أعزائي المستمعين جمهور مدونه النديم في كافه أنحاء المخروبه
يسر مدونه النديم (المدونه التي لا تغرب عنها الشمس ) أن تدعوكم للمشاركه في استفتائها الأول بمناسبه مرور سته أشهر علي انطلاقها
وكما تعلمون طبعا أن الهدف الأول من هذا الاستفتاء أو استطلاع الرأي هو حرصي الدائم علي تطوير المدونه إرضاء لجمهوري الحبيب من المحيط الأطلسي إلي الخليج الفارسي
حريه التعبير طبعا مكفوله للجميع إنتوا عارفين اني ديمقراطي
واللي هيغلط ويقول رأي ما يعجبنيش مش هزعل طبعا
بس رجالتي هيتعاملوا معاه بالطريقه بتاعتهم
ولكم جزيل الشكر
السؤال الأول
ما هو رأيك في هذه المدونه امامك اربع اختيارات
ممتازه
رائعه
ماحصلتش
أدي المدونات واللا بلاش
السؤال الثاني
ما هو أفضل موضوع قرأته في هذه المدونه
السؤال ثالث
كيف توصلت إلي المدونه؟
السؤال الرابع
قبل ما تشوفوا صورتي وطلعتي (البهيه ) كنتم متخيليني عامل ازاي
السؤال الخامس
ما رأيك في اختياراتي للأغاني
السؤال السادس
هل أضافت لك هذد المدونه شيئا ولا قلتها احسن؟
السؤال السابع
ما الذي كنت تتوقعه من هذه المدونه ولم يتحقق
السؤال الثامن والأخير
ما هي أفضل طريقه في رأيك للتخلص من الحاج جرجس ؟
ولكم مني جزيل الشكر مع ملاحظه ان الإجابه عن الأسئله إختياريه ما عدا السؤال الأخير إجباري
Subscribe to:
Post Comments (Atom)
29 comments:
hello,Omar. my answers.
1-excellent.
2-My mum's coffee.
3-After you had Nour,you was so happy to send his pics in the blog to the world.
4-I know how you look like before,so i didn't shock. but actually you looks smarter after you became a father?why?
5-Good,and i need more femal singers!
6-It is good blog to follow Egyptian labourer's news.
7-I expected to find Porn pics!
8-Send him to me, To Australia,i know where i can hide him!
see you
عمر .... ازعجتني مدونتك.... اسمه الخليج العربي وليس الفارسي
طبعا ممتازة
افضل موضوع لما اتكلمت عن بيتكم القديم وعن الراديو
اتوصلت لها لما الواد احمد زكي فتن عليك
طبعا كنت متخيلاك زي ما انت دلوقتي عينك خضرا وشعرك اصفر بس استويت لما سمعت خبر التغييرات الدستورية، واكيد انت مولتو بلو ومولتو حاجات تانية هقولك عليها ف القهوة
اختياراتك تحفة يا عمر بيدل علي اننا لنا ذوق واحد (وش بيغمز)،المدونة اديتني
شحنة عواطف واحاسيس تجنني غير انها عرفتني بتفاصيل كتير عنك مكنتش اعرفها
بالنسبة للحاج جرجس ممكن نفتن عليه
انت عارف حبيبه كتير بس لو عاوز خطة جهنمية ممكن اقولك بيني وبينك
هات ودنك...دودودودود
استمر يا عمر انا بحب كل اللي بتكتبه ان شا الله
لو هتشتمني
اوعي تخلي رشا تقرا الرد بتاعي
بلغ رشا انها وحشتني ونفسي اشوفها هي ونور حبيبي
الصديق العزيز عمر قناوي
ألف مبروك الاحتفال بالذكرى نصف السنوية لتأسيس المدونة التي لا تغرب عنها شمس العالم الافتراضي أبدا
إجابة السؤال الأول
ممكن اختيار أكثر من إجابة؟
طبعا ممكن
إذن هي ممتازة ورائعة وما حصلتش
-----------------------------
إجابة السؤال التاني
الأفضل كوميديا مسرحية الفيزا وكوندوليزا اللي انت شلتها يا جبان
الأفضل سياسيا متابعات بشاير النصر وإضرابات العمال
الأفضل إنسانيا موضوع ألف سلامة يا أيمن
الأفضل وجدانيا وقهوة أمي واسمع اسمع يا رضا
----------------------------
إجابة السؤال التالت
حضرتك اللي قلت لي على المدونة تاني يوم ما اتولدت... طبعا كان نفسي إنها تتولد على إيدي على أساس إني تخصص توليد بس ملحوقة المدونة الجاية بإذن الله بقى
----------------------------
إجابة السؤال الرابع
طبعا أنا شفتك قبل ما اشوف الصورة ومن ثم سأعدل السؤال ليكون كنت متخيلك إزاي قبل ما اشوف سعادتك وطبعا لا ننسى أن صاحب الفضل في رؤيتي لسعادتك كان صديقنا البرجوازي فارس قديم
قبل ما اشوفك ومن كلام فارس عنك ومن صوتك في التليفون كنت متصور إني هشوف كهل أربعيني... طويل وأبيضاني ومليان شوية وعامل فيها عم المهم وصدمت طبعا لما لقيت هذا الشاب الأسمراني الذي لم يتجاوز الحادية والثلاثين قليل الكلام شديد التواضع اللي ما بيطيقش التنطيط على خلق الله ولا فارق معاه شهرة ولا أهمية
--------------------------
إجابة السؤال الخامس
الأغاني تدل على ذوق رفيع وحس فني راقي وهي تأتي منطلقة من إيمانك بنظرية الأواني المستطرقة والتي تنص على أن "سينما جادة، وكتب جادة، وصحافة جادة، وسوف يؤدي كل ذلك الي رأي عام جاد، يؤدي الي تفتيت سلطة وفاعلية المؤسسات الصحفية، وقنوات التليفزيون، التي تعمل علي تشكيل الرأي العام لحساب هذا النظام"ـ
--------------------------
إجابة السؤال السادس
أكتر حاجة أضافتها لي هذه المدونة هي قيمة الكلمة الصادقة اللي خارجة من القلب وبتوصل للقلب وأهمية التجربة الذاتية للإنسان الفرد في إثراء التجربة البشرية العامة
--------------------------
إجابة السؤال السابع
ما كنت أتوقعه وأنتظره ولم يحدث هو نزول الفصل الثالث من المسرحية التاريخية والرائعة الملحمية أنا والفيزا وكوندوليزا
---------------------------
إجابة السؤال الثامن
بالنسبة للتخلص من الحاج جرجس، في رأيي أنا أعتقد أن الاستيلاء على كفاية حرام وإعادة هيكلتها مع تقليص سلطات الحاج جرجس عليها قد يكون هو الحل السلمي الأمثل للتخلص من الحاج جرجس وإن كنت أنا شخصيا فكرت منذ أيام أن أنقلب عسكريا على الحاج جرجس وأقوم بإعدامه في ثورة تدوينية عليه وعلى انفراده بالسلطة في "كفاية حرام" وتسلطه المطلق في اختيار الموضوعات اللي على مزاجه ومزاج جمهوره ورفض الموضوعات التانية اللي أنا ومجموعة من قراء كفاية حرام نفسنا فيها
ولنهتف معا يصعد يصعد الحاج جرجس
بص يا عمر
هو اهم سؤال فى الاسئله دى هو الطريقه المثلى للتخلص من الحاج جرجس
وانا لقيت الحل يا مان
ببساطه نبلغ وزاره السياحه وززاره الاوقاف ان الحاج جرجس بيتاجر فى فيز الحج والعمره المضروبه..يعنى كل الافواج اللى حاج جرجس مطعلها تحج وتعمل عمره..طالعه بفيزا مزوره..
وممكن نزودها شويه ونقول ان الحاج جرجس بيطلع الناس تحج فى الاردن او ليبيا؟؟
والموضوع هيكبر فى الصحف والجرايد.. ومحمد عماره هيكتب كتاب عن جرجس وطريقه التخلص منه..
وكيف ان عمر النديم او دراعه اليمين واغتياله متاح برده..
ايه رأيك يامان
الزعيم المفدى صاحب المدونه التى لا تغرب عنها الشمس ..
انت فعلا زعيم ديموقراطى .. و خلنى أسمى التاج ده استفتاء تيمنا بأساليب زعمائنا فى ممارسة الديموقراطيه .. يعنى هم احسن منك فى ايه ؟ و ابدأ فى الأجابه كالتالى
أولا :المدونه راااااائعه
ثايا : قهوة أمى .. موضوع بنكهة الدفء و الأمان .. و الحنين للماضى الجميل
ثالثا : كيف توصلت للمدونه ؟ انت بتستهبل يا زعيم ؟ ده أنا اللى قايلك تدون من أساسه
رابعا : تانى هاتستهبل يا زعيم ؟ انا عارفك و شايف خلقتك من قبل ماتدون اساسا
الأغانى : أيضا الأغانى .. بطعم الزمن الجميل .. أشكرك عليها
سابعا : اضافت المدونه شعور بأن هناك من يشاركنا الفكر و الألم و السعادات المسروقه
موضوع التخلص من جرجس ده بقى اللى دراسه لوحده .. يعنى نموته المسأله بسيطه خالص .. نزقه تحت المترو .. نطلعه البرج و نرميه .. نخليه قاعد على القهوه و ندلق عليه جاز و نولع .. المسأله لو على نخلص منه و بس تبقى بسيطه .. لكن بما أنه الحاج جرجس يبقى لازم نموته بطريقه مفتكسه يتحدث عنها التاريخ طويلا .. أحد الأصدقاء اقترح دفنه فى برميل من الجير الحى مع الأبقاء على رأسه خارج البرميل .. ثم تغطيسه فى مياه النهر الخالد .. الجير يتفاعل مع الماء فيتسبب فى حرقه ببطىء .. و بما أنه فى النهر فسيغرق طبعا .. و بالتالى يموت محروق و غرقان فى نفس الوقت , عن نفسى افضل الطرق التكنولوجيه الحديثه .. و بالاتفاق مع القوات الجويه يمكن تأجير هليكوبتر .. نربطه فيها بحبل طويل شويه .. الطياره تطير فوق شوارع وسط البلد على ارتفاع منخفض و بسرعه كبيره .. و جرجس متدلدل منها بيخبط فى العمارات .. طبعا هناك اتجاه آخر لربطه ف مركب سريع و تلبيسه عوامه .. و المركب يتفسح بيه فى البحر الأحمر فى منطقه عين القرش .. بحيث سمك القرش يمزمز فيه بالراحه و احنا بنتفسح فى المركب و بنتفرج عليه و هو بيتاكل .. بس المشكله أنه هايصعب عليا سمك القرش المسكين اللى هايضطر ياكله
ممكن طبعا ناخده الأقصر و أسوان و نقعده على مسله فرعونى .. أو نرميه قدام توربينات السد العالى .. او ندلدله فى بحيرة ناصر .. و اهى التماسيح تنبسط و تدعيلنا برضه ..و السياح هاتتفرج و تصور و نبقى استفدنا من تنمية السياحه
التخلص من الحاج جرجس أمر هام .. لكن لابد من أتمامه بطريقه مبتكره تعود على المجتمع كله بالنفع .. و صحيح ماكانلوش لزمه و هو عايش .. نحاول بقى نخليله لازمه و هو بيموت
تحياتى يا زعيم
بسم الله الرحمن الرحيم
الاجابة تونس
---
لا بجد
السؤال الاول:
ده مش عدل لازم يبقى فيه عدالة في وضع الاسئلة .. لازم يكون فيه اختيار رابع
(جميع ما سبق)
السؤال الثاني
البوست اللي فات على طول كان إنساني قوي ورقيق جدا
السؤال ثالث
اخدت الطريق الدائري طوالي
لان الاوتوستراد كان زحمة
السؤال الرابع
ماجاش في بالي التوقع دي
السؤال الخامس
منتاز
السؤال السادس
ايه كل الاسئلة الصعبة دي
على العموم انا بعترض اصلا على السال
لانه حتى لو لم تضف المدونة للاخرين اي شيء فهي مساحة حرة خاصة بصاحبها
اما بالنسبة لي شخصيا فاي تجربة انسانية تسرد امامي يجب ان تضيف لي شيء جديد
السؤال السابع
المنحة يارييس
السؤال الثامن والأخير
وبما ان ده تقريبا من اهم الاسئلة
فاقترح ان يكون قيد التنفيذ سريعا
طبعا هناك طرق عديدة
الصعق بالكهرباء
بلاغ صغير على ورقة لحمة لاقرب قسم
السيانيد اقتراح هائل وغير دموي
الجير الحي طبعا ممتاز لانه هيساهم في التخلص من الجثة في اسرع وقت وبدون مجهود
ممكن نمنعه عن الكلام لمدة تلاتايام وهو هيموت لوحده
عمر
الاسئلة مالها صعبة كده
السؤال الاول
ايه الديموقراطية الفظيعة االمريعة دى انا بالنسبة ليه انت عارف ربنا يزيح الغشاوة اللى على عينى واقدر اقول الحقيقة طبعا انها تحفة مش موجودة الاجابة دى بس انا عايزة دى
السؤال التانى
انا علقت على كل المواضيع وده معناه طبعا بمنتهى الثقة فى النفس انهم كلهم عجبونى بس موضوع اتمخطرى يا عروسة وصورة هى عيشة ولا موتة ولا فوتة فى حارة سد وتررررم
السؤال الثالث
من عند فارس والتسييحة بتاعته لما فتحت المدونة بصراحة
السؤال الرابع
انا شوفتك قبل الصور بصراحة مقدرش اكدب وانت عارف بدايتنا واول سوء تفاهم
السؤال الخامس
اختيارات الاغانى بصراحة انت راجل ذويق يا عمر بس يعنى نسيت انك عامل اغانى بناء على رغبة المدونين يعنى مش كله اختيارك برده
السؤال السادس
امال ضافت حد يقدر ينكر
السؤال السابع
هروبك من التاج يا معلم
السؤال التامن
بما انه اجبارى جرجس مش هينفع اى حاجة معاه خالص اساسا غير انك تحطه مع حد بيتكلم كتير فيتعذب فممكن ساعتها ينهار ودى وسيلة التعذيب المتاحة حاليا
بسم الله الرحمن الرحيم
حفصة محمد
القنطرة شرق عن متيسة عزبة البقر
امريكا البلد
و حضرتك طبعا اوي يعني
المدونة دي تجنن و تحفة و عاملة زي
تصريحات الحزب الطني اللي بتخلي الواحد ينشكح لكنه مبيبقاش عارف من ايه بالظبط
السؤال التاني
بما انها المدونة كما سبق و شرحنا انها مالهاش حل
فكل النواضيع تجنن تحفة ياي
تلحس العقل المسكين زي حالاتي
توصلت للمدونة عن طريق جرجس و بسبب اني كنت بشوفك لازق هناك ليل نهار
فقلت اجي اشوف مين السخض اياه دهون
كنت متوقعاك كده يعني صعيدي و من قنا
حيكون شكلك ازاي
شعر اصفر و عيون زرقا و مناخير مسمسمة؟؟؟
حتى تبقى عار على الصعايدة الاصليين
الصراحة اختياراتك في الاغاني ساعات ترفعني السما و ساعات تهبدني الارض
بالذات صافيني مرة و جافيني مرة
معرفتش حتى افكر في اجابة طول ما هي شغاله لغاية ما سكت المرحوم
حد يحص اغنية طولها طول خطبة من خطب الرئيس المبجل
حرام عليك يا اخي
المدونة دي اضافت لي هم فوق همومي بالذات من بعد ما بقيت تنشر اخبار اضرابات العمال
توقعت من المدونة دي رفع الاذى عن المواطنيني بما انك الزعيم قال ايه المنتظر
و توقعت انك تديني الجنسية المصرية
و استريح من الهم اللي انا فيه ده
و اتوقعت انك توقف المتخلفين عقليا عن التعليق
وتوقعت ان برج السرطان يكسب فلوس كتيره
و توقعت حدوث هزة في اسعار البورصة
لكن معرفتش اتوقع لفوق و لا لتحت
بالنسبة بقى للسؤال الاخير
فانت اصلا بخست السؤال حقه
و لو انك فعلا رئيس عادل كنت اعطيت كل ذي حق حقه
و عليه فانت المفروض تكتب بوست بحاله لايقل عن متر طول و اتنين متر عرض و نجتمع فيه كلنا عشان نشوف ايه الطريقة المثلى للتحلص من جرجوري
و افضل طريقة هي ان ناخد من كل رجل قبيلة و نضربه ضربة رجل واحد فيتفرق دمه بين القبائل و متتعرفلوش دية
بس خلاص
السؤال الأول
رأيك في المدونه
والله المدونة زيها زي غيرها من المدونات مفيش فيها اختلاف في الشكل ...ولكن المضمون يا عيني انا على المضمون ..الصراحة يا عمر انا بحب مدونتك عشان كلامك كده من قلبك
السؤال الثاني
وقهوة امي
واسمع يا رضا حاجه كده اصل الاسماء صعبه عليا:)
وبتاعت بطوط عشان لسه فاكرة
اني حجبلك واحد
والمسرحية انا والفيزا هههههه
السؤال ثالث
تعليق من سيادتكم عندي
:)
السؤال الرابع
حضرتك اتكلمت في تدوينة قديمة انك شب اسمراني :)
السؤال الخامس
للاسف مش سمعت حاجه :(
السؤال السادس
بستمتع قوي وانا بقرأ كلها احاسيس صادقه وتصل للقلب
السؤال السابع
ممم مش لازم اتوقع حاجه من كل مدون انت بتكتب انت
ودا جميل وبكتب عن ميولك ان كان اخبار عمال ولا كورة
يعني مش شايفه انك لالزم تعمل اكتر من كده انت كده وردة :)
السؤال الثامن والأخير
صعب قوي السؤال الاخير عليا
:)))
أنا هاتكلم باختصار شوية
أولا أوافق إكرام إن الخليج هو الخليج العربي أيا كان وضع العرب حاليا
ثانيا مدونتك من المدونات التي أحب قراءة كل ما يكتب فيها لكن ما أحبه على الخصوص هو ما تكتبه عن نفسك
حيث تأخذنا بأسلوب جميل تجعلنا نعيش معك مع عمر وهو طفل أو وهو يمر بتجربة معينة والمشاعر الني تنقلها لنا تجعلنا نشعر بها كما لو أننا كنا معك
أما التخلص من جرجس فالمسألة
بسيطة
قله بس إن أقرب أصدقائك ضابط شرطة
أو في قرابة بعيدة بينك وبين حبيب العادلي
ها تلاقيه الصبح قطع كل العلاقات
السياسية والدبلوماسية
تحياتي
عم هنري
متشكرين يا زعيم
بقي كنت متوقع اني احط صور كده وكده ماشي مردودالك بس اما اشوفك
هههههههههه
وبعدين انا ما احلويتش ولا حاجه بعد الأبوه هي الصور بتكدب احيانا
شكرا بجد علي اهتمامك
-----------------------------
