مره من ذات المرات واحد صاحبي سألني قاللي يا عمر: تفتكر أيه أهم منجز أو اختراع في تاريخ البشريه؟
وحيث أن انا مواطن كلاسيكي جدا كانت إجابتي الواضحه والتي مازلت مقتنع بها حتي الأن هي الراديو الراديو هو أهم منجز في تاريخ البشريه
المهم بعيدا عن وصله الردح والسباب التي تلقيتها من صديقي العزيز والذي أضطرني أن أعايره بنوع الفاكههه الذي يفضله (الجوافه ) ؟ تخيلوا في بني أدم في الدنيا فاكهته المفضله الجوافه؟
بعيدا عن ذلك كما أسلفت فما زال الراديو في نظري هو أهم منجز في تاريخ البشريه
كان الراديو ومازال هو رفيقي الدائم في كافه التفاصيل هو كائن مخلص لأقصي حد ورفيق غير مرهق علي الإطلاق ولا يحتل من جيبك أكتر من الوزن والحجم الذي تحتله علبه السجائر
إكتشافي لأهميه هذا الاختراع العظيم بدأ وأنا في العاشره من عمري في يوم مطره بالليل كنت قاعد اقرا مغامره من مغامرات بطل طفولتي الأثير (بطوط طبعا ) وكل شويه اقعد ابص من الشباك علي المطره وهي نازله علي أرضيه سطح البيت كنا وقتها ساكنين فوق السطوح وكانت هوايتي اني اقعد اتفرج علي السما والسحاب والمطره وممكن كنت اقعد ساعات ما بعملش حاجه غير اني ابحلق في السما من غير ما انطق ولا كلمه وكان الموضوع ده بيلفت انتباه بابا وماما دايما هذا التأمل الدائم في ملكوت الله ساب أثر ممتد جوايا لغايه النهارده وتوج في المرحله الجامعيه باللقب الذي أطلقه علي بعض الأصدقاء
لقب (سرحان عبد البصير ) طبعا
المهم وانا قاعد اقرا بطوط النور قطع وقفلت الكتاب ولقيت الراديو جنبي رحت مشغله
ويا اللللللللللللللللللله
فيروز بتغني والصوت جاي بالعافيه من إذاعه بعيده وقاعد بيروح وييجي (علي فكره انا منفعل جدا وانا بكتب دلوقتي لأني ابتديت احس بالموقف وكأني في لحظتها بالظبط ) وكأن صوتها جاي من عالم أخر وانا ببص من الشباك علي المطره وهي نازله علي السطح إخواتي نايمين كلمهم وواقف ع الشباك لوحدي وصوت فيروز بيوديك لعوالم سحريه تتداخل مع العوالم التي تركك فيها بطوط قبلها بقليل
ومن لحظتها رحت وما رجعتش
أصبح الراديو وصوت فيروز رفيقي الدرب الذين لا غني عنهما أبدا
السر في أسطوره هذا الكائن تنبع من أنه صوت صوت فقط بلا صوره الصوره بتقتل الخيال في معظم الأحيان وده مثلا سبب عدائي للتليفزيون أو للكليبات أنا ما اعرفش اشوف أغنيه لأن الأغنيه ببساطه اتعملت عشان تتسمع مش عشان تتشاف
وهكذا أدمنت منذ الطفوله الاستماع إلي هذا الجهاز قبل ما اروح المدرسه أشغل الراديو واسمع صلاه الفجر كانوا وقتها دايما بيذيعوا من الحسين بصوت شيخ عبقري بكل أسف فاتني أن أتذكر اسمه وبعدها أسمع يا صباح الخير ياللي معانا علي إذاعه الشرق الأوسط وكمان فاكر كويس أغنيه غريبه جدا وما بقيتش اسمعها لما كبرت أغنيه بتغنيها مجموعه مش مطرب كانت بتقول (حليوه حليوه والله ) ومش عارف مين اللي بيغنيها ولا أي حاجه عنها بس كنت بحبها قوي
أعذروني علي ضعف الذاكره دي حاجات فات عليها 20 سنه
أرجع من المدرسه أذاكر علي صوت الراديو وكانت إذاعتي المفضله في مرحله ابتدائي هي الشرق الأوسط إذاعه خفيفه وإيقاعها سريع وفاكر من برامجها كتير فكر برنامج الأطفال (فانتستيكا ) وبرنامج (تحت العشرين ) وبرنامج (علشانك يا مصر) وغيرها كتير أظرف حاجه في الإذاعه دي إنها كل 10 دقايق بتذيع أغنيه
وافضل كده طول اليوم مشغل الراديو لغايه ما انام اقعد اقلب بين الإذاعات ادور علي أغنيه حلوه وخصوصا أغاني فيروز بالمناسبه أنا كانت (أيدي مبروكه )في موضوع أغاني فيروز كنت أول ما اشغل الراديو لازم وحتما تيجي أغنيه لفيروز ومراتي شاهده علي كده لغايه النهارده ويمكن في واقعه شديده الغرابه يشهد عليها محمد خير صاحبي
من 6 سنين كنا أنا وخير وخالد سعد (فاكرينه ؟) مسافرين العريش وخدنا معانا طبعا شرايط فيروز عشان نسمعها هناك المهم واحنا بنركب البيجو اللي هيودينا العريش قلنا للسواق :والنبي يا اسطي شغلنا شريط من الشرايط دي نسمعه والسواق قالنا والله يا جماعه الكاسيت بايظ ما فيش غير الراديو عندي
وشغل الراديو فعلا
وسبحان الله الراديو لمده 3 ساعات ما بيذيعش غير أغاني لفيروز
لكن اكتر لحظات استمتاعي بالراديو كانت مساء لما اجي انام خصوصا في الشتا أتغطي واشغل الراديو واعيش مع الأصوات اللي جايه بتقتحمني من اماكن مجهوله وتحدفني في أماكن مجهوله برضه في غابات وجبال وتلال وجزر ومطره وسحاب وكهف وشلال وكوخ ودفايه في غابه ضلمه
من أكبر النعم اللي انعمت بيها الطبيعه علي الإنسان هي نعمه الخيال
وهو ده سر الراديو
وسحره
Subscribe to:
Post Comments (Atom)
61 comments:
بص بقى يا ريس
أنا النهاردة اتعلمت درس بمليون جنيه
مش لازم الواحد يقول كلام مجعلص ولا يحنجر في السياسة بقين عشان كلامه يوصل للناس وتهتم باللي بيكتبه
ممكن حاجة بسيطة أوي وممكن شخصية أوي وفي نفس ذات الوقت عميقة جدا لدرجة إنها تاخدك في أعماق ذلك الكائن المذهل المدعو الإنسان
عوالم مذهلة مستمدة من أعماق الخلايا المخية المحفور فيها ذكريات السنين تأخذك وتأخذنا في عمق كنه الإنسان
وجمال الإنسان وروعته يكمن في مثل هذه التفاصيل الصغيرة والذكريات التي تترك آثارها التي لا تنمحي
لكي تلمس العقل والقلب لا تحتاج إلى الحنجرة واللسان بل إلى أن تكتب من القلب فتصل إلى القلب
شفت الموضوع بسيط إزاي؟
شكرا يا معلم
(بضم الميم وفتح العين ع الآخر)
من منا (أقصد في جيلنا) ليس له ذكريات مذهلة مع ذلك الكائن الأسطوري المسمى الراديو؟
حكايتي مع الراديو بدأت في الثانويةالعامة
وكان فيه إذاعة اسمها الشرق من باريس بحبها أوي
وراديو لندن والأخبار اللي فيه وكنت دايما أحب طريقة قراءة اللغة العربية في نشرات البي بي سي
كل دا كوم بقى وحالة الذوبان والهيام مع صوت معشوقتي الرائعة بثينة كامل وهي تهمس في رقة وعذوبة صوت أسكورية وهي تقول.... إعترافــــــاتون ليلية
يا لهوييييييييييي
ولا إيناس جوهر في الشرق الأوسط وهي بتقول رباعية جاهين بتاعة غمض عينيك وارقص بخفة ودلع الدنيا هى الشابّة وانت الجدع تشوف رشاقة خطوتك تعبدك لكن انت لو بصيت لرجليك .. تقع عجبى!! وتكاد تلمس صوتها الباسم الضاحك وهي بتختم الرباعية ... هذه هي التفاصيل ببساطة هي "نحن"ـ
حياة النبي يا شيخ ما تحرمنا من كتاباتك دي
عم الحاج جرجس
أولا مين فينا اللي لاجيئ جنب مدونه التاني ؟
ثانيا أشكرك يا باشا لأن اللي انت بتقوله هو خلاصه كل حاجه
فعلا الحدوته مش بالكلام الكبير أبدا
يا ابني انا مالحقتش ابعت الرد الاقيك بعتت تعليق تاني
بس تعرف انت فكرتني بحاجات جميله نسيتها وانا بكتب الموضوع
زي برنامج اعترافات ليليه مثلا
بس تعرف أحسن حاجه حصلت اني نسيت أو كسلت اكتب عن البرامج والحاجات اللي كنت بحبها
عشان كلنا نشغل خيالنا مع بعض ونفتكر
يتبقى نقطتين
بالنسبة للأستاذ رضا
يكفيه عارا وشنارا حبه للجوافة
الجوافة طبعا زي ما انت راسي مرتبطى لدى معظمنا ارتباطا شرطيا زي بتاع بافلوف والكلب والريالة مرتبطة بالمدارس ودخول المدارس وكآبة هذا الموسم السبتمبري الكئيب
فلما واحد زي الأستاذ رضا يحب الجوافة اسمح لي
عيب جدا
ع الأقل ما يعابش ع اللي بيحب الراديو
وتسمع أغنية إيه يا أخ رضا؟
فهاني وبحب الفاكهة
وبموت في الموز والمانجة
......
العنب العنب العنب
البلح البلح البلح
......
......
حد جاب سيرة الجوافة يا مؤمن؟؟
===================
خالد سعد دا محسسني إنه اللهو الخفي... اللي ما عمرنا سمعنا له حس
يعني حتى اللي قال سبحان الله هو الأخ محمد خير
هو خالد سعد دا أخرس ولا إيه؟؟؟؟
عموما
انج سعد فقد هلك خالد سعد
(محسسني بالجملة دي إنك طالع من مسلسل القضاء في الإسلام)
أنا بجد من أيام اعترافات ليلية دي وأنا بحس أن بثسنة دي صديقتي أو أختي مش كل جيلنا لديه نفس الانطباع؟
ولا وهي بتقول نادي القلوب الوحيدة كنت تحس إن لو قلبك مش وحيد يا مؤمن يبقى نفسك تبقى قلب وحيد عشان تاخد كارنيه النادي بتاعها دا
جيلنا برضه كان فيه حاجات جميلة
يا ابني هموت من الضحك
علي مهلك شويه
أولا رضا ده مش إسم صاحبي
إسمع يا رضا دي أغنيه لزياد رحباني مالهاش علاقه بالموضوع غير في كلمه إسمع
كلمه إسمع أحالتني مباشره إلي الراديو
بس
صباح الخير يا عمر كنت دخلت خلاص في الجو بتاع البوست وخيالي راح فوق السحاب دخلت لقيت جرجس قالب الدنيا هنا ارحمني يا حاج على الصبح موت من الضحك وصحيت العيله عندي
المهم ياعمر انا زيك كده برضه بكره التكنولوجيا قوي ولولا دراستي للجرافيك ولا كنت عرفت استعمل الكمبيوتر وما بشفش تلفزيون وفي الجملة بتاعت لما تعوز تسمع اغنية مش لازم تشوفها انا معاك 10000000000000000 بالمية ريحت قلبي ربنا يريح قلبك هو دا الكلام
البوست جميل جدا جدا جدا
العزيزة المعزوزة روشة الجميلة
يكفيني فخرا وسعادة إنني ضحكتك على وش الصبح
شفتي جمال العرض وبساطة الأسلوب بتاعة فخامة الرئيس؟
دا أسلوب السهل الممتنع يا أستاذة
طول عمري أقول النديم دا مدرسة
يعني لعب وفن وهندسة
هو الحاج مواليد سنه كام
رشا
ميرسي يا جميل علي ذوقك ومبروك علي الصوره الجديده صوره تليق بالسيده الأولي فعلا
أما بالنسبه للواد جرجس فمن الواضح أنني سأبدأ في اتخاذ إجراءات جاده لطرده من المدونه إذا لم يتوقف عن الرد علي جمهوري حبيبي
إنتي بس قوليلي عايزه تعملي فيه أيه ومالكيش دعوه بالباقي
انا مواليد 74 يا حاج
انا الراديو عندي له ذكريات حفرت في نفسي لكن ليس مع اذاعة الشرق الاوسط وانما اذاعة بغداد عندما يبدأ البلبل في التغريد الساعة السادسة الا عشر دقائق بعدها وعند تمام الساعه السادسة تفتتح الاذاعة احدى المذيعات القديمات ملائكيات الصوت او المذيعين القدماءليبدأ بعدها القرأن الكريم.... واذكر انه عند الساعة الثانية ليلا بعد موجز الاخبار يوميا اغنية لأم كلثوم تنتهي عند الثالثه ليتم اذاعة أخر موجز للأنباء وختام البرامج.... ااااااااااااه ذكريات حلوة أما اليوم فلا توجد اذاعه بغداد ولانستطيع تحديد موقع اذاعة لان مواقع الاذاعات الحالية يتغير يوميا لاسباب لا اعلمها ومن ابرزها وبالتأكيد الامنية... لم اعد استطيع سماع صوت البلبل ولا صوت القرأن باصوات القراء العراقيين المعروفين...ايييييييييييييه سبحان الحي الدائم
اما بالنسبة لي فأن اختراع المطابع هو اهم حدث من وجهة نظري ...
الى الرئيس عمر القناوي
اولا شكرا على اعتباري السيدة الاولى بس انا بصراحة منفعش اعطي احكام صارمه على اي حد من عامة الشعب
انا من الشعب والى الشعب
هههههههههههه
يعني انا مدياك الصلاحيه الكاملة للتخلص من المديتشي هههههه
ولا ايه يا فارس
:)
الله يحرقك يا جرجس .. يابنى اتهد بقى
السديه الأولى رشا الجميله .. جرجس ده مش ميديتشى .. ده مقطوع ..بس كده
سيادة الرئيس المفدى عمر قناوى
فكرتنى باللذى مضى .. تعرف يا عمر أول حاجه اشتريتها فى بيتى القديم قبل حتى ما أشترى سرير كانت أيه ؟؟ راديو .زمتهيألى شفته عندى .. خلاف جهازين راديو تانيين فى البيت واحد قديم فى حجرة المكتب وواحد جرونديج ترانزيستور .. انا كمان من عشاق الرادبو ..بس على أيامى بقى كانت أذاعة مونت كارلو .. و طبعا البىبى سى .. و حاليا و لانى برجوازى تقريبا ماباسمعش غير البرنامج الموسيقى .. و غالبا بانام على صوته يوميا
تعليق أضافى بقى .ز سرحانك فى النجوم و الراديو اللى شغال و انت بتذاكر ..هو ده يافالح اللى خلاك تاخد الجامعه فى سبع سنين ..
المهم .. فعلا برافو
و ياريت سيادتك تحكم باعتقال جرجس و حبسه فى معتقل المغول .. زى حسن الهلالى كده .. بس نكهربه عشان مايهربش
الله يحرقك تانى يا جرجس
و الجميله رشا .. السديه الأولى .. جرجس ده مش ميديتشى .. ده مقطوع ..
السدي الرئيس عمر قناوى .. فكرتنى بالذى مضى .. أنا أول حاجه اشتريتها فى بيتى القديم قبل حتى ما اشترى سرير .. كانت راديو .. أظنك شفته .. و كمان جهازين راديو تانيين واحد قديم فى حجرة المكتب .. و جرونديج ترانزيستور لزوم الحركه .ز بالأضافه لراديو الموبايل
على أيامى كانت فيه أذاعة راديو مونت كارلو .. و كان فيه نادى القلوب الوحيده بتاع م1يعه رائعه أسمها هيام .. و حالياو لأنى أرستقراطى مش زيكم ماباسمعش تقريبا غير البرنامج الموسيقى .. غالبا أنام على صوته كل يوم
فعلا عندك حق .. الراديو جهاز يسمح للمستمع باستخدام خياله ..بينما التليفزون .. فهو جهاز لصنع البلاهه
مسألة بقى سرحانك و الراديو اللى شغال عمال على بطال ده .. هو ده بقى يا فالح اللى خلاك تخلص الجامعه فى سبع سنين
إكرام
عاجبني جدا إحساسك بالموضوع واضح اننا علي نفس الموجه ههههههههه
-------------------------
الفارس القديم
انا برضه اتريت علي مونت كارلو ولندن وصوت أمريكا ولسه هتكلم في الموضوع تاني بتفصيل أكبر
وبعدين يا فالح انا ما خدتش الجامعه في سبع سنين
بتطلع عليا إشاعات
ماشي
يا نهار اسود
فخامة الرئيس بيرسم على الرقيقة رشا لتكون السيدة الأولى
طب يمين تلاتة لاقول للسيدة التانية (واللي برضه بالصدفة البحتة اسمها زيها) وتبقى فضيحتك بجلاجل يا فخامة الرئيس
رشا الرقيقة محدش يقرب منها يا بشر أنا حاجزها واللي هيقرب م المنتئة دي هقطعه
يا ريس عيب كدة أنا برضه المنوفيتشي بتاعك قصدي الميديتشي ومينفعش نخبط في بعض
وبعدين لازم نحافظ على تنسيق المواقف عشان دكتاتورية البروليتاريا ما تنهارش والواد البرجوازي المتعفن يشمت فينا
إنت عايز تكون حجر العثرة في وجه الحتمية التاريخية ولا إيه؟؟
وبعدين أنا مش فاهم ليه عاوز تكوش على كل "الرشاشات" اللي في الدنيا؟
يا إبني إفهم
هي طلبت مني منصب في دولتنا القادمه
وانا لقيت ان المنصب المناسب ليها واللي ما فيهوش مجهود هو منصب السيده الأولي
وهو تقضيها فسح طول السنه خصوصا انها مش حمل سياسه والكلام الفاضي ده
صباح الخير يا عمرو ... صباح الست فيروز اللي مش بفوق غير على صوتها اللي بجد يوديك دنيا تانية و ينسيك اي حاجة في الدنيا .. بجد انا مفتقده فيروز و اغانيها لما كنت بسمعها مع اعز اصحابي ساعة العصاري مع فنجان القهوة و الحكاوي .. ميرسي يا عمرو انك فكرتني بكل ده ... و طبعا اختيارك للراديو كان في محله .. انا يمكن مش ليا ذكريات كثير مع الراديو .. بس فاكرة مثلا اني اول ما سمعت ام كلثوم و حبيتها كانت اغنية سيرة الحب .. كانت في الراديو في سيارة تاكسي في اسكندرية الساعة 3.30 الفجر و من يوها و انا بحب الست و بحب الراديو و محطة الغناء العربي ( الكويت ) لأنها بتتحفني دايما بفيروز و ام كلثوم .
على فكرة من الواضح ان انت و الحاج جرجس بيتين على مدونات بعض .. طبعا ما انتم اللي هتقلبوها و تقعدوا على تلها .. و احنا الشعب اللي هنهتف وراكم ... ميرسي تاني يا عمرو و الف مبروك على ظهورك على جهاز التلفاز انت و الدكتور الهمام ... و عقبال الرياسة و التوريث و احنا معاكم مش بس وراكم طول ما القلب بيدق و الرئة فيها نفس .
