Friday, December 05, 2008

ما تخضيهاش يا مرجيحه

بمناسبه عيد ميلادي ال34
تفتكر يا ابو النديم كان نفسك في أيه ؟
كان نفسك يحصل ايه النهارده بس ما حصلش؟
ما كانش نفسي بالمره أقضي اليوم من شغل لشغل
وما كانش نفسي ابدا وانا قاعد اكتب دلوقتي تشتغل اغنيه ليالي الحلميه ( ما تسرسبيش يا سنينا من بين ايدينا ) صدفه
وكان نفسي أي حد يجيب لي ورده
كان نفسي الخبر اللي سلمته في الدستور النهارده ينزل بس ما نزلش ، انا وحشني قوي أشوف اسمي في الدستور
كان نفسي ناس بعينها تتصل بيا وولا واحد منهم عبرني
كان نفسي احس اني 34 سنه شكلا وموضوعا ، وما بقاش حاسس بكل اللخبطه اللي انا فيها ، انا كبير زي سني ولا صغير زي ملامحي
كان نفسي اخد بالي ان العيد بعد تلات ايام بس ما خدتش بالي
نفسي اصدق ان الحلم اللي نفسي فيه هو اللي هيتحقق مش الحلم اللي جنبه
نفسي كمان احس اني شبه اللي زيي مش احس اني مع نفسي كده في اي حاجه واي حته
نفسي اجيب موتوسيكل
من اسبوعين علي فكره ركبت موتوسيكل وكنت طاير من السعاده ووقفت ع الموتوسيكل وهو بيجري وقعدت اسقف زي العيال الصغيره
نفسي ارجع بأله الزمن لورا والعب ماتش غير اللي بلعبه
نفسي اركب مرجيحه

12 comments:

nona said...

مش عارفة ليه يا عمر حاسة انك نسيت تقول يا ليت الشباب يعود يوما
يا عم دول 34 سنة امال لما يجوا مقلوبين هتعمل ايه ؟
عموما كل سنة و انت طيب ..بس اتبسط شوية بالحاجات الحلوة اللى فى الدنيا

bluestone said...

مش هقولك كل سنة وانت طيب
محدش طيب اليومين دول
واللي طيب طيبته مش بتنفعه
بتضره
نشوفلك حاجة تانية

كل سنة وانت روحك شبه ملامحك
كل سنة وانت روحك عيلة قوي

نفسي اصدق ان الحلم اللي نفسي فيه هو اللي هيتحقق مش الحلم اللي جنبه

يا صديقي كلنا لها
كلنا بنحقق الحلم اللي جنبه
حلم بتاع واحد تاني
عشان فيه واحد بيحقق الحلم بتاعنا بالغلط

بس يعني دي حاجة تستدعي الحسد
ملامحك الصغيرة دي
يا بختك يا اخي
:)
دي فرصة متجددة كل يوم
وبعدين عشان محدش ياخد على افعالك
هيقولوا معلش
عيل وطايش :))))

كل سنة وانت روحك اعيل من اللي قبلها يا عمر

alnadeem said...

نونا
خالص ، ما بقولش ليت الشباب
ما احنا زي الفل ولله الحمد
وبعدين مين ضامن لو عاد يوما ايه اللي هيحصل
تحياتي
--------------------
العزيزه القهوه المظبوطه العاليه
ردك ساحر
شكرا

basma saghir said...

مممممممم34؟...لأبسيطة خالص ولايهمك.. دي شكة دبوس :)


على فكرة..عشان تبقى عارف يعني..مش حاجة كل حاجة نفسنا فيها بتحصل..ساعات بتحصل مش عايزة اكدب عليك..بس غالبا مش بتحصل..هي وقاحة من الحياة انا عارفة بس معلش بقى مضطرين نخلينا احنا الكبار ونستحملها..مش علشان هي وحشة..لأ..علشان ساعات كتير بتبقى حنينة قوي رغم جنانها ولفها ودورانها..ساعات كتير تلاقيها بتطبطب عليك بحلم من احلامك كدة على غفلة :)

زمان كنت بتمنى ارجع بالزمن لورا زيك كدة..بس اكتشف اني لو رجعت بالزمن هضطر اعيش كل حاجة من اول وجديد..كل الاحزان والخيبات وكل البلاوي اللي حصلت..وصدقني لما اقولك ان احلى وقت هو وقتك الي انت عايشه دلوقتي

وكل سنة وانت طيب صحيح

واسفة على الاقتحام :)

mhmd said...

ليك حق ، دايما انسى ان عيد ميلادك يوافق عيد ميلاد خالد الذكرالكابتن ( فيلكس ) اللي علّم في الزمالك علامات

معلهش ، أنا غلطت في يومين ، وانت دايما تغلط عندي في تلات تيام

كل سنة وانت مطحون شغل
:)
وطيب

alnadeem said...

العزيزه بيسوو
مش عارف ليه ردك فكرني بمقوله لواحده صاحبي
كان دايما يفول
هستسلم يعني هستسلم
ولغايه اخر نفس في عمري هستسلم
هههههههههههه
تحياتي
ونورتي المدونه
---------------------------
مولانا محمد خير
فيلكس
وصلت لكده
يعني انت سايب كل العظماء اللي اتولدوا في اليوم ده (ما اعرفش هما مين ) ومش لاقي غير فليكس
يا الله مش بطال برضه
عموما السنه الجايه مش هغلط في تاريخ ميلادك
ولوغلطت بقي ابقي عديها
هههههه
كل سنه وانت أطيب

Anonymous said...

كل سنة وانت طيب يا استاذ
صبرى

محمد مسعد said...

كل سنة وأنت طيب .. وتحقق كل اللي اللي نفسك فيه .
وبلاش تفكرنا بموضوع الثلاثين ده كتير.. عشان أنا بقيت من أعضاء النادي

Anonymous said...

كل سنة وانت طيب يا استاذ"
صبرى

15 December, 2008 21:19"

انا فاكر يا نديم انك كنت بترد على الاسم دا اللى هو صبرى صاحب التعليق بعمى .. معقولة يا راجل عممممممممممممك يفتكر عيد ميلادك بعد عشرة ايام يااااااااااه معاك حق تزعل وخاصة ان تهنئته بعيد ميلادك تشعر انه كلف السكرتيرة بتاعته تكتبها ضمن بوسطة الشغل.. معلش يا"استاذ" - على رايه - بس انا اتعودت كل اللى بيعلقوا فى مدونتك احساسهم عالى بيك اسف على التدخل واقتحام مدونتك واسف مش حاقول لك كل سنة وانت طيب ببساطة لان المثل بيقول "بعد العيد ما حدش بيلف كحك" والعيد عدا من 5 ديسمبر

مع تحياتى
مجدى صلاح

alnadeem said...

عمي العزيز صبري
واحشني جدااااااااااااا
انت فين يا مولانا
صحيح انا اللي مقصر والواجب اني اتصل واسأل
بس معلش
عديهالي

تحياتي
وواحشني
-----------------
مسعد
واحشني جدا
ومرحبا بك في النادي
-----------------------
الاستاذ الفاضل مجدي صلاح
يا فندم نورت المدونه
وتحياتي ليك

النديم

Anonymous said...

الاستاذ عمر ..... انا حاسس ان الاخ المدعو مجدى صلاح يحل اسما حركيا لانسان اعرفه بيحاول يخرب العلاقة الشفيفة الللى اتسمت بيها علاقتنا التى تجاوزت العم وابن اخيه الى ابعاد انسانية اعم واشمل ... حدودها اللامنتهى وغاياتها التماهى الى ابعد الحدود لعيدا عن اى غرض ... وحسبى احساسى الذى يصدقنى دائما ان ما كتب لم ولن بغيرك قيد انملى بدليل تجاهلك لكل ما قال
اسف فليست المدجونة لهذا اعرف وكنها ثورة الغضب النبيل
صبرى

alnadeem said...

عمي صبري
يا راجل ما تاخدش في بالك
المهم طمني عليك
تحياتي