Monday, June 27, 2011

وضاع الدوري يا ولدي كالعادة



لما يبقي نادي بيعاني نفس المشكلة من عشرات السنين ، يبقي معلش المشكلة في النادي نفسه ، لا في الظروف ولا الحظ ولا اتحاد الكورة ولا في المنافس ، المشكلة في نادي الزمالك ، إدارة وجمهورا ، من يوم ما وعينا ع الدنيا ونفس المشكلة بتتكرر بحذافيرها ، يبقي نحاول نعالج الخلل .
اولا بس عايز اقول حاجة للناس اللي دافعت باستماتة عن حسام حسن باعتباره الفاتح الكروي اللي سيأتي بما لم يأت به الاقدمون ، هل اقتنعتم أخيرا انه مدرب ضايع ؟ يا جماعة المدرب الكبير ده مش حاجة بالساهل ، المدرب الكبير ،لازم له مواصفات خاصة ،مش معني أنه حقق عنصر منها انه كبير ، أبدا ، لازم العناصر كلها تكون موجودة ، رؤية وخيال وفكر وتصور ، حسام حسن الصفة الوحيدة الجيدة اللي فيه هي الروح القتالية ، وما عدا ذلك سلملي ع التروماي ، وعموما الحق مش عليه ، الحق ع اللي صدقوه وأقنعوه انه مدرب كبير
خلاصة الكلام من غير فلسفة ، لا أمل في نادي الزمالك إلا بإدارة محترمة تعمل من اجل مصلحة النادي فقط ، مش بيزنيس وشللية وفساد ومؤامرات ، ومدرب محترم من ابناء النادي اللي بجد والمخلصين له ، طارق يحيي أو طه بصري مثلا أو أي شخص شريف ،يمسك النادي تلات اربع سنين ، واكيد الموضوع هيجيب نتيجة ، والمهم أيضا انكم تشيلوا الأهلي من دماغكم خالص ، مالناش دعوة الأهلي بيعمل أيه ، ركزوا في ناديكم وبس وشكرا
وطبعا بأدن في مالطة

No comments: