Monday, November 12, 2007

يا ساكن بالأشرفيه


كان هاجسي وخوفي الاساسي طبعا هو العنصريه المحتمله التي قد اواجهها بسبب اللون أو الدين او الجنسيه بسم الله ما شاء الله احوكم عربي ومسلم واسود بالمره
أنا حساس جدا زي ما انتوا عارفين وتسعين في الميه من مشاكلي في الحياه سببها الحساسيه الزايده المهم
نزلت في محطه باد جوسبرج لقيت شابه ظريفه واقفه بره فسألتها بالالماني طبعا ازاي ممكن اروح العنوان ده ابتسمت بشده والظاهر انها تصورت انني ضليع في اللغه الالمانيه فقعدت تبرطم بكلام ما فهمتش غير نصه وركبت الاتوبيس اللي راكن قصاد المحطه وقفت مش عارف اعمل ايه لقيت تاكسيات واقفه رحت رايح علي تاكسي منهم ومكلمه قاللي ما فيش مشكله المشوار قريب ولقيته راح جاي معايا وشايللي الشنط وحاططها في التاكسي ومتحركين
ومسافه ما ركبت مسافه ما نزلت
المعهد كان قريب من المحطه بشكل مش معقول اوصفهالكم ازاي ؟
حاجه كده يعني والله العظيم بالظبط قد المسافه من البورصه لمكتبه سندباد

اللي عجبني في الموضوع ودي كانت اول الصدمات الحضاريه ان الشواق ببساطه شديده ومن غير عنجهيه فارغه شال الشنط ودخلها المعهد باعتبار ان ده واجبه الطبيعي
طبعا الموضوع مش محتاج مقارنه سواقين التاكس بتوعنا بيعملوا ايه بس حاول تتجرأ وتفكر انك تقولله انه يشيل معاك الشنطه مش يشيلهالك

من ده بقي يا معلم طول الوقت في اي حاجه بتعملها وتواجهك مشكله والله العظيم طول الوقت اس واحد تسأله علي حاجه يكون الرد ICH HIlF E IHNEN
يعني انا هساعدك
نظام فطع تذاكر القطر هناك ألي تماما من خلال مكنه بالنسبهلي طبعا الموضوع كان صعب اول مره وبكل بساطه لقيت ميت واحد اتبرع انه يقطعلي

شهر كامل بهذا الشكل ما فيش واحد بص لك بصه وحشه او اتعامل معاك من فوق ما فيش قله ادب من اي نوع وكل الكلام الفارغ اللي الواحد بيسمعه عن العنصريه الالمانيه ثبت من خلال تجربتي وخبرتي الشخصيه انه ما لوش وجود من اصله
في اول يوم في المعهد وفي مكتب الاستعلامات لقيتهم من نفسهم بيشرحولي ازاي اجدد الإقامه لو حبيت يعني ودي كانت تاني الصدمات
كل اللي مطلوب اني اركب الاتوبيس وانزل محطه مش عارف ايه واروح مكتب رعايه المهاجرين او الدارسين واقول لهم اني عايز اجدد الإقامه لمده كذا
وبس

يا سلام
؟
بالبساطه دي؟
قالوا لي ايوه بالبساطه دي

في كل التفاصيل دي انا فاكر وبفكر في مصر ( مش علي طريقه النمر الاسود طبعا شايلك في قلبي وفاكرك يا مصر) بالعكس
افتكرت ان لو حضرتك لا قدر الله بلكونه بيتكم وقعت منها طوبه وحبيت ترممها كم التصاريخ اللي محتاج تاخدها عشان تركب الطوبه
ويا سلام بقي لو حضرتك مسيحي
يا حلاوه ع اللي هتشوفه
وكان الدرس الاول والسؤال اللي مش لاقيله إجابه

مين اللي عنصري بالظبط

5 comments:

Gid-Do - جدو said...

عمر

على فكرة انا مقيم فى امريكا من اكتر من ربع قرن وعمرى ما رحت المانيا وفكرتى عن الالمان هى نفس فكرتك ـ قبل تجربتك معاهم ـ عنجهية وغرور وعنصرية خاصة انى عديت اكتر من مرة على مطار فرانكفورت ترانزيت والناس اللى شاغلين هناك تصرفتهم بتعطى هذا الانطباع وبناء علية قررت انى مدخلش المانيا خاصة انى معرفش ولا كلمة المانى لكن يظهر ان كتابتك عن تجربتك حتخلينى اغير من حكمى على ناس عمرى ما احتكيت بيهم ـ من فضلك اكتب كمان ـ تحياتى

Anonymous said...

Nadem, that was too honest meomrries!! what happend !! have you swollen any bills! hahahah

7boob El Sarahha !!!

any way, it was a great question to ask in the end, Who is the racist?
P.S sorry for rude words last comment, you deleted the comment, so i will not again try to take it away so much with words. Ahhh, and my appology to the readers too.

Cheers!!
Henry
qld.Aust.
12-11-07

Anonymous said...

:))

لا كدة مستنين الباقي

و عايزين بقي دروس الماني عشان انا ثقافتي فرنساوي :D

Alexandra said...

ولا يا هنري. اكتب عربي يا لا علشان الأنجليزي بتاعك لسا أورنوس ومش حيتصلح وسط ناس بترد بالعربي. حيتصلح هناك في استراليا مكان ما انت. اما عن العنصرية فأحنا طبعا عنصريين وطبقيين وعندنا عبر الدنيا والأخر. ومش خدومين زي ما بندعي. كل الحكاية اننا بندعي كتير. ومميزاتنا مش محل فخر لينا مش فاهمة ليه. اما هما فصرحا مع نفسهم على الاقل. أنا سافرت كتير قوي وعارفة انه سبب الصدمة في غالبا بيكون أننا عندنا أولا اوهام عن انهم مجتمع بارد وعنصري وكلام من ده لا يسندوه غير فلان قال لي انه فلان قال له وثانيا اننا مطحونين هنا وعايشين تحت مستوى البشر. الحل في حاجة من اتنين. الي عايز يمشي في السنين السودا دي لا يلام والي بيرجع يقول انا رحت وشفت وعارف دلوقتي اني لازم ما اقبلش بحاجات كتير يبقى برافو. يا رب ما يزهقش

Anonymous said...

Hahaa, Alexandra. thank you! i know my bad English might annoy many readers, but my reason that i do not write Arabic that i have not got internet at home, and i use public computers all time which has not got Arabic Keys. Also i am not allowed to download any small programe to change the Key board. I wish it is enough reasons.
P.S the only time i wrote in Arabic was just Copy-Paste from another place.

About your opinion, i do not mean to say we are the only racist. It is a human nature. However,it should be strict laws to punish any racist behaviour. Thats all

Henry
12-11-07
OLD-Aus.