فاطمه وماريكا وراشيل

لما قلت اني هتكلم عن صحابي المدونين حسيت اني وقعت نفسي في ورطه
مش لأني لا سمح الله خايف ان حد فيهم يزعل من اللي هقوله مثلا أو حد يتضايق اني ما جبتش سيرته لا قدر الله
أبدا
بس المشكله اني حسيت ان كلمه صحابي المدونين هي كلمه فضفاضه مش معبره تماما عن اللي عايز اعمله

يعني مين هما بالظبط صحابي المدونين؟

هل هم أصدقائي في الحياه العاديه والواقعيه إللي عندهم مدونات؟

ولا هما اللي اتعرفت عليهم من خلال مدوناتهم بعدين بقينا صحاب؟

ولقيت الموضوع كبير قوي خصوصا اني اعرف حوالي تسعين واحد مدون
وبعدين ؟ تعمل ايه يا ابو النديم؟

بصراحه قررت ما اعملش أي حاجه خالص

أنا قلت اسيب القلم هو اللي يتكلم أو هو اللي يكتب براحته خالص من غير ما اتدخل ويعمل اللي يعمله

فارس أخير أولا لأنه هو اللي شجعني علي دخول هذا العالم
أي حد يعرفني ويعرف فارس أخير مستحيل يتخيل اننا ممكن نبقي اصحاب لأكتر من سبب
أولا انا يساري وهو رأسمالي متطرف ومش كده وبس هو بيحب السادات جدا وشايف انه عبقري ما حدش قدر يفهمه وانا شايف ان اللسادات مسؤول بشكل مباشر عن المصيبه اللي البلد دي فيها ع الأقل كفايه ان هو اللي جاب لنا حسني مبارك


لكن بعيدا عن ذلك وبعيدا عن الأيديولوجيا تماما اللي هي مش كل حاجه في العلاقات الإنسانيه انا بحب الفارس الأخير لسبب رئيسي وهو انه ابن بلد بجد إختلف او اتفق معاه للصبح وممكن تتضايق من بعض سلوكياته وده عادي لأن كلنا بغلط بس علي الأقل هو الصديق اللي تلاقيه جنبك في أزمه ودي حاجه مش قليله


الحاج جرجس بقي حدوته لوحده وحقيقه يعني سبحان الله اللي عرفني عليه كان فارس قديم رغم انهم ينطبق عليهم المثل اللي بيقول (أنا وديكسان مش ممكن نجتمع في مكان ) بس الواد جرجس ده لما قابلته وبقينا صحاب حسيت ان البلد دي زي جراب الحاوي بالظبط مليانه ما بتخلصش

جرجس كان اكتشاف بالنسبه لي بحكم خبرتي الطويله وسط المثقفين كنت ابتديت اصدق انه خلاص ما فيش في البلد غير التلتميت مثقف اللي واحد عارفهم في البلد دول وان ما فيش حاجه جديده او حد جديد
بس جرجس كان مفاجاه بكل المقاييس

ثقافه وقدرات تحليليه مذهله وحب حقيقي للبلد اللي اسمه مصر وشجاعه وحس إعلامي مدهش
هو صحيح رغاي حبتين بس هنعمل ايه بختنا كده

انا طبعا ما بتكلمش بتفصيل لأني لو اتكلمت بتفصيل عن كل حد من دول مش هنخلص
توتا كمان حكايه انا كنت بشوف تعليقاتها في المدونات وبعدين في يوم كده لقيت الأخ فارس بيكلمني وبيقوللي انت فين ؟ قلتله في الإمبراطوريه قاللي طيب انا جايلك معايا مدونه مفاجاه

وكانت توتا مفاجاه فعلا جمال مش طبيعي وحضور طاغي شخصيه من النوع اللي ما تقابلش زيه في الستات كتير
منتهي الذكاء اللي في الدنيامن النوع اللي تحس انه لو عمل أي حاجه هينجح فيها حتي لو قررت تفشل مش هتعرف لأنها هتبقي أجمل فاشله في الدنيا

إكرام العراقيه صعب اتكلم عن إكرام كل ما افتكرها أفتكر أغنيه الشيخ إمام عيسي (دار الفلك ) وخصوصا المقطع اللي بيقول فيه (وانت العليل تيجي الأطبا وتسألك ) إكرام عايشه في العراق وعندها مشاكل الدنيا والأخره بس سبحان الله علي خفه الدم والبساطه وتجاهل المأسي وسيبك من أي حاجه انا ممكن اتكلم عنها لغايه بعد بكره بس كله كوم وصوتها موضوع تاني
أول مره اتكلمنا فيها في التليفون ما استوعبتش ان في صوت بالجمال ده في العالم


كلامي عن اصحابي المدونين ما خلصش طبعا لأ ده لسه حلقات وحلقات لسه زنزانه وزكي ومحمد عبد الغفار وعشتار ورشا وريكا و شهروزه لكن سمبتيك وسمسمه وياسر نعيم وإبيتاف وغيروا وغيروا

ومع النديم ذلك أفضل جدا