Monday, July 09, 2007

وساعات بتودعنا

إتوترت جدا بعد ما كتبت موضوع فاطمه وماريكا وراشيل حسيت ان ناس كتير مستنيه انا هكتب ايه سواء عنهم أو عن غيرهم

والانتظار ده بالنسبه لي يبوظ الموضوع علي بعضه انا بصراحه ما احبش ابدا يكون في أي عنصر خارجي يأثر علي اللي هكتبه
الخميس اللي فات قصاد الامبراطوريه جالي ناس كتير انتبهت انه الامبراطوريه بس هي اللي ممكن تضم التوليفه دي من البشر بكل بساطه مدونين ونجوم سينما و وصحفيين وقرايبي وسيناريستات وشعرا وناس عاديه
وكلهم متفاعلين مع بعض كأنهم صحاب من زمان
الغريب اني ما حسيتش ان الناس دي جايه علشاني
حسيت ان الناس بتيجي علشان حاله بيعملها المكان
أو عشان صدفه هيقابلوها في المكان يمكن تغير المسار

ونرجع تاني لاصحابي المدونين

من 5سنين كانت أول مره اسمع فيها إسم زنزانه مش لازم طبعا اقول اسمها الحقيقي هنا قبل ما استأذنها المهم كان إسمها بيتردد قدامي من ناس مالهاش علاقه ببعض
وكان سؤالي لنفسي عنها هي مين دي اللي باسمع إسمها في كل حته وبتعمل ايه بالظبط في الحياه
حقيقه شهرتها فكرتني بنفسي ههههههههههه
لما عرفتها فهمت سبب الشهره والقبول الكبير ليها من كل الناس لأنها ببساطه شخصيه خاليه من العقد
بحب مدونتها لما بتبعد عن السياسه وتتكلم عن الحاجات الإنسانيه البسيطه

محمدد عبد الغفار هو المدون اللي بحس ان عنده نفس همومي رغم ان تدويناتنا ما فيهاش شبه كبير بالمره
محمد و كأن في حاجه وقعت منه في السكه ولسه بيدور عليها ومش راضي يعترف ابدا إنها ضاعت للابد
عدم اعترافه انها ضاعت هو اللي هيخليه يلاقيها في النهايه

ياسر نعيم مرايتي اللي بشوف فيها نفسي طفل شقي في حدايق القبه حالف ما يكبر ابدا

إبيتاف عازف ربابه وحيد في وابور الساعه 12 وجرس نحاس من بتوع زمان علي رصيف محطه قطر فاضي في الشتا بالليل

6 comments:

اه يا دماغى said...

عزيزى

تكتب اللى حاسس انك

عايز تكتبه من غير اى توتر

زنزانة شخصية طيبة جداا ومدونتها فعلا رائعة

خالص تحياتى

Anonymous said...

ههههههههههههههههه

كل ده عشان انا اهلاوية يعني؟
I'm flattered

:D

الاهم ان حضرتك فعلا تكتب بتلقائيتك اللي متعودين عليها

Reemo said...

انا كمان كنت سمعت عن مدونه زنزانه من اكتر من حد وده خلانى ادور عليها وبجد هى من الناس اللذيذه اللى بتعجبنى الاجانب الانسانى فى كتابتها
بالنسبه لمحمد عبد الغفار فبالنسبالى هو المختصر المفيد
دايما بتكون تعلقاته وكاباته مختصره لكن مفيده وبتتضمن خلاصه الكلام
ابيتاف صديقتى العزيزه وبحس فى كتاباتها بحاله خاصه وانفراد مميز وجو خاص للمدونه بيلمس جزء كبير من المشاعر
اول مره ازورك وموضوعك عجبنى
تحياتى

tota said...

انا عارفة ان كل واحد بيكون منتظر يعرف راى الناس فيه ايه لانه مش شايف نفسه فى عيون الاخرين
واللى انا متأكدة منه اكتر انا حتى لو اختلف رأيك عن رأى اى حد تانى فده لاختلاف ومنظور كل واحد فى رؤيته للاخرين
ولانك حد مميز جدا فى فهم وتحليل الاخرين كان للبوست ده اهمية شخصية خاصة عند كل حد ذكرت اسمه

فعلا الامبراطورية مكان وحالة خاصة بس متنساش ان فترة غيابك عنها اختفت الامبراطورية دى عن الوجود وده ملهوش غير معنى واحد
ان الامبراطورية خلقها عمر ومن غيره ملهاش وجود
صح ولا انا غلطانة

free_soul_girl said...

مش كل الناس يا عمر بتروح للامبراطوريه علشان هيه الامبراطوريه وبس لا في ناس كتير بتروح هناك لانك بس هناك و كمان مش تنسى انك الزعيم يعني لازم تلم الشعب حوليك ولازم يكون ليهم مكان يتجمعوا فيه علشان تعرف احوال الشعب و تطمن عليهم و هما كمان يطمنوا عليك وزي ما قالت توتا انك لما اختفيت الناس كلها مش بقت تروحها وهيه ايه الامبراطوريه غير عمر الزعيم
انت بس مش عارف قيمتك عندنا
ربنا يخليك لينا يا زعمينا و يخلي الامبراطوريه اللي بتجمعنا

alnadeem said...

العزيزه ااه يا دماغي
اهلا بيكي في المدونه
وشكرا علي النصيحه
واتفق معاكي تماما ان زنزانه اكتر من رائعه
تحياتي
-------------------------------
إبيتاف
أكيد مش عشان انتي اهلاويه
هههههههههه
تحياتي
------------------------
ريمو
مرحبا بك ضيفه عزيزه علي المدونه
اعتبري نفسك في مدونتك هههههه
ميرسي جدا لاهتمامك وسعيد ان الموضوع عجبك
------------------------------
توتا
شكرا ليكي يا صديقتي الصدوق
انتوا اللي عاملين الامبراطوريه مش انا
-----------------------------
free soul
مبروك دخولك عالم التدوين
ومبروك ليا انك شرفتيني بتعليق

وبعدين احنا هنبتدي بكش
زعيم ايه بس انتي هتعومي علي عومهم
ههههههههههههههههههه

حقيقي شكرا ليكي اتبسطت جدا بتعليقك