النديم
ازيك يا عم النديم
على فكرة كل جيلنا والجيل اللى قبلك كمان اتربينا على الراديو واحنا الصبح بنسمع طريق السلامة وتتبعها اغنية بالسلامة يا حبيبى
ومازلت اسمع صديقى الفيلسوف
والصوت الناعم يقول كان لى صديق فيلسوف باقوال الحكماء شغوف
وصوت ابلة فضيلة فى برنامجها المحبب
ما زال هناك اصوات لا يمكن ان ننساها ومرتبطة مع كل واحد بذكرى يحتضنها
انا عاشقة فيروز مثلك
الحديث عن الراديو لم اكن اتوقعه بهذه المصداقية والرقة تصورت ان الراديو له ذكرى معينة كجهاز لم اكن اتصور انك كنت تسبح معه بعيدا فى خيالاتك وفى محتواه
ده يا جماعة عمر من جواه للى ما يعرفهوش
سيبكم من عمر الصامت الذى يضنى بحديثه عندما لا يعجبه الحديث
بس لما يحب يتكلم ببساطته يقول كلمات رقيقة بسيطة على الوتر على طول زى لعب ريشته على وتر العود
قاموسه اللغوى ثرى لكن يعرف متى يستخدم الكلمات
تحية يا عمر خاصة من عاشقة فيروز
عزيزتي توتا
أشكرك على كلماتك الرقيقة وتشجيعك الحاني لي... منذ البداية عندما أسست هذه المدونة كان هدفي أن أعبر عن مكنونات ذاتي براحتي دون أن يمنع لي الديسك مقالا أو يغير رئيس تحرير حرفا مما أقوله... ومن ثم يتمكن قرائي الأعزاء من أن يروا جوانب في لم يروها من قبل
الراديو يا رفيقة توتا هو جزء من مشروع المقاومة خاصتي... وسأدعم الراديو في مشروع قومي سأسميه الترانزستور للجميع وسيكون طبعا برعاية السيدة الأولى رشاالنديم
وستكون رواية الحمامة لباتريك زوسكيند هي الرواية المقررة على تالتة ابتدائي وهي رواية عن شخص يجد صعوبة في التكيف مع العالم
وسألغي كتب التاريخ وأضع مكانها عدة كتب من التي تحكي التاريخ الحقيقي للعالم ككتاب "سيبرأني التاريخ" وهو مرافعة الرئيس الكوبي "فيدل كاسترو" عن نفسه بعد فشل انقلابه
وسأعمم كتاب لرسومات ناجي العلي ليكون هو كتاب التربية الثورية فهذا الكتاب تعلمت منه دور الشىء البسيط في فعل المقاومة
الدولة للأسف يا توتا تتعامل مع الراديو باستخفاف من حيث تأثيره علي الرأي العام، حيث مازال تأثيره محدودا، وذلك بالطبع يرجع الي ارتفاع نسبة الامية، التي هي في مصلحة هذا النظام، والا من اين يأتي ايضا بجحافل الامن المركزي وكل واحد منهم معاهوش ترانزستور طبعا، والسلطة تري ان الحركة الرايوهية طالما في اطار النخبة اللي بتسمع راديو، فلا خوف علي النظام منها، ولكن لو راديو مثل الذي ادير محطاته يوجد في حي شعبي، كانت السلطة ستتعامل معه بشكل مختلف.وأري ان الموضوع مثل الاواني المستطرقة، سينما جادة، وكتب جادة، وصحافة جادة، وراديو جاد وسوف يؤدي كل ذلك الي رأي عام جاد، يؤدي الي تفتيت سلطة وفاعلية المؤسسات الصحفية، وقنوات التليفزيون، التي تعمل علي تشكيل الرأي العام لحساب هذا النظام
بحكم كوني دارساً للتاريخ أري اننا نعيش في مصر في عصر انحطاط، في كل شىء، والفساد هو قانون الدولة، ولكن هناك بوادر ايجابية كثيرة، منها نزول الناس الي الشارع وكل واحد ماسك الراديو بتاعه في إيده... وبكدة يبقى احنا بدأنا انتفاضة الرداوي
وهي لن تقل قوة وتأثيرا عن انتفاضة الحجارة
ليه؟
حسبة بسيطة
لو كل طفل كان ماسك في إيده حجر واحد وعملوا الانتفاضة المرعبة بتاعة 87 دي تخيلي لما كل مواطن في إيده راديو وف أي لحظم ممكن يطلع من بطنه مش حجر واحد بل حجرين!!!ـ
يبقى انتي بتتكلمي على مقاومة حياتها أطول
وبرضه للي بعد الانتفاضة عايز يستفيد بالحجرين ممكن يبقى يشربهم
ويعمل دماغ راديو محترمة
أنا مبحبكش أتكلم عن نفسي كتير وعشان كدة كلفت الواد جرجس هو اللي يكتب الرد دا بالنيابة عني
وأوعدك بإن بسبب دماثة أخلاقك دي يا رفيقة توتا هتمسكي منصب معتبر في دكتاتورية البروليتاريا بتاعتي
النديم
بيد الحاج جرجس
جرجس يد النديم فى التدوين
تحية حارة جدا على نقل فكر النديم على الورق حتى كتبه المفضلة اقتبستها
وبصراحة الراديو ابو حجرين ماركة افيرريدى طويل العمر يطول عمره وينصره على مين يعاديه هيعمل شغل جبار فى الانتفاضة دى
بقى بتتريق على رواية باتريك ودى من معشوقات النديم
الراديو يا رفيق جرجس بما انك هتكون معانا فى نفس الديكتاتورية
صوت الامة الناطق بس ده لو نطق كلام عدل اما على حالته دى اعتقد النديم هيعمل اذاعة واحدة اذاعة فيروز والباقى ملهوش لازمة
انت فين يا عمر من اللاستيطان الحادث لمدونتك والاحتلال التام بدون شروط
ماشى يا جرجس لنا حرب فى مجلس الوزارة
تحياتى
مضوع الراديو ده ممكن اكون مش معاك فيه أوي بس فيروز عندك حق و لو كنت بتحب الراديو عشان خاطر هو اللي عرفك على فيروز برده ليك حق
هوا احنا يا جدعان قادرين على توتة واحدة لما نقدر على توتا وتوتة توتة؟
محسسني إني قاعد تحت شجرة توت
أهلا بكل التوتات
النديم من دون رئيس ولا حاجه
ومش حكولك عمر باشا ولا عمر افندي ولا
ولا عمورتي ولا اي حاجه انا تقول لجرجس
يا إبني إفهم
هي طلبت مني منصب في دولتنا القادمه
وانا لقيت ان المنصب المناسب ليها واللي ما فيهوش مجهود هو منصب السيده الأولي
وهو تقضيها فسح طول السنه خصوصا انها مش حمل سياسه والكلام الفاضي ده
فاكرني مش حشوف الكلام ده
شايفني خسايه
انا اتنازل عن المنصب
حفظا لكرامتي الي بعزقتوها انت وجرجس
انا مع الفارس للابد
وحيجوزني البطل
وبعدين تعالا هنا يا جرجس وبرضوه لا حاج ولا استاذ ولا اي حاجه
انا اطلع السيدة الاولى والتانية
ياخي كرامه وبعزقتوها كمان
......
عيب استحو
ريكااااااااا
والله زمان وحشتينا
أولا أنا إسمي عمر مش عمرو
ثانيا جميل قوي اللي انتي كتبتيه عن علاقتك بالموضوع وانا بصراحه مبسوط قوي ان الموضوع نشط ذاكرتنا كلنا للتفاصيل والذكريات الحلوه
صدقوني
كل ما الحياه كانت أبسط بتبقي أجمل
تحياتي
--------------------------------
توتا صديقتي
(علي وزن هاله حبيبتي)
يا ستي أبه بس الكلام الكبير ده
ده انا واحد علي باب الله ومش حمل الكلام ده
ما تكتبي حاجه عن علاقتك بفيروز في المدونه بتاعتك وتكون دي أول طلعه ليكي في عالم التدوين أيه رأيك
بالمناسبه لو كان جرجس هو أيدي في التدوين زي ما حضرتك بتقولي
يبقي أقطعها احسن
هههههههههههه
-----------------------------
أما لص بغداد الشهير بالحاج جرجس فمن الواضح أنه يختار مصيره بنفسه
يعني انا قاعد اصنع منك نجم تليفزيوني واشهرك واخليك شخصيه عامه وأخرتها برضه مبرطع في المدونه ومش ناوي تجيبها لبر
طيب يا حبيبي
أكيد في مزرعه طره هتندم علي اللي عملته
-----------------------------
توتا توتا
أظن رد جرجس علي حضرتك أكثر بلاغه من أي حاجه ممكن تتقال
بس نورتينا
وعموما طبيعي جدا ان ما يكونش ليكي علاقه كبيره بالراديو
ده فرق أجيال يا عزيزتي
خالص مودتي
----------------------------------
سيده مصر الأولي وست الكل رشا
أنا بهزر والله يا ست الكل
وحبيت يعني اقول أي كلمتين اسكت بيهم الواد جرجس بدل ما يقول لمراتي واللا حاجه
مكانتك محفوظه يا ست الكل طبعا
بس انا متفق معاكي انك لازم تقاطعي جرجس علي الكلمتين اللي قالهم
انا لو مكانك ما اعرفوش تاني بصراحه
إزاي يقول عليكي السيده التانيه وتسكتي له
سلام يا سيده العزبه الأولي
النديم ورشا اتفقوا عليا
يا نهار اسود
وبعدين يا رشا الواد أكرم ابن الفارس ده من دور أولادك يا أمي
يعني أنا اللي باقي لك
أما عن النديم فهو مش ناقص أي رشوات (جمع رشا)
اللي عنده كفاية وبعد كدة هيجيله ترشرش في الشرايين
يعني م الآخر انتي تفكري كويس يا رشروش ومش هتلاقي غيري في الشلة دي ينفعك
وبعدين منصب السيدة الأولى دا مش بيكسب زي ما انتي فاكرة خليكي سيدة ميديتشي تكسبي من ورا الميديتشي أكتر
دا الميديتشي دول هما اللي بيمشوا صاحب العزبة وبينهبوها بجد
يا عم النديم سيبك من الكلام والصراع على الجنس اللطيف
ما قولتليش إيه رأيك يا زعيم في انتفاضة الرداوي وفي الحديث الذي أدليت به نيابة عنك؟
مش بذمتك كلامك وروحك تكاد تفط من جواه؟
طب لعلمك انت بس اديني الباسورد بتاعتك وأنا أدير لك المدونة دي على أكمل وجه وأخليلك الزباين فيها زي سوق العتبة
عمر العزيز
موضوع جميل , بكون سعيدة لما بتكتب عن الاشياء اللي بتفرحك
وسعيدة اننا نشترك في حب فيروز وزياد انا وانت , دي عايزالها قعدة في الجريون عشان ندندن مع بعض
من يومين كنت طالعة في التاكسي لاقيت السواق مشغل بحبك يا حمار من الأسف اننا وصلنا لهذا المستوى الرديئ والمنحط وانة يفرض علينا ان نسمعة
سلام
انت كمان ليك وحشة يا حامي حما الوطن و طبعا لن أنسى سيدة مصر الأولى و المديتشي الكبير .. وجدير بالذكر طبعا فارس قديم ( أبو البطل و الرجل )
اولا : سوري على الخطأ المطبعي يا فندم .. معلش بقى العتب على النظر
ثانيا : موضوع الذكريات ده جامد اوي .. كل ما تحصل حاجة تفكرني بذكرياتي مع اقرب الناس ليا بحس بنشوة غريبة .. بحس بتفاؤل غريب .. و بما ان معظم ذكرياتي كانت فيروز و اغانيه الخيالية بتلعب دور أساسي فيها .. عشان كده بحب فيروز اوي و كل ما احس بوحدة ترجعني أغانيها لذكرياتي و انسى اي احساس بالبعد او الفراق او الوحدة .
*حج جرجس : هو موضوع انك تخلي الزياين زي سوق العتبة مقصور فقط على الرئيس المبجل و لا ده opition لعامة الشعب اللي زينا .. انا عارفة انك مشغول بس هتعمل ايه بقى احنا الشعب و انتم في خدمتنا و لا انتم شعاركم ايه المرحلة الجاية ؟؟؟ :)
سلام
عشتار.... الم تعلمي ان الحمار اكتشف حديثا بانه اذكى مخلوقات الارض؟ لكن لديه مشكلة ان رد فعله بطئ.... يعني ياريت لو حكامنا حمير كانوا رحمونا والله
الصديق عمر قناوى
انا اكتشفت المدونة بتاعتك من خلال مدونة الحاج جرجس وبالتحديد من خلال حوار جريدة الوفد
انا مع سيادتك تماماً فى ان الراديو من اعظم منجزات القرن
الراديو هو محطة البى بى سى و اذاعة البرنامج التانى الغريبة جداً دى... اللى كانت دايما بتذيع مسرحيات مترجمة من الادب الروسى فى انصاص الليالى،واللا بر امجها الحوارية التى لا يضاهيها فى الملل غير البرامج التعليمية.. بس حلوة ....
وافتكر كمان اذاعة القرآن اللى جدى كان دايماