قوات الأمن تطلق سراح بعض المعتقلين

ذكر موقع الحركه المصريه من أجل التغيير كفايه أن قوات الامن أفرجت عن 12 ناشطا ممن كانوا قد اعتقلوا عصر الخميس من مظاهره القوي الوطنيه بالتحرير
ويتوقع ان يتم الإفراج عن باقي المعتقلين تباعا

عموما أثبتت كفايه بما فعلته اليوم انها حركه حيه فعلا من المستحيل إجهاضها فالحركه التي بدأت نشاطها السياسي قبل عامين تقريبا تمكنت خلال هذين العامين من الاستمرار والنشاط الفاعل في الشارع وفضح ممارسات النظام المصري دوليا وأمام العالم بأكمله رغم الحصار الأمني لها باستمرار والذي وصل في بعض الأحيان إلي حد تعذيب الكثيرين من نشطائها

والمعركه مستمره
وسيسقط نظام حسني مبارك

الصوره أعلاه هي للدكتور والمفكر الكبير عبد الوهاب المسيري أثناء المظاهره

تحديث لأخبار الاعتقالات

علمت مدونة النديم من مصدر داخل الأحداث أن عدد المعتقلين قد وصل الى 23 متظاهر

و من الأسماء التى تأكدنا من خبر اعتقالها , بالأضافة الى خالد عبد الحميد الذى تم ذكره فى الخبر السابق

1-على عبد الحميد
2-محمد اسماعيل
3-محسن سميكه
4-وائل نظمى
5-محمد عبدالله
6-بهاء صابر

و هناك اثنان من المعتقلين لم نستطع الحصول الا على أسماؤهم الأولى , نائل , و رامى

و تتردد أنباء عن عزم المتظاهرين الأعتصام فى موقعهم حتى الأفراج عن المعتقلين

خبر عاجل , اعتقالات فى صفوف المتظاهرين

اعتقلت قوات الأمن أعدادا من المتظاهرين فى مظاهرة القوى الوطنية المصرية ضد التعديلات الدستورية

و تجرى الآن المظاهرة فى ميدان طلعت حرب , المحاصر بمئات من جنود و ضباط الأمن المركزى , و كلاب مباحث أمن الدولة , المشرفين على عملية اعتقال الوطنيين المصريين

و قد تأكدنا من اعتقال خالد عبد الحميد القيادى بحركة كفايه

و سنوافيكم بباقى التفاصيل تباعا

يسقط يسقط حسني مبارك

النهارده بعون الله مظاهره المعارضه المصريه في ميدان التحرير ضد التعديلات الدستوريه التي يريد ان يفرضها نظام حسني مبارك وعصابته

مدونه النديم تدعو كل من يقرأ هذه السطور إلي التوجه إلي ميدان التحرير في تمام الخامسه مساء لإعلان رفضنا لهذه التعديلات والتي ستجعل من حياه المصريين كابوسا (أكتر ما هي كابوس أصلا ) وأعلي ما في خيلهم يركبوه

وليكن هتافنا جميعا
يسقط يسقط حسني مبارك

وهيسقط قريبا غصب عن عين أم اللي خلفتهم

وقف الشريط في وضع ثابت

أفنيت عمرك في الوظيفه لم تغتني

وخرجت منها يا مولاي كما خلقتني

معلش يا زهر

عاجل إنفراد صحفي كبير للحاج جرجس

في خبطه صحفيه من الطراز الاول إنفردت مدونه كفايه حرام والمشهوره بمدونه الحاج جرجس بلقاء حي مع الدكتور أيمن نور صوت وصوره يمكنكم ان تتابعوها هناك


مدونه النديم تبارك للحاج جرجس هذه الخبطه الصحفيه التاريخيه التي تفوق بها علي اكبر المؤسسات الصحفيه في العالم كله وأكد بها تميزه المهني المبهر

ومدونه النديم إذ تبارك هذا النجاح الكبير لجرجس لا تنسي ان تذكره بالمثل الشهير


علمناهم الشحاته
سبقونا ع الابواب
هههههههههههههه


الف تحيه للحاج جرجس

كان عمري عشرين

لم يكن هذا أبدا هو ما حلمنا به
في الطفوله نعتقد ان الحياه منحه وهبه إلهيه بديعه ان السماء المزينه بالنجوم والورود ستظل هكذا ان الغيوم والامطار ستكبر معنا وأننا سنظل دوما نري في السحاب ما نحب ان نراه وجوه الأحباء أو ضحكتهم
ستكبر معنا الامطار ايضا تصير ثلجا أبيض يتساقط بهدوء ونعومه فوق سطح منزلنا وعلي وجوهنا
سنظل دوما نغلق أعيننا قبل النوم بساعات فقط لنفكر في الفتاه التي نحبها
سيظل أصداقئنا أصداقئنا والغرباء غرباء عنا
وستظل فيروز تدهشنا
سنحيا آمنين إلي الأبد


في المراهقه نبدأ في التذكر
أن تتذكر فأنت في عالم اخر ومختلف لا احد أبدا يتذكر عالم يحيا فيه نحن دوما نتذكر ما هو بعيد عنا
في المراهقه يبدا الاختيار وربما ينتهي أيضا لا استطيع شخصيا ان ألمح اي فارق بيني كمراهق و والان


ارجع للعاميه بعد إذنكم

في طفولتي كانت السما هي الموضوع السما بنجومها وشمسها وقمرها سحابها ومطرها في المراهقه كان الشارع هو البطل
الشارع بمعناه الواسع صحابي والبنات الحلوين التروماي والشعبطه في الاوتوبيسات سينما مصر وسينما سهير والأفلام التركي واول مظاهره اروحها بمزاجي واختياري سنه 1990 واتضربنا والحمد لله
المراهقه كانت حميد وإيهاب وعمرو دياب ومصطفي قمر وحسام حسني ولولاكي
المراهقه كانت نطرونا كتير وراجعين يا هوي راجعين وسهر الليالي وقال الفيلسوف وتسجيلات من زمن فات وقهوه ع المفرق وغواص في بحر النغم
المراهقه كانت الأحلام الكبيره الواثقه من نفسها


راحت المراهقه
وانتهت الأحلام كبيرها وصغيرها

ولكن شيئا ما يبقي

يا قرص شمس ما لهش قبه سما
يا قوس قزح في الأرض شب ونما
يا كل معني جميل وعينا عليه
الخلق ليه عايشين حياه مؤلمه


ما اعرفش

ما فيش فايده

حتي الفرخه اللي جاتلي هديه

أصرت علي التعبير عن موقفها في الحياه وإرسال رساله رمزيه مباشره للعبد لله

بلدنا

وحشاني يا قنا

يا مارق ع الطواحين

لم اكن أنوي ابدا الاقتراب بالكتابه عن هذا الرجل فالمساحه التي يحتلها في قلبي أكبر بكثير من قدره القلم عن التعبير عنها وأنا أخشي تماما من الكتابه عمن احبهم بشده
في أي مجال أو حقل إبداعي او غير إبداعي يوجد دوما شهداء لقضيتهم شهداء اعطوا للمجال الذي أخلصوا له اكثر بكثير مما أخذوا منه ولم ينالوا حقهم الكافي من التقدير والغريب ان هذا التقدير يكون عاده لدي هذه النماذج هو أخر ما يبحثون عنه ولعل هذا تحديدا هو ما يحولهم إلي أساطير

إنه نصري شمس الدين المطرب اللبناني الجميل والعظيم والبطل الدائم بجوار فيروز في كافه أعمال الرحبانيه الموسيقيه والمسرحيه والسينمائيه أيضا أشهر (مختار ) او عمده في تاريخ الدراما العربيه وأجملهم طبعا بملامحه التي تحمل الحده والجديه في جانب والطيبه والمسؤوليه في جانب اخر
كان العالم الرحباني بالنسبه لشخصي المتواضع هو العالم المثالي الذي أحلم به دوما (ضيعه ) أو قريه صغيره أهلها بسطاء ومتعاونون مشاكلهم بسيطه لأن حياتهم نفسها بسيطه وكلهم بيغنوا ويرقصوا وبالليل يسهروا يحكوا حواديت عند بيت المختار صوره رائعه رسمها الرحابنه باقتدار للضيعه اللبنانيه
هذه الضيعه كان نصري هو اجمل مفرداتها بصوته القوي المهيب والناعم في ذات الوقت وملامحه القويه التي تحمل شموخا واضحا وإحساس كبير بالمسؤليه والطيبه في ذات الوقت تحس انه اب للضيعه كلها علي فكره كان دايما بيفكرني بخالي ملامحمهم قريبه من بعض جدا والغريب ان خالي في بلدنا في قتا برضه هو كبير البلد والناس ملمومه حوالين قعدته المسائيه علي دكته المهيبه في ساحه شديده الشبه تماما بالأجواء الرحبانيه بالمناسبه قريتنا علي بعضها تبدو كانها جزء من العالم الرحباني بسبب طبيعتها الجغرافيه البديعه

بدا نصري شمس الدين مسيرته الفنيه في نهايه الأربعينات والغريب ان بدايته كانت في مصر لكنه قرر العوده سريعا إلي لبنان حيث شعر ان مكانه الحقيقي هو لبنان وليس مصر وهناك التقي مع المبدعين العظيمين عاصي ومنصور رحباني الذين كانا يبلوران مشروعا فنيا ضخما عماده هو المسرح الغنائي وكان نصري هو البطل الذي يبحثون عنه تماما ليقف بجوار فيروز لتبدا تجربه فنيه من اجمل وأقيم ما قدمه المسرح الغنائي العربي عبر تاريخه
وفي هذه الأعمال لا يمكن لأي منصف ان يغفل دور نصري في نجاح التجربه عامه لا يمكن ان تتخيل ان نصري لم يكون موجودا في هذه الأعمال بصوته المميز والعبقري وطربوشه وشنبه وخفه دمه فرض نصري نفسه ضلعا رابعا أساسيا في التجربه الرحبانيه فالغريب ان الجميع يصر ان اضلاع التجربه كانوا ثلاثه هم عاصي ومنصور وفيروز لكن ما اراه وأعتقده ان اعمده التجربه كانوا أربعه وليسوا ثلاثه
وطوال عشرين عاما ظل نصري البطل الدائم بجوار فيروز وقدم مئات الأعمال الغنائيه الناجحه والبديعه والتي تري من خلالها جبال لبنان ووديانه وثلوجه وأشجاره
كان نصري شديد الطيبه والتواضع لم يكن يقدر نفسه حق قدرها ابدا كان فخورا وسعيدا بالمساحه التي اعطاها له الرحابنه في مسرحهم وأعمالهم الفنيه وكان يري نفسه فقط باعتباره جزء صغير من مشروع كبير ولم يكن يدرك انه احد اهم اعمده هذا المشروع لكبير لم يكن يناقش عاصي ومنصور ابدا فيما يقررونه ويؤدي كما يطلبون منه ان يؤدي برضا تام ولعل ما لا يعلمه احد تقريبا ان اغنيه (نسم علينا الهوي ) أشهر أغاني فيروز كان نصري هو الذي سيغنيها أصلا لكن عاصي تدخل في أخر لحظه وقرران تغنيها فيروز ورضخ نصري لطلب عاصي وتركها لفيروز لكنه ظل حتي مماته حزينا بسبب هذا الموقف فقد كان يتمني ان يغني هو هذه الأغنيه تحديدا لكنه تركها لرفيقه دربه الفني فيروز والأغرب ايضا انه بكي في إحدي المرات حينما سأله صديق له عن هذه الواقعه

وتفكك المشروع الرحباني في نهايه السبعينات بانفصال عاصي عن فيروز و وجد كل واحد من اضلاع التجربه نفسه يسير بمفرده وفي العام 1983 وقف نصري علي المسرح في دمشق لأول مره بدون فيروز وامتلات جوانب المسرح بعشرات الألاف من المتفرجين الذين اتوا من كافه البلاد العربيه ليستمعوا إلي نصري الذي لم يكن يتخيل انه يحتل هذه المكانه في قلوب الجماهير وصعد إلي المسرح في ظل تصفيق مدوي لم يتحمله قلبه وشخصه البسيط المتواضع
فمات علي الفور
وعاد الجثمان إلي لبنان ليدفن هناك وسار ألاف اللبنانين خلف النعش وارتفع صوت الاذان من المساجد ودقت اجراس الكنائس في وقت واحد في مشهد بديع تكريما للراحل العظيم


النهارده ذكري رحيل نصري
طبت حيا وميتا يا مختار المخاتير

من سيربح البنطلون

أعزائي المستمعين جمهور مدونه النديم في كافه أنحاء المخروبه
يسر مدونه النديم (المدونه التي لا تغرب عنها الشمس ) أن تدعوكم للمشاركه في استفتائها الأول بمناسبه مرور سته أشهر علي انطلاقها
وكما تعلمون طبعا أن الهدف الأول من هذا الاستفتاء أو استطلاع الرأي هو حرصي الدائم علي تطوير المدونه إرضاء لجمهوري الحبيب من المحيط الأطلسي إلي الخليج الفارسي
حريه التعبير طبعا مكفوله للجميع إنتوا عارفين اني ديمقراطي
واللي هيغلط ويقول رأي ما يعجبنيش مش هزعل طبعا
بس رجالتي هيتعاملوا معاه بالطريقه بتاعتهم
ولكم جزيل الشكر
السؤال الأول
ما هو رأيك في هذه المدونه امامك اربع اختيارات
ممتازه
رائعه
ماحصلتش
أدي المدونات واللا بلاش

السؤال الثاني
ما هو أفضل موضوع قرأته في هذه المدونه

السؤال ثالث
كيف توصلت إلي المدونه؟

السؤال الرابع
قبل ما تشوفوا صورتي وطلعتي (البهيه ) كنتم متخيليني عامل ازاي

السؤال الخامس
ما رأيك في اختياراتي للأغاني

السؤال السادس
هل أضافت لك هذد المدونه شيئا ولا قلتها احسن؟

السؤال السابع
ما الذي كنت تتوقعه من هذه المدونه ولم يتحقق

السؤال الثامن والأخير

ما هي أفضل طريقه في رأيك للتخلص من الحاج جرجس ؟

ولكم مني جزيل الشكر مع ملاحظه ان الإجابه عن الأسئله إختياريه ما عدا السؤال الأخير إجباري

لو كان ابوها سماها تررررررررم

من كام يوم قابلت واحد من صحابي القدام القدام قوي كنا جيران كان ساكن في العماره اللي جنبنا وكان معايا في المدرسه في اعدادي وثانوي بعد السلامات المعتاده في مثل هذه المواقف قعدنا مع بعض في مكان وابتدينا ناخد وندي مع بعض ونستكشف كل واحد فينا وصل لحد فين وبيعمل ايه وسألته عن باقي الجيران والأصدقاء وعرفت منه أخبارهم تقريبا لم يشذ أحد منهم عن المسار المتوقع له باستثناء شخص واحد
كانت جارتنا وفي سننا بنت من أجمل ما يكون معروفه في شارع مصر والسودان كله بسبب جمالها اللافت للنظر كانت حلم كل شاب وفتي في الشارع سواء من جيلنا أو الجيل الأكبر مننا بشويه ويا سعده يا هناه اللي تضحكله أو تقف معاه شويه ويا سلام بقي ع اللي صحابنا يشوفوه وهو واقف معاها يمشي يتفشخر قدامهم زي الديك المنفوش
كنت زيهم طبعا من الموهومين بجمالها لكني لم أسعي أبدا لأي محاوله اقتراب منها طبع فيا طول عمري ما بحبش الصداع ولا اللمه علي الحاجه اللي الناس تتلم عليها ما احبش اقف في طابور أيا ما كان نوعه او شكله لكن الغريب أنها هي التي سعت تقريبا للتعارف معي مش ناسي الموقف أبدا
كنت مع صحابي في مكتبه الطفل قاعد بشرح لهم برنامج الأنشطه اللي عايزين نعملها جات ووقفت وانا بكلمهم وبصت باهتمام والظاهر كده اني رميت إفيه ع الطاير فضحكت قوي وبصت لي وضحكت وبصيت لها وضحكت وكملت اللي انا فيه
مشاعري يومها ما تتوصفش وما تتنسيش دي ضحكت لي يا جدعان قعدت مش فاكر قد ايه وانا في حاله غير مسبوقه من السعاده الحقيقيه واتعرفنا علي بعض بعدها صحيح طبعا بحكم الجيره كنا عارفين أسامي بعض بس كانت أول مره نقف ونتكلم مع بعض مشاعر مش طبيعيه (مني طبعا الله أعلم كانت مشاعرها ايه) بس عموما انا ما قلتلهاش حاجه لأني زي ما قلتلكم بشتري دماغي
عزلت انا من الحدايق وانا في أول ثانوي وفضلت اشوفها طشاش لأنها كانت في المدرسه اللي جنبنا لا بسلم ولا بتكلم إلا نادرا بابتسامه عابره وسؤال منها عن أحوال السكن الجديد وشكرا
راحت الايام وجات الايام وقابلتها من خمس سنين في شارع قصر النيل واقفه تتفرج ع الفتارين ندهتلها بصتلي وضحكت وسلمنا علي بعض بحراره عزمتها علي فنجان قهوه عندي في المكتبه رحبت وجات قعدت معايا شويه شربنا القهوه ودردشنا شويه وقعدنا نفتكر في أيام الحدايق ومشيت بعد ما خدنا تليفونات بعض
حسيت بحاجه ؟ أيوه حسيت بحاجه زي لسعه برد في عز الحر انتعاشه مفاجئه و لقيتني ساعتها رجعت من تاني عيل في ثانوي بينط من علي سور المدرسه
كلمتني بعدها بتلات ايام صوتها فيه نفس الدلع القديم اتبسطت بس حسيت ان الدلع ده مش لايق عليها النهارده كنت نسيت في المقبله اعرفها اني خاطب بس عرفتها في التليفون وما اتصلناش ببعض تاني
ولما قابلت صاحبي من كام يوم سألته عنها وهي فين دلوقتي وفاجئني انها ما تجوزتش ومكتئبه وما بتشتغلش سألته ازاي قاللي ما تفهمش
وما فهمتش

الإضرابات تشتعل في البلاد

مصانع البيضا والحرير الصناعي إنضما إلي قائمه الشركات التي أضرب عمالها عن العمل كما أضرب العشرات من سائقي الشحن عن العمل بعد رفع رسوم عبور الوزن الثقيل من 110 جنيهات إلي 550 جنيها

والصوره للسائقين أثناء اعتصامهم

نقلا عن الوفد

الإضرابات العماليه تتصاعد

إستمرار لموجه الاعتصامات التي تضرب البلاد أعلن قرابه 11 ألف عامل بمصانع كفر الدوار للغزل إضرابهم عن العمل
والمدونه تعتذر عن عدم قدرتها علي موافاتكم بالتفاصيل
لأننا ما بقيناش ملاحقين بصراحه ولا بقينا عارفين عدد المصانع والمؤسسات المضربه عن العمل

شدي حيلك يا بلد

الصوره نقلا عن جريده الوفد

بياع الهوي راح فين

بعد طول حيره في اختيار موضوع للكتابه وبعد أن كنت قد بدأت الكتابه فعلا تراجع القلم فجأه عما كان يكتبه وقرر الكتابه عن
محمد عبد المطلب
عبد المطلب هو واحد من أكتر المطربين المحببين إلي قلبي تقريبا ما ينفعش يعدي يوم من غير ما اسمعله حاجه إنتوا عارفين اني كلاسيكي جدا في السمع وأخر حاجه وصلتني في المزيكا واستقبلتها نسبيا كان الجيل بتاع حميد الشاعري

بخصوص عبد المطلب بقي لن تجد أبدا أي شخص سميع بمعني الكلمه لا يحب هذا المطرب ويحمل له تقديرا كبيرا انا شخصيا بحس لما بسمعه اني اتحدفت بعيد بعيد قوي في المكان والزمان بحس دايما اني شايف مصر في الثلاثينات والاربعينات من خلال صوته بحس اني ماشي في شوارع السيده زينب والحسين وموالدهم في وسط جو وحاله أربعينيه بحته ورش نجارين وحدادين وقهاوي شعبيه وعيال بتلعب في الحاره حاره مصريه صميمه بأهلها الطيبين والمتعاونين والشرفاء مش الحاره المشوهه بتاعت دلوقتي وبحس اني متشعبط علي تروماي قديم راكب ع السبنسه ورا مع بقيت عيال في سني وقاعدين نحدف الناس بالطوب ونضحك
حقيقي ما اقدرش اشرح لكم ايه الرابط بين عبد المطلب والشعبطه ع التروماي ما اعرفش بس غالبا لأن صوته بيفكرني بالأماكن الشعبيه الأصيله زي الحسين والعباسيه والسيده وانا ولله الحمد كان من ضمن هواياتي وانا طفل هوايه الشعبطه ع التروماي
انزل من بيتنا المغرب واروح لصحابي اللي ساكنين في العباسيه وهوب نط يا عم علي أول تروماي يقابلنا وبينا علي السيده
طبعا ما كناش بنركب جوه التروماي لأ كنا بنتقعد علي الحديده اللي ورا اللي بيسموها السبنسه قطعه من الحديد علي شكل نصف دايره تتيح لعدد 4 أإو 5 أشخاص الجلوس عليها بشكل مريح نسبيا كانت متعه ما بعدها متعه ولن يعرف قيمتها إلا من جربها في يوم ما قاعد حضرتك منك للشارع لأ ده انت في الشارع فعلا قعده ملوكي والله العظيم والتروماي بيتحرك بيهوانت قاعد تعاكس في خلق الله وتتعرف علي بقيه الزملا اللي متشعبطين زي حضرتك ولاد البلد اللي زي العسل اللي ما بقاش في منهم دلوقتي اللي يعزم عليك بسيجاره واللي ماسك قزازه حاجه ساقعه كل ده وهو متشعبط عادي وفي مره واحد وده طبعا ما يتنسيش اتشعبط ومعاه عود قصب تخيلوا مشهد كل ما افتكره أموت علي روحي من الضحك والله لأ وقاعد يعزم علي الناس اللي متشعبطين جنبه
اهو
زي ما حضرتكم شايفين سيره عبد المطلب عملت فيا أيه فكرتني بتفاصيل كنت نسيتها فعلا ورجعتلي ذكريات عذبه بجد فكرتني بالعباسيه والضاهر ورحلتي اليوميه من الحدايق لباب الشعريه وانا في الاعداديه وصحابي اللي هناك يا تري بقوا فين دلوقتي؟
عبد المطلب أولا حاله فنيه خاصه يعني ما تحسسش انه شبه حد أبدا ولاحد شبهه خامه صوته وقوتها نادره التكرار طريقته في الغناء أيضا شديده الاختلاف خاليه من أي نعومه لكنها مفرطه في حساسيتها تشعر دوما حين تسمعه انك امام حاله معبره عن روح مصر مطرب تري في صوته عمال مصر وبسطائها والعاشق أو الحبيب بمفهومه الأربعيني (من الأربعينات ) عاشق رايح جاي تحت بلكونه حبيبته كل ما يتمناه منها هو نظره رضا
عبد المطلب تشوف في صوته جوامع مصر وهي منوره بالليل في ليالي رمضان والطرابيش والملايات اللف وبتاع اللبن اللي كان بيعدي زمان ع البيوت وصاحب القهوه اللي بيرش ميه قدام المحل والترزي اللي قاعد قدام الدكان يلعب طاوله مع صحابه
أكبر نجاح لأي مطرب أنك تشوف في صوته صوره بلدك
هو ده عبد المطلب

خبر عاجل

بدأ قرابه ثلاثه ألف عامل بشركه القاهره للدواجن إضرابا عن العمل بسبب قرار رئيس الشركه بوقف العلاوات والمكافأت الدوريه
سنواليكم بالتفاصيل تباعا

بشاير النصر كلاكيت تاني مره

وادي كمان 4000 عامل معتصمين ومضربين عن العمل في شركه شبين الكوم للغزل

لمي بقي يا حكومه وفرجينا هتعملي ايه في الإضرابات والاعتصامات اللي شغاله ليل نهار في البلد

الواحد ساعات والله بيصعب عليه الجماعه بتوع الأمن دول

هيلاقوها منين ولا منين بس

النظام قعد يعك في البلد 30 سنه وفي الأخر مطلوب من الأمن يلم كل البلاوي

يا الله

بالشفا

وفاضل ع الحلو زقه

الصوره نقلا عن صحيفه الوفد

كرباج سعاده وقلبي بيه انجلد

رمح شمال ويمين ولف البلد
ورجع لي أخر الليل وسأ لني ليه
مكسوف تقول انك سعيد
يا ولد

جمهوري الحبيب
من المحيط الهادر إلي الخليج الثائر

بناء علي رغبه الملايين من أصدقاء المدونه في كافه انحاء المعموره (المخروبه حقيقه) قررت إداره مدونه النديم إجراء بعض التعديلات الفنيه في المدونه

وعلي ذلك ستتحول المدونه بدءا من تاريخه إلي محطه إذاعيه فنيه تعني بتقديم الأغاني والأعمال الموسيقيه فقط ومؤقتا لحين عوده الرغبه في الكتابه

ارجو منكم جميعا ان تساهموا بأرائكم واختياراتكم للأغاني التي ترغبون في سماعها

ويسعدنا تلقي اقتراحاتكم

وسوف تتغير الأغاني تباعا كل 4 ساعات وفقا لاختياراتكم

خالص مودتي وجزيل شكري

النديم

وقهوه أمي

تبقي في الذاكره دوما أطياف من الطفوله أصدقاء عبروا ثم غابوا أقارب انقطعت صلتنا بهم أحداث شكلت شخصياتنا ووجداننا تفاصيل صغيره أو كبيره تبقي صورها أو أطيافها في المخيله وتلح علي الذاكره من أن لأخر
ربما تكون الصوره الأكثر إلحاحا في ذاكرتي من صور الطفوله هي صوره أمي وهي تشعل لنا بعض قطع من الأخشاب للتدفئه بها في الشتاء
كنا زمان ساكنين فوق سطوح في شارع مصر والسودان في الحدايق أبي رحمه الله اختار هذا المكان لأنه كان أفضل من كل الشقق التي كانت متاحه وقتها كانت رؤيته ثاقبه تماما فأي سكن اخر كان سيضيق بهذا العدد الكبير من الأبناء ثمانيه
هذا المكان الرائع لعب دورا كبيرا في تشكيل وجداننا وشخصياتنا سطح واسع فسيح تتجاوز مساحته ألف متر مربع ينقسم إلي نصفين بعد ان تدخل من الباب يقابلك نصفه الأيمن الذي يطل علي شارع مصر والسودان مباشره في مواجهه جامع الشيخ (كشك ) رحمه الله والذي لا أنسي أبدا انني صليت خلفه في سبتمبر سنه واحد وتمانين قبل اعتقاله مباشره وشاهدت بعيني اول خبره سياسيه في حياتي حينما اعتقله السادات في تلك الأيام وخرج الألاف من المسجد منددين باعتقاله واشتبك معهم الأمن بالأسلحه البيضاء
النصف الثاني من السطح يضم غرفنا الثلاثه وباقي السطح وكان يطل علي حديقه فسيحه تابعه للعماره كنا نتكفل برعايتها وبها شجره ضخمه عاليه وكنا نمسك أوراقها بيدينا ونحن فوق السطوح
بالنسبه لنا كأطفال وقتها لم نكن نحلم ببيئه أفضل من هذه لنسكن فيها السطح الواسع كان هو ملعبنا الكبير الذي أغنانا عن اللعب في الشارع مؤقتا وجعلنا مقصد كل اطفال الشارع الذين وجدوا في منزلنا ملعبا متاحا ومفتوحا أمامهم طوال الوقت وبترحيب وتشجيع من اهلهم الذين وجدوا فيه أيضا ملعبا امنا لأولادهم بعيدا عن مشاكل الشارع كما أنهم يستطيعوا مراقبه أبنائهم من البلكونات المطله علي منزلنا
لكن الاجمل من ذلك علي الإطلاق كان الشتاء
كان من ضمن هواياتي وانا صغير إني اسرح في ملكوت الله زي ما قلت لكم قبل كده ربما يكون هذا المكان هو المسؤول عن هذه العاده الأفق كان مفتوح قدامك طول الوقت ما فيش عمارات وراك او قدامك يعني منك للسما ليل ونهار قاعد بتراقب السما وهي بتغيم أو بتمطر وبتراقب النجوم والقمر من غير أي حاجز بينك وبينها
أسعد لحظات حياتي كانت لما السما تبتدي تمطر أطلع اقف في السطح دون ادني استجابه لنداءات امي أتبل واغرق طبعا وتقعد تزعق وانا ولافي دماغي عايش مع نفسي في ملكوت الله وقاعد بتفرج ع الناس اللي بتجري في الشارع من المطره والهدوء المدهش والمفاجيئ للكون من حواليا والشجر اللي اتغسل وبحس بغيره صحابي اللي اتقفلت عليهم البلكونات
بالليل تشعل أمي شويه قطع من الخشب نقعد نتدفي عليهم واحنا مشغلين الراديو ونقعد نتدفي ونحكي حكايات اللي بيذاكر يذاكر واللي يحكي يحكي وصوت العواصف والمطره بره ياااااااااه
كأنه كان عالم افتراضي
حكايات جدي وجدتي الطيارات الورق اللي كنا بنطيرها انا وصحابي ماتشات الكوره اللي ما بتنتهيش وأغاني فيروز في الشتا
كنت دايما بحس ان طعم أغاني فيروز بيختلف في الشتا عن الصيف في الشتا كنت اما اسمعها أحس اني في غابه او جزيره في الصيف بحس بحاله مختلفه يمكن اقرب لنشوه الحب الحقيقي
وانا قاعد بفتكر دلوقتي حاسس بمشاعر ما تتوصفش وده أجمل ما في الموضوع الذاكره أحيانا بتعيد اتزان الواحد وترجعله مشاعر كان قرب ينساها بفعل الهموم المتراكمه
ساعات كتير بحلم لو الواحد يقدر يسافر في الزمن زي ما بيسافر في المكان بحلم لو اقدر ارجع للطفوله واعيش في نفس المكان اللي كنت عايش فيه وما اكبرش ابدا
التفاصيل والأسامي كتير قوي في الذاكره يمكن كل إسم وتفصيله عايزه موضوع لوحده جامع كشك والجيران وبتاع الفطير وطنط شفيقه وعماد نبيل و حماده سلومه وغيرهم وغيرهم
البيت ده اتهد سنه 1991 عشان تتبني مكانه عماره كبيره المهم بعد ما كل السكان خدوا فلوسهم ومشيوا واحنا كمان طبعا كنت بروح ابات في البيت لوحدي ومش قادر اصدق ان البيت ده هيتهد فضلت ع الحال ده شهرين لغايه ما ابتدوا يهدوا فيه فعلا
أول يوم ابتدوا يهدوا فيه وقفت ع الرصيف مش مصدق وقعدت اعيط
وكل ما افتكر البيت ده
بحس كأنه كان حلم ليله صيف
وبفهم
يعني أيه كلمه وطن