العزيزه إكرام
هما كانوا بيقولوها كده في الأغاني الوطنيه في الستينات
بس
وما تديش المسأله اكبر من حجمها
تحياتي
------------------------------
زنزانتي العزيزه
ألف شكر يا جميل
بعض ما عندكم والله
خطتك للتخلص من جرجس عبقريه ههههههههههه أحييكي عليها
عزيزي مينا
أيه يا ابني
انت قعدت تراجع
طالب مجتهد من يومك شايفين الجديه والتركيز في كل التفاصيل
أول ايا عزيزي اشكرك علي كل اللي انت قلته
ثانيا بخصوص المسرحيه
ان حقيقه يا مينا اتخنقت منها لسبب رئيسي وهو أنها قرأت علي نطاق واسع وأصدقائي من المسرحيين والمبدعين اتعاملوا معاها بجد زياده عن اللزوم وقعدوا ينقضوا فيها وفي مستواها الفني واللغه والبنيه والبؤره إلخ من الكلام اللي قلبك يحبهوطلعوا عين اللي خلفوني باعتبار ان النص ضعيف ولايرقي إلي مستوي كتابه عمر وانت فاهم بقي
فاتعقدت منها بصراحه لأن العيال ما فهمتش ان قصدي اهزر
بس يا معلم
عموما يا سيدي المسوده موجوده و ممكن تظبيطها من تاني يعني مافيش مشكله
أما التخلص من جرجس بالصيغه اللي فهمتها منك فهذا لا أوافقك عليه وإن كنت أشعر انك محتاج ترجع تروق تاني وتهدي أعصابك شويه وتكتب حاجات خفيفهلأن احنا افتقدنا ده بصراحه
تحياتي
المهاجر المصري
ههههههههه
إنت ما صدقت هو ده كل اللي همك في استطلاع الرأي انك ازاي تتخلص من جرجس
وبسم الله ما شاء الله دماغك يعني زي الفل وجبت أفكار عبقريه للدرجه دي انت بتعزه
تسلم يا معلم
سنبحث في أمر هذه الفكره وكيفيه تنفيذها بأسرع ما يكون
-------------------------------
عم الفارس
ميرسي يا زعيم
قعد سيح بقي ان انت اللي قومتها في دماغي
عموما كانت شوره ما يعلم بيها الا ربنا ما انا كنت زي الفل وشاري دماغي 24 قيراط
عموما اشكرك علي كلامك الجميل
وايه ده يا ابني
إنت كمان ما صدقت اني قلت نخلص علي جرجس
ههههههههههههههههههه
وبعدين أيه الأفكار دي كلها
ده انت ما خليتش وسيله ما قلتش عليها
هههههههههههههههههههههههههه
موتني من الضحك للدرجه انت بتحبه
عموما ما تستعجلش الدور في الاستفتا اللي جاي عليك
سلام
القهوه العاليه شخصيا في المدونه
يا دي الهنا اللي انا فيه
أولا نورتي المدونه
ثانيا
موتينيييييييييييي علي روحي من الضحك لما قريت الإجابه تونس
إفيه جامد الله يمسيك بالخير يا أشرف يا عبد الباقي
وكمان ضحكت جدا في إجابات الأسئله 3 و7 و8
واضح اني ما كنتش فاهمك قبل كده كويسواتضح ان جواكي حس كوميدي ما كنتش واخد بالي منه
ميرسي لردودك واهتمامك
توتا
طبعا انا ديمقراطي حد عنده اعتراض؟
يا رب يكون الكلام ده من قلبك يا ست الكل
علي فكره انا في اختياري للأغاني حطيت لكل واحد الأغاني اللي طلبها بس واضح اني كنت بغيرها بسرعه وما بتلحقوش تسمعوا بس وعد اني هنتبه لده بعد كده
اما هروبي من التاج فانا حاسس بصراحه ان انتم عارفين عني كل حاجه ممكن تتعرف واللي ما تعرفوهوش مش هينفع تعرفوه
بس
شكرا ليكي يا ست الكل
حفصه
هههههههههههههههههههه
الله يسامحك كده انا مدونتي شبه تصريحات الحزب الوطني
انا شامم ريحه سخريه من المدونه هعديهالك بس حسابي هيكون عسير لما اشوفك ههههههههه
موتيني من الضحك الله يفقرك
وبعدين بذمتك خلاص يعني هتتفتح ابواب الجنه لما تاخدي الجنسيه المصريه
ده احنا بقينا ملطشه يا بنتي
عموما فور قفزي علي السلطه سوف أحاول حل مشاكلك المعلقه
وبرج سرطان ايه ده اللي يكسب فلوس كتير
إنتي داخله المدونه علي طمع؟
كنت كسبتني انا فلوس وانا حالتي ضنك ولله الحمد
عموما اقتراحاتك بخصوص جرجس قيد البحث وسينال الجزاء الذي يستحقه بناء علي رغبتكم
العزيزه رشا
ميرسي جدا يا ست الكلانا مبسوط بكل اللي انتي قلتيه
وحزين انك ما بتسمعيش الأغاني
أتمني يكون الكلام ده من قلبك
وكده بتهربي من إجابه أهم سؤال
ماشي
بس ده متوقع منك عموما بسبب قلبك الطيب
تحياتي يا رشا
عمنا الكبير ابو ريشه
موضوع الخليج الفارسي لم يكن ابعد من نكته علي الطراز الستيناتي
أشكرك علي كلامك الجميل وسعيد باهتمامك
بخصوص اقتراحك للتخلص من جرجس جاري دراسته وبحث اليات تنفيذه
ضحكتني جدا باقتراحك
سلام يا أستاذي
وميرسي
ماشي ماشي... فرحانين أوي كلكم وبتعدوا الخطط للتخلص من الحاج جرجس وبتتواطؤوا مع الزعيم في خطته الشريرة للتخلص مني... آه يا أولاد الأفاعي... عليكم لعنة الفلاح من فلاح ابن فلاح... لن أرحمكم وسأريكم جميعا أنتم والأخ النديم - اللي انتوا عاملينوا زعيمكم - قسوة بطشي يا أفندية يا أراذل وسأريكم أن الديمقراطية لها أنياب... واهو زميلكم المدون الحنجوري مرمي في السجن زي الكلب... وأما الأخ نديم هذا فمن هنا وأمامك أقرر تجريده من كافة المناصب الرسمية - وغير الرسمية - ليعود مواطنا عاديا بين الجماهير... ولو طلعتوا وراه تقولوا له لأه لأه لا تتنحى - طبعا الهتاف الأصلي ما كانش كدة بالظبط بس عشان الرقابة - أنا ساعتها هحبسهولكوا مع أيمن وهاجيب لو السكر والضغط والفشل في كل الأجهزة الحيوية - وكل واحد يخلي باله من لا مؤاخذه أجهزته الحيوية - وساعتها برضه هابعت كلبين تلاتة من لجنة حموم الإنسان تروح تطمن عليه في سجنه والنتيجة هتطلع إنه كويس وزي الفل ومش طالع تلاتة دين أمه وكالعادة الموضوع هينطبخ زي الفل والمثل بيقول اربط المربوط يخاف السايب أو اضرب الراعي تتبدد الرعية... يعني اتطمنوا خالص... مؤامراتكم - يا خونة يا أوغاد - ستبوء بالفشل جميعا وأنا عندي أذكى جهاز مخدرات في العالم وبنعرف دبة النملة وأي متآمر فيكوا تحركاتوا كلها مكشوفة ومفضوحة أمام أجهوتنا المتطورة والتي تنافس أحدث تكنولوجيا حربية ومخابراتية في دول عريقة كالسنبلاويين والمنوفية وعين شمس الغربية سابقا الإسلامية حاليا... ويسقط يسقط النديم المستبد
ولنا لقاء آخر
الى الريس المفدى ... اسفة يا ريس على التاخير .. معلش بقى شقاوة شعب :):)و كمان محدش اداني خبر
و خليني اجاوب بقى و انا بسمع عيون القلب اللي طلع عينها سهر
8- بما ان ده اهم سؤال فلازم اخليه ينور في الواجه ...يمكن سيادتك تراف بحالي و تنجحني .. ياااه يا ريس .. انا كده عرفت انك فعلا بتفكر في شعبك الغلبان اللي جرجس طلع عينه نفر نفر .. بس مش عارفة ليه يا ريس انا حاسة ان حتى الموت مش هيرضى بجرجس .. كان ربنا بيقولنا هاسيبه قاعد على قلبكم و كابس على نفسكم و انا عارفة انه ابتلاء من ربنا و لازم نصبر على اللي بيعمله فينا و احب اقوله من هنا و اعلنها مدوية يا جرجس كفاية ده الشيطان جه يستشيرك في حاجة و لما سمعك قالك يا شيخ حرام عليك ... و اعتقد فعلا احسن علاج للتخلص منه زي ما قال حد قبلي .. نخليه يبطل كلام ثلاث ايام و المدة ده كفيلة بيه :):):)
1- هاقول ايه بس يا ريس على الديموقراطية ده كلها بس هاقولك ان مدنوتك من المدونات القلائل اللي بستمتع بيهم زي ما بستمتع بالشوكولا بالكراميل كده ... روقان اخر حاجة
2- المواضيع كتير اوي .. من ناحية بحب المواضيع اللي بتحسيسني اني لسه في مصر و مش بعيد عنها و بتخليني اشغل مخي .. من ناحية تانية كل المواضيع اللي بتندرج تحت بند تجارب ذاتية و انسانية و مش متخيل موضوع تررررم ده عمل فيا ايه هو و قهوة امي و لسه مستنية (( و مرة اخرى مع امي )) معانك نفضت لتفسير الحلم اللي سبته ليك :):) بس عادي ريس و من حقك تدلع براحتك
