Tuesday, May 15, 2007

واهي ماشيه وبتعدي

واسمحولي النهارده بعد إذنكم يعني اني اتكلم عن تجربتي في التدوين إذا ما كانش يضايقكم

المدونه فات عليها حوالي تسع اشهر يعني فرصه معقوله ان الواحد يقف قصاد التجربه ويبص عليها من بعيد

لما عملت المدونه دي ما كانش عندي أي هدف منها ( وحقيقه ما زلت أتساءل انا عملتها ليه ) ما كانش الموضوع ابعد من اني كنت قاعد ع النت فاضي مش لاقي حاجه اعملها فقلت اما اشوف موضوع المدونات ده خصوصا ان الصديق فارس أخير وغيره اخرون كانوا قاعدين يصدعوا دماغي اني اعمل مدونه

وهوب في خمس دقايق اتعملت المدونه ولقيت نفسك متورط يا حلو لازم تكتب
وكتبت فعلا ومش ناسي ابدا وقتها اني كنت خايف جدا ان صحابي يعرفوا الموضوع ده ولله الحمد انا الغالبيه العظمي من صحابي هما من المثقفين بتوع البؤره والكلام الكبير وبخاف دايما من نقدهم لعده أسباب أولها إني بطبعي لا أتحمل النقد رغم ما ابدو عليه من مرونه وطيبه (سيكولوجيه ديكتاتور بعيد عنكم ) وثانيها إني ما كنتش ناوي اكتب كلام كبير وخفت انهم ما يفهموش ده صح وده بالظبط اللي حصل لما كتبت النص الخالد (أنا والفيزا وكوندليزا ) فوجئت انهم خدوا المسأله بجد وقاعدين يناقشوا بنيه النص في المسرحيه واللغه والتطور الدرامي والكلام ده كله وقاعدين يحللوا فيه كأني كنت بكتب بجد وده ضايقني جدا فلغيتها من أساسه

اكبر مفاجأه بالنسبه لي ان صحابي عرفوا موضوع المدونه ما تفهمش منين وبسرعه جدا في تالت يوم تقريبا وفوجئت ان محمد خير عرف بيها وهو في بيروت وده ادهشني جدا

بالمناسبه خير كان صاحب فضل كبير عليا في موضوع التدوين هو موضوعي جدا في تقيماته وما بيجاملش وده بيخللي اراءه موثوق فيها بعد تالت مدونه كتبتها تقريبا كنا بنتكلم في التليفون في العادي كده وجات سيره المدونه فلقيتوا بيقوللي بالنص علي فكره يا عمر مدونتك من اظرف المدونات كانت سعادتي كبيره بالكلمه دي وشجعتني اني اكمل و ابتديت اخد ثقه كبيره في الموضوع

أكبر درس اتعلمته من التدوين هو التلقائيه القاريء ده حساس جدا يا جماعه و بيميز احاجه الصادقه عن المزيفه من الحاجات اللي كانت بتدهشني مثلا ان المواضيع اللي كنت ببقي كاتبها ومش راضي عنها كنت بلاقي رد فعل الناس عنها سلبي

أكتر حاجه بسطتني لما عرفت ان مجموعه من صحابنا كانوا قاعدين في وسط البلد بيتكلموا عن المدونات وقالوا يومها ان مدونه عمر بنشوف فيها عمر زي ما هو بالظبط
واتبسطت لما التليفزيون كلمني رغم اني ما بحبش الحاجات دي والله بس حسيت ان الموضوع بقي عامل حاجه

واتبسطت قوي لما ناس قابلتني في الشارع وقالولي حضرتك النديم ؟ إحنا معجبين قوي بمدونتك اتكرر الموقف ده معايا كتير حسيت اني حسام حسن مثلا
اتبسطت بإعجاب هاني درويش بالمدونه وأاه من هاني البؤره علي ابوها ومش سهل ان حاجه تعجبه بس الكلمه اللي عمري ما انساها ابدا لما واحد صاحبي قابلني وقاللي ان المدونه هي واحده الأسباب القليله للبهجه في مصر قالهالي بصدق حقيقي وما اقدرش اوصفلكم شعوري بالسعاده ليلتها كان عامل ازاي

أكتر موضوع حبيته ما اعرفش هو ايه كلهم ولادي بس انا حبيت قوي موضوع الراديو (إسمع يا رضا ) وموضوع خبز أمي وموضوع النادي الأهلي والمطار السري
واكتر المواضيع اللي اتضايقت منها كان موضوع نصري شمس الدين لأنه ما اتظبطش معايا زي ما كنت عايز وكذلك موضوع بطوط


ودلوقتي اتكلم بقي عن صحابي المدونون
لأ
خلوها المره الجايه عشان تعبت

14 comments:

zenzana said...

طبعا يا سيدي
معروف ومشهور من يومك لازم مدونتك تتعرف ف تلات تيام
يعني هو محمد خان احسن منك في ايه؟ بما انه عمل مدونة واتعرفت ف تلات اربع تيام
بس طبعا انت لك السبق
يا زعيم
يا اللي من يومك زعيم
لولوللييييي
بس اياك تخبط ف الحلل وانت بتتكلم عن المدونيين
انت عارف
هتتقرقش

Anonymous said...

اه هو ده
:)))


واحنا كسبنا انسان قبل كل شئ
:))

9 months has passed... the idea is born..and more crystalised.. your characted is much more appartent for your reader...!!

:) my best regards!!

Anonymous said...

أنا كمان عاجبانى المدونة جدا جدا يا عمر حتى و إن لم أعبر عن اعجابى ده من قبل .. حقيقى حاجة بديعة و صادقة جدا .. استمر يا بو عمر و امتعنا

يحيي وجدي

Amyra said...

الحمد لله النور رجع قصدي البوست رجع

مدونتك جميلة يا نديم ممكن انا بتابعها من شهرين تقريبا و تعجبني ..شفت صور ابنك ماشاء الله ربنا يخليهولك

و مش المهم بتكتب ايه المهم كلو اللي بتكتبو يكون بروح على الاقل ده رأيي في التدوين.اللي يحط جزء من روحو في المدونة مهما كانت طبيعة كتاباتو بيبان

مستنين البوست القادم

:)

صاحب البوابــة said...

الاخوة الكرام لأن دورنا هو إظهار الحقيقة وتوعية الناس بها , ولأن ما علمته عن ذلك المجاهد يمثل قيمة عظمى المفترض أن نفتخر بها ونكرمها , لا أن نعتقلها ونسجنها , فإني أطلب منكم رجاءاً أن تساعدونا في بدء حملة الافراج عن شيخ المجاهدين السيد / أبو الفتوح شوشة , المعتقل منذ حوالي 20 يوماً , ويعاني وضعاً صحياً سيئاً داخل محبسه نظراً لكبر سنه البالغ 80 عاماً , وتتمثل الحملة في نشر البوست الجاهز المتفق عليه بدءاً من يوم الجمعة الموافق 18/5/2007 والنشر سيستمر لمدة اسبوع ( مما يعنى أنه اذا لم يستطيع أحد المدونين النشر يوم الجمعه فهو يستطيع النشر لمدة اسبوع كامل ) , كما تشمل الحملة تثبيت صور شيخ المجاهدين في جميع المدونات المشاركة ( تأخذ الصور حفظ بإسم , أو عبر رابط عنوان رفعها على الانترنت ) , مع توسيع نطاق الحملة لتشمل كافة المدونات التي نستطيع الوصول اليها .. وجزاكم الله خيراً ...


البوســـت بعنوان

أن تكون أبو الفـتــــــــوح شوشــــة


حملة الإفراج عن شيخ المجـاهدين

في ظل تلك الهجمة الشرسة التي يتعرض لها كل وطني حر شريف , تتعدى تلك الهجمة هذه المرة خطوطها الحمراء , وتتمادى في غيها المنهجي , لتصطدم برمز من رموز العزة والكرامة في مصرنا الحبيبة , إنه شيخ المجاهدين الذي يربو عمره عن الثمانين , الأستاذ أبو الفتوح شوشة , ورغم ان الكثيرون من قد لا يعرفونه , ربما لأنه ليس بلاعب كرة قدم قديم أو مطرب شهير قد إعتزل ... بل إنه من القلائل الذين ما زالوا أحياء ممن سبق لهم الخروج مجاهدين وقت تقسيم فلسطين عام 48 م , ورغم أن الكل قد تناساه , في غمرة إعتقال نائبي مجلس الشعب من الإخوان المسلمين , وقد تم إعتقاله معهم وقتها بكل القسوة رغم شيخوخته وكبر سنه , إلا أنهم لم يرحموه , ولم تمنعهم كهولته , بل لفقوا له التهمة الشهيرة وهي محاولة قلب نظام الحكم !!! وكأن كهولته وكِبر سنه تسمح له بمجرد التفكير في قلب منضدة و ليس قلب نظام الحكم !!! لكننا اليوم نعلنها إننا لم ننساه , وكيف ننساه ؟؟ وقد حمل لواء الرجولة والعزة آنفاً وخرج ببدنه وماله قاصداً فلسطين ليجاهد عام 1948م اليهود الصهاينة وهو يبغي النصر أو الشهادة , , إنه اليوم له كل الحق علينا في ان ندعمه تماماً , حتى ولو لم يطلب , وحتى ولو لم يعلم , فإننا من منطلق من نمثله من صحافة شعبية , تمارس دورها في تنوير شعوب المنطقة , نعلن اليوم ما الذي يعنيه أن تكون شخصاً كشخص أبو الفتوح شوشة في مصرنا الحبيبة ...

أن تكون أبو الفتوح شوشة فهذا معناه أن تكرم وتصير رمزاً لكرامة الرجال لو كنت في بلد غير مصر ... أما لأنك في مصر ... فهذا معناه أن تصير نزيل أحد السجون وحبيس أحد المعتقلات ...

أن تكون أبو الفتوح شوشة فهذا معناه أن تخرج للجهاد في فلسطين وعمرك لم يتجاوز التاسعة عشر ...فتبلي البلاء الحسن ... ثم تعود لتنال جزائك على جهادك وبدلا من تكريمك يزج بك في السجون 15 عاماً مع الشغل والنفاذ ..

أن تكون أبو الفتوح شوشة فهذا معناه أن تعود من فلسطين راضياً عن نفسك ... راضياً عن جهادك ... راضياً عما فعلته لرفع لواء الذود عن فلسطين ... فلا يرضى عنك النظام ... لتذوق الويل والتعذيب في السجون المصرية ...

أن تكون أبو الفتوح شوشة فهذا معناه أن تخرج من السجن بعد 15 عاماً كاملةً لتمارس رسالتك في البناء والاصلاح من جديد ... بدون أن تتغير قناعاتك أو تتزعزع ثقتك في نفسك ...

أن تكون أبو الفتوح شوشة فهذا معناه أن تترشح في انتخابات مجلس الشعب لعام 1987م ... فيهب جميع أبناء دائرتك لإنتخابك ... بما فيهم أقباط دائرتك بالكامل .... فتنجح نجاحاً باهراً ... ثم يتم حل المجلس لأجل إسكاتك ...

أن تكون أبو الفتوح شوشة فهذا معناه أن تتحصن بحب الله و تحظى بحب الناس لك ...... لكنك في الوقت نفسه تجد أن النظام يُكن الكره لك ... ويعتقلك المرة تلو الأخرى ...

أن تكون أبو الفتوح شوشة فهذا معناه ألا يرحموا شيبتك وأنت قد قاربت الثمانين ... فيزجوا بك في المعتقلات غير آبهين ... ويحولوك لمحاكمة هزلية غير مستنكرين ...

أن تكون أبو الفتوح شوشة فهذا معناه أن تُحارب في رزقك وسكنك وراحتك وانت شيخ كبير ... ويضيقوا عليك كل شئ حتى يسجنوك ... في الوقت الذي تتمنى أن تنعم فيه براحتك ...

أن تكون أبو الفتوح شوشة فهذا معناه جهاد في صغرك ... تعذيب في شبابك ... بهدلة في كهولتك ...

أن تكون أبو الفتوح شوشة فهذا معناه ... اننا معك حتى النهاية ... نهاية ظلمهم أو نهايتهم ...


الروابط :

مدونة انسى تعلن بدء حملة الافراج عن شيخ المجاهدين
http://ensaa.blogspot.com/2007/05/blog-post_17.html

مدونة انسى تذيع نبأ اعتقال شيخ المجاهدين
http://ensaa.blogspot.com/2007/04/blog-post_9947.html

مجلّة "فلسطين المسلمة" تذيع فقرات من جهاد شيخ المجاهدين
http://www.fm-m.com/2003/aug2003/story24.htm

تقرير صحيفة المصريون عن اعتقال قدامى رجال الاخوان المسلمين
http://www.almesryoon.com/ShowDetails.asp?NewID=34088&Page=1

عن جهاد شيخ المجاهدين المصريين في فلسطين pdf ملف
http://www.fm-m.com/2003/aug2003/pdf/51.pdf

لمعرفة معلومات متعلقة بحياة شيخ المجاهدين يرجى زيارة مدونة الحرية لأبو الفتوح
http://freeaboalftouh.blogspot.com/

رابط تقرير جريدة الدستور عن شيخ المجاهدين بتاريخ 13/5/2007
http://www2.0zz0.com/2007/05/17/21/81829036.jpg

جاري تدعيم الحملة بتقرير جريدة الوفد عن شيخ المجاهدين بتاريخ14/5/2007

أحمد حربية said...

عرفتك إنسانا ثم صحفيا ومدونا وكان توحد البؤرة في الثلاثة هو الأكثر استنباطا لميتافيزيقة البعد اللامترائي في سايكولوجية المجال اللا محسوس...طبعا انت فاهمني ،صباح الفل

أحمد حربية

Anonymous said...

اكتب يا استاذ عمر .... فانت اتخلقت عشان تقرا وتكتب ..مش مهم تكتب ايه فالاحداث تتلاحق.. وسرعة ووتيرة الحركة اسرع وبالتالى لن تعدم مواضيع تستحق الكتابة. بس المهم هو ان نجد عمر الانسان صاحب القميص الاحمر اقصد بشحمه ولحمه واحساسه وسمرته وبياض قلبه يطل علينا من بين السطور
صبرى

محمد عبد الغفار said...

كويس انك سعيد بتجربتك

وانا كمان سعيد

alnadeem said...

زنزانه صديقتي العزيزه
ميرسي يا ست الكل
وما تخافيش انا مش هخبط في الحلل
انا هقول الحق وبس
هههههههههههه
تحياتي
--------------------------
إبيتاف الغاليه
إحنا اللي كسبنا يا افندم والله بمعرفه شخصيه رائعه زي حضرتك
كلامك أخجل تواضعي بشده
شكرا
------------------------
يحي باشا وجدي حبيب قلبي
ما اتحرمش منك يا ابو يحيي يا جميل
كلامك دخل جوه قلبي عدل
تسلم
-----------------------
حربيه باشا
واحشني جدا يا ولد
الف سلامه عليك انا فعلا قصرت في حقك والله
لازم نيجي نزورك قريب
سلام
-----------------------------
ندا
أشكرك يا فندم
وكلامك هو خلاصه الموضوع
المهم الروح في الكتابه
تحياتي
--------------------------------
عمي صبري

شكرا يا عمي
اكيد انت عارف طبعا ان اي نجاح احنا فيه فالتربيه اللي ربيتوهالنا لعبت دور كبير في صنعه وتشكيله
تحياتي
-----------------------
الجميل محمد عبد الغفار
شكرا يا باشا
بس ما انا ما فهمتش
انت سعيد بأيه بالظبط
بتجربتي ولا بتجربتك؟
ههههههههههههه
خالص مودتي

Anonymous said...

مبروك للزمالك

يللا مرة من نفسكوا تفرحوا
وتدوقوا طعم الفوز من تاني

هههههههههههههههه

tota said...

عمر النديم
شوف يا رفيق انت مولود وفى ايدك كتاب وقلم يعنى التدوين مزودش عندك حاجة لكن التدوين خرج منك حاجة
خرج صورة عمر اللى من الصعب اى حد يعرفها بسهولة
ممكن القريبين منك قوى واللى بتسمح لهم يتكلموا معاك بحرية واللى بتسيب نفسك تتكلم معاهم وده من النوادر يعرفوا عمر لكن من التدوين ناس كتير قدرت تعرف شخصية عمر المختفية ورى قناع الصمت
وسلام يا صديقى

mhmd said...

يا سلام يا بو جناوي دحنا لينا الشرف يا زعيم
اتاريك كنت مستني كل السنين دي لغاية ما يخترعوا المدونات عشان تفضفض يا لئيم
تحياتي لمدونتك الجميلة

alnadeem said...

إبيتاف
الله يبارك فيكي يا ستي
ولسه
هو انتوا شفتوا حاجه
كل 4 سنين من ده
ههههههههههههههههه
تحياتي
--------------------------------
توتا صديقتي الصدوق
يا ستي شكرا ايه ده كله بس
التدوين زود كتير عندي علي فكره كفايه اني طلعت بيكم واكيد قريب هكتب موضوع عن اللي طلعت بيه من التدوين
تحيات
-----------------------------
صديق العمر محمد خير
يا عم حمد الله ع السلامه وحشتنا تعليقاتك

وكلامي عن دورك في الموضوع ما فيهوش مبالغه ولا مجامله

شكرا يا زعيم

محمد عبد الغفار said...

بتجربتك طبعاً