Wednesday, May 09, 2007

وشقق مفروشه وعمولات

شركه المحمول التالته (اتصالات ) ابتدت نشاطها في مصر زي ما كلنا متابعين طبعا والحمد لله أول توكيل ليهم افتتحوه من حوالي أسبوعين جنب المكتبه عندنا عملوا احتفال بهيج جدا

وطول الأسبوعين اللي فاتوا وانا قاعد بتفرج علي الناس الداخله والخارجه وهما في قمه الانشكاح وكأنهم جابوا الديب من ديله وقاعد تقابل في ناس من صحابك راحوا جري واتعاقدوا معاها وتسألهم طيب هتعملوا أيه بخطوطكم القديمه يقولك ولا حاجه هتفضل شغاله برضه؟
طيب أيه الحكمه من كده ؟ ما تفهمش أبدا أيه معني ان يكون معاك عدتين وخطين ؟ ما تفهمش برضه خصوصا يعني ان ما فيش حد مننا وزير ولا وكيل وزاره ولا هيكون طبعا

النتيجه الوحيده المؤكده هي أننا اصبحنا مجتمع استهلاكي بامتياز مجتمع ينظر إلي الاشياء باعتبارها المعني الذي سيضفي علي حياته معني وينظر إلي التملك باعتباره القيمه التي ستجعل منه شخصا ذو قيمه

المصيبه الأكبر اننا يا ريتنا مجتمع استهلاكي يملك شروط المجتمع الستهلاكي والتي علي رأسها وفره الموارد طبعا زي مجتمعات الخليج مثلا لأ ده احنا علي العكس أصلا بلد فقران نص سكانه تحت خط الفقر والباقيين بيقاوحوا عشان ما ينزلوش لخط الفقر وخمسه في الميه مكوشين ع البلد

بكل أسف مصر اتشوهت زياده عن اللزوم يا جماعه
امبارح واحد صاحبي بيقوللي يا ابني شوف مستقبلك شويه بقي العيال كلهم ركبوا عربيات وانت زي ما انت
وقلتله يعني يا عم اللي عايز يركب عربيات يركب ومش عيب طبعا بس انا بصراحه في مشاهد معينه في ذاكرتي لناس بعينها كرهتني في الفلوس خوفا من اني ابقي زيهم


من كام شهر جاتلي فرصه عمل في منصب قيادي في كارفور تخيلوا المهم اتصلول بيا وحددنا معاد للإنتر فيو طول التلات ايام اللي قبل الانتر فيو قاعد بفكر ان الناس اللي انا هقابلهم دول محتاجين طريقه كلام مختلفه خالص عن اللي الواحد بيتعامل بيها في حياته ما انا مش رايح علي وظيفه والسلام لأ ده انا رايح علي منصب مهم جدا
المهم بعد طول تفكير قررت اني هروح اقدم نفسي كعمر قناوي كما هو ورفضت تماما النصائح المتعلقه بنوع الموبايل اللي اروح بيه والعربيه اللي بسواق اللي توديني وتجيبني

ورحت زي ما انا فعلا وقدمت نفسي زي ما انا فعلا باحب ايه وبكره ايه وبعمل ايه اصلا واخواتي مين وبيعملوا ايه وكان عرض مشرف طبعا خصوصا ان اخواتي التمانيه حاجه تشرف
خرجت من هذا اللقاء والناس متفقه معايا علي كل حاجه تقريبا المرتب الوهمي ومواعيد العمل وطبيعته وما كانش فاضل غير بس لقاء أخير مع الراس الكبيره في المكان
وكلموني بعدها بكام يوم وطلبوا مني احدد الميعاد اللي يناسبني للقاء الرجل الكبير ورحت فعلا وقدمت نفسي زي المره اللي قبلها لكنه كان واضح انه بيتعمل استفزازي في أجزاء محدده لاختبار رد فعلي ومن الواضح انني وضعته في حيره شديده كنت شايف ده في عنيه فالمؤكد انني كفء جدا في ما أفعله لكني مختلف بشده عن الناس اللي بتمسك المناصب دي
نهايته مسك معايا في الأخر في الجزء المتعلق بالفلوس وقعد يسأل انا ليه طالب المبلغ الكبير ده كمرتب وقلتله ان اللي هقدمهولك في المكان أكبر من المرتب وفضلنا في الجزئيه كتير في شد وجذب ونهايته قلتله وعن قناعه والله يأستاذ ------- سيبك من الفلوس دلوقتي انا جاي هنا عشان الشغلانه انا بحب شغلي والفلوس مش كل حاجه في الموضوع
طبعا ما كان ليش نصيب في الشغلانه ومن المؤكد ان هذا الرد لعب الدور الأكبر في ضياع الفرصه

لكن كل ما اقعد مع نفسي وافتكر الموضوع ده اقول اني لو اتكرر الموقف ده ميت مره هرد نفس الرد برضه

4 comments:

Anonymous said...

Welcome back, I was waiting for a long time to write something. I did not want to comment on the last post as it reminded me with these nights at your flat listening to Asmhan,3afaf Rady, Isam3el Yasen. That was great time even with Osama...

But this post just reminded me with what happened with me at my last interview in Orascom before leaving, did you remember..? I did the same mistake as you.
Do you know what the problem is? I do the same fault here as well... we won't cgange, never , ever.
and people are the same everywhere.
Anyway, miss you soon and looking forward to seeying you soon.
Shady

محمد عبد الغفار said...

لإن كل فرد بينه وبين نفسه يعلم يقيناً انه لا قيمه حقيقه له فيحاول استجلاب اى قيمة بأى اضافه خارجيه لا قيمة لها اصلاً

لا تندم وكرر الرد ما حييت بشرط لو استطعت ان تنشأ ابنك على فكرك وتحصل على تفهم زوجتك لنظرتك فى الحياه ، اما وان فشلت ولم تستطه ذلك فكتفى بما قلت وادعو اله ان يعوضك بفرصه غيها حتى لا تندم وان عوضك فقبل وغير ردك

تحياتى لك

Anonymous said...

مشكلتك يا استاذ هى مشكلتى ومشكلة كثيرين تعرفوا على الحياة بصورة معينة فراقت لها على حالها ثم تغيرت الحياة لاسباب كثيرة لكننا رفضنا ان نسايرها او بصراحة اكتر لا نعرف . كيف نسايرها فالتلون والتبدل يدمر اعصاب ونفسية الانسان فانت لا تستطيع بحال من الاحوال ان تصبح ممثلا حتى فى حالتك التى تؤهلك لذلك من الناحية الشكلية لكونك تحمل ملامح مصرية وعربية اصيلة فانت اخترت الطريق المستقيم فى الحياة هذا الطريق الذى لا يحفه سياج تتخفى فيه تسير هكذا فى وضح النهار مهما كانت النتائج وتصر على الوضوح كان اخفاء شيئ بداخلك كبيرة من الكبائر هذا قدرك وقدر المثاليين ...وتتعدل
صبرى

alnadeem said...

العزيز شادي
طبعا فاكر موضوعك هما فعلا الموضوعين شبه بعض قوي
عموما انت واحشني جدا وسيبك من اي حاجه تانيه ما حدش بياخد اكتر من نصيبه
تحياتي
--------------------------
العزيز محمد عبد الغفار
شكرا جزيلا يا صديقي العزيز
الواحد خايف فعلا ان الزمن يغيره
تحياتي
--------------------------
عمي

تتعدل ان شاء الله
الواحد مش عايز اكتر من الكرامه وبس
تحياتي
--------------------------