3- دلوقتي حاسة كأنك بتقولي هل لك شركاء اخرين و ايه اسم الخلية اللي بتنتمي ليها .. توصلت لها يا سعادة الباشا عن طريق الرفقاء فارس و جرجس الاجلاء
4- الحقيقة يعني يا ريس اول ما عرفتك كنت شفت صورتك فا مكنش في وقت اتخيل و بيني و بينك انا بطلت اتخيل من زمان .. تجنبا لأي صدمات :):):)
5- انت صحيح مش حطيت اغاني انا طلبتها او يمكن حطيتها و مش لحقت اسمعها .. بس اجمالا انا بحب معظم الاغاني اللي بتحوطها .. و عجباني اوي كل يغني على ليلاه
6- أضافت كل خير الحمد لله و على راي المثل خير الكلام ما قل و دل :):)
7- زي ما قال الدكتور الهمام تخصص الولادة الجزء التالت من الملحمة الشعبية ... بس انا بجد بقى احتمال اخد منك المسودة او اصورها حتى .. قولي انت بس فين موقع الامبراطورية و هتلاقيني عندك من صباح الله خير :):)
مقدمته لسيادتكم ريكا بنت ام ريكا و جعلكم الله ذخرا للوطن النتظر ايها الريس المنتظر
ممكن اسمع ابو الطاقية الشبيكة لعفاف راضي
هابي فالنتين يا زعيم يا تري هتجيب لي ورد النهاردة؟ بما انك اكلت الشيكولاتة امبارح؟
بالعند ف جرجس مفيش حد يقدر طبعا يجردك من منصبك
قولت لك يىلا ننفذ الخطة العبقرية للتخلص من جرجس
مستعدة اكون متطوعة وممكن استدرجه
ههههههههههه
بسم الله الرحمن الرحيم
استعنا علي الشقي بالله
عزيزي قناوي تحية طيبة و كل عيد حب و انت طيب و ما تنساش تروح بالورد او الفجل و الا حتنام علي السلم
الاجابة :
السؤال الاول ....احتفظ بالاجابة لنفسي
السؤال التاني ....اقضل موضوع قرائتى هو الموضوع الذي لم تكتبة بعد فالي انكتب انكتب و الي انقراء انقراء يجبي الافضل الي لسة ما اتكتبش
السؤال الثالث ... توصلت للمدونة عن طريق عملي الرضي في حياتي فارس ابو نور و اكرم طبعا يعني الطيور علي اشكالها تقع
السؤال الرابع .....هو كان وصفك ليا و الوفص انت عارف صاحبك بيبقي فية استاذ بس عموما مصري اصيل حتي النخاع شكلا و موضوعا
السؤال الخامس ....اختيارك للاغاني يعجبني جدا و خصوصا انة يطابق مصريتك الاصيلة و كل اغنية ليها دلالة و ارتباط بالموضوع يعني موش بتتكلم عن الاضرابات و مشغل روبي
السؤال السادس....بالتاكيد اضفت شيء لانها لو لم تضف مكنتش دخلتها تاني
السؤال السابع .....لا يوجد لة اجابة معينة عندي
السؤال الثامن ....افضل طريقة للتحلص من الحاج جرجس همممم دة بقي يا ابني صقة لوحدة عموما الحلول كتيرة
ممكن نحبسة مع فارس و الجوز يخلصوا علي بعض و نبقي ضربنا عصفورين بحجر واحد
ممكن نبلغ عنة امن الدولة بانة عميل و خائن بيكرة الرئيس و علاء باشا و هما حيقوموا معاه بالواجب
ممكن نبلغ عنة الجامعات الاسلامية انة هو دة المخبر الي بيوديهم في داهية
او نبلغ عنة الاخوان المسيحين انة مسلم اوسوزوكس و عامل فتنة طائفية و برضة هما الي حيتصرفوا معاه
و احلا حاجة بقي حتة افيون او حشيش و نبلغ عنة و هو قاعد في امان يجوا ياخدوة هما و يتصرفوا معاه بطريقتهم
لاكن لو عاوز الي فيها الشفاء بقي نحبسة في حجرة فيها صورة الي بالي بالك و بس دي لوحدها خجيب اجلة في لحظات
بالنسبة للإخوة المدونين والأخوات المدونات اللي كل واحد بيبتدع طؤيقة مبتكرة للتخلص من الحاج جرجس - اللي هو أنا يا كلاب - عاوز أفكركم إن أنا اسمي الحاج جرجس مش محمد حسني مبارك... وإني لم أكن مسئزولا عن الأزمة الاقتصادية اللي انتوا فيها ولا عن العنوسة التي تعانون منها - وأنا معكم بالطبع - ولا كنت أنا السبب في انحطاط التعليم وتدهور الصحة ولا كنت أنا المسئول عن المسامير اللي بتلاقوها في العيش ونشارة الخشب اللي بتلاقوها في سجاير الكولوباترا البوكس ولا أنا اللي رفعت سعر قرش الكابوتشينو وخليتكوا تلجأوا للبانجوا المعفن اللي لحس دماغكوا... مش أنا اللي بنيت لكوا الكباري وذليت أمكوا إني بنيتهالكوا - وبالمناسبة يا كلاب الكباري عشان تعدوا من فوقيها مش عشان تفكوا زنقتكوا تحتيها - ومش أنا اللي عملتلكوا سكك حديد تموتوا فيها ولا قصور ثقافة تتحرقوا فيها ولا عبارات تتنيلوا ياكلكوا السمك فيها... مش أنا اللي سمحت لكوا بالهوهوة والنباح وفي نفس الوقت باسيبكوا تموتوا منقوطين ومش أنا اللي عملت أول طلعة جوية فتحت لكوا باب الحرية وقفلتوا عليكوا بعديها عشان تفضلوا محبوسين في سجن حريتي الوسيع الفضفاض اللي من وسعه سايع كل بني آدم بيتنفس في هذا البلد... وطبعا ما كنتش أنا اللي قتلت اخواتكوا السودانيين أمات ريحة وحشة ولا كانت غباوتي هي السبب في إنهم يردوا لكوا الضربة بتطليع دين أم 28 مصري في السودان الشقيق وعلى أيدي شرطتهم الشقيقة... ومش أنا اللي هربت 240 مليار دولار إلى بنوك سويسرا عشان أستورد لكوا بيهم شيكولاتة بالويسكي - طبعا بتسألوا على الشيكولاتة... اتصادرت في المطار - وهكذا يا شباب المدونين أجد أنكم قد أخطأتم خطأ شنيعا إذ أسقطتم كل غضبكم وغيظكم على شخصي المسكين الضعيف وسايبين المتهم الحقيقي بكل هذه الجرائم.... وطبعا عارفينه... أول حرف من اسمه.... عمر قناوي
نياهههههااااااا
الحاج جرجس
نعم يا حبيبي أيه لعنه الفلاح دي؟
وبعدين انت عارف اني صعيدي ماليش علاقه بالفلاحين
يا عدو الديمقراطيه سيب الناس تعبر عن إعجابها بيك بطريقتهم يا أخي
شايف انت قد ايه محبوب
الناس ما صدقت وكل واحد قاعد يبتكر ويبدع في الطريقه المناسبه
لأ محبوب محبوب فعلا ههههههههههههه
يا نهار اسود
أمال لو قلتلهم يفكروا في طريقه للتخلص من الزغلول والا ابنه كانوا قالوا ايه؟
سلام
----------------------------------
ريكا
يا بنت الأيه
فعلا لفتي نظري ان العالم الأخر نفسه ممكن يرفض استقبال جرجس
هههههههههههههههههه
موضوع الشيطان موتني من الضحك
عاجباني ردودك واضح انك مذاكره كويس وغالبا هتدخلي التصفيات النهائيه واحتمال تكسبي الجايزه هههههههه
علي فكره موضوع خبز أمي وباقي أجزاءه مستني بس الإلهام ينزل وحضرته مش راضي يشرفني
ميرسي ليكي جدا وما نتحرمش منك يا افندم
علي فكره بخصوص الحلم انا كنت طلبت منك تحكيه بالظبط عشان افسره بس انتي كبرتي
زنزانه
حاضر هسمعك عوج الطاقيه
إنتي تؤمري
وبعدين بتعايريني بالشوكولانه؟
يعني هو انتي يا اختي اللي كنتي جايباها
ده غلب ايه اللي الواحد فيه ده
عموما يا ست الكل اوعدك اني اجيبلك ورد في اقرب فرصه اشوفك فيها
سلام
--------------------------------
عمنا ياسر عوف
يا عيني علي الإجابات الحكيمه
ميرسي يا زعيم علي الكلمتين الكويسين دول عموما انا متفق معاك ان صديقنا ابو الفوارس عامل زي العمل الردي انا مش فاهم احنا ليه ما نتخلصش منه هو كمان
إقتراحاتك للتخلص من جرجس عبقريه
عجبني فيها حاجتين بالأساس
الوا اننا نحبسه مع الفارس ونسيبهم يخلصوا علي بعض
أو نحبسه مع صوره الزغلول الكبير
انارأيي نحبسه مع الفارس في أوضه فيها صوره الزغلول الكبير
أيه رأيك؟
سلام
الحاج جرجس
يا سلام يا اخويا
واحنا أيش ضمنا
مش يمكن انت السبب في كل البلاوي اللي احنا عايشين فيها دي
وبعدين الناس كلها بتقول وكتب التاريخ كمان بتقول ان البلد دي اتوكست من حوالي 30 سنه
يعني تقريبا من ساعه ما حضرتك شرفت في الدنيا صح
لا تتهرب من مسؤوليتك يا جرجس
واديك شايف بنفسك محبه الناس ليك عامله ازاي
سلام
انت فية حاجة معفرتة عندك انا كتبت تعليق دلوقتى ممكن تدور علية فى البنطلون الجايزة
عزيزي المريض النفسي
كتبت الموضوع فين يا زعيم انا مش شايف حاجه
ههههههههه
تحياتي ونورت المدونه
Post a Comment