيا بسبب ما قلناه عن شرعيه الإسماعيلي
وفنيا بسبب طبيعه لعب النادي الإسماعيلي والتي يصعب علي الأهلي التفوق تجاهها فالأهلي الذي اعتاد من يوم ان أنشيئ ان تنكمش الفرق امامه يصعب عليه تماما ان يلاقي فريقا لا يهابه ويبادئه بالهجوم والمبادره غالبا والمسافات بين خطوطه متقاربه ووووو
العديد من التفا صيل الفنيه التي لامجال هنا لذكرها
وتأكيدا علي ما قلناه عن الحاله النفسيه الدفاعيه التي تصاحب لاعبي الاهلي في لقاءات الاسماعيلي نذكر العديد من الشواهد فلقاء 4/ 4 الشهير بينهما يؤكد ما يقول فمن كان يصدق يومها ان الاسماعيلي وفي استاد القاهره وامام 80 ألف أهلاوي وفي ظل حدث استثنائي مثل فوز الأهلي علي الزمالك بسته أهداف من كان يصدق ان يخرج من هذه المباراه هكذا
ومن يصدق أن الأهلي العائد لتوه من بطوله العالم يبدو بهذه الدرجه من الهوان والتباين الرهيب في المستوي في مباراه اليوم بعيدا عن نتيجتها امام هذا الخصم
والعديد من الأمثله الأخري التي تؤكد ما نقول لكن اكثرها دلاله علي الإطلاق هو ما حدث قبل المباراه بيوم واحد حينما احتج الأهلي علي حكم المباراه فهذا السلوك ليس من السلوكيات المعتاده من الأهلي وأن عبرت عن شيئ فأنها تعبر بوضوح عن ما قلناه عن الاهتزاز النفسي لدي الأهلي كمؤسسه ولاعبين وجمهور تجاه الإسماعيلي هذا النادي الكبيروالكبيرجدا
والعظيم والبطل الشرعي للكره المصريه بما يقدمه من جماليات
أما اصدقائي من جمهور الاهلي اللي هيقروا هذا الموضوع
فإنني مستعد تماما لمواجهه ما سألاقيه منهم من ردود ومستعد تماما للتعامل مع لسانهم الطويل (قاري فيكم كذا كتاب ) وعارف هرد عليكم ازاي
وبالشفا

أهلي أهلي

يا جدعان
النادي اللي اسمه الأهلي ده زودها قوي معايا بصراحه بشكل يستحيل السكوت عليه
هطق خلاص مش قادر
بعيدا عن المنافسه والصراع التقليدي بينه وبين النادي الموكوس اللي بشجعه بس انا فعلا ابتديت احس ان النادي ده اتعمل عشان يكفرني في عيشتي انا بالذات
من 5 سنين الزمالك كسب بطوله أفريقيا وكان المفروض يروح يلعب في بطوله العالم للأنديه وبعد ما اتعملت قرعه البطوله وخلاص راحت اتلغت قبلها بأسبوعين
بختنا كده لما نيجي نلعب في بطوله عالميه تتلغي ولما الأهلي يوصلها ما تتلغيش لأ وأيه يطلع تالت العالم كمان
من 4 سنين كان الأهلي بيلاعب فريق من أنجولا في استاد القاهره في بطوله أفريقيا ولأول مره في التاريخ كان الأهلي مهزوم 4 صفر سمعت النتيجه في الراديو وما صدقتش جريت ابص ع النتيجه في أقرب قهوه ومسافه ما وقفت ثواني راح الأهلي جايب جونين ورا بعض رحت واخد بعضي وماشي أحسن يتعادلوا ولا حاجه
ومن 3 سنين ريالمدريد جه مصر يلاعب الأهلي ماتش ودي ورحت شادد الرحال علي الاستاد عشان اشوف الأهلي وهو بيتقطع ما اهو مش معقول هيكسب ريال مدريد
بس عملوها ولاد الكلب وكسبوا
ومن شهرين كانوا بيلعبوا نهائي بطوله أفريقيا في تونس والحمد لله ما شفتش من الماتش غير دقيقه واحده
اللي ابو تريكه جاب فيها الجون الأسطوري طبعا
الأسبوع اللي فات كانوا بيلاعبوا إنبي في الدوري وحيث ان انا فكيك بقي واتعلمت ما اتفرجش عليهم ولا اسأل ولا أهتم نفضت خالص وبعدين عديت ع المكتبه وكان الماتش شغال في الراديو فسألت رزق اللي شغال معايا والذي يشجع الأهلي بجنون
النتيجه كام يا رزق؟
واحد واحد ومش فاضل غير خمس دقايق
قلتله طيب ما تقلقش هتجيبوا فيهم جون
المهم في أخر دقيقه بالفعل راح الأهلي جايب جون لكن نفاجأ ان الحكم حسبوا تسلل رحت قافل الراديو وجريت ع القهوه عشان ابص علي إعاده الهدف الملغي ومسافه ما وصلت راح الأهلي جايب جون

المهم كله كوم واللي حاصل من 4 ايام كوم تاني خالصصصصصصصصصصصص
إنتوا عارفين طبعا ان الأهلي لما رجع من اليابان اتعملتلوا زفه شعبيه كبيره وكان اللعيبه راكبين في أوتوبيس أحمر جميل مكشوف من غير سقف اتعملهم مخصوص

الاتوبيس ده ساب مصر كلها وراكن تحت البيت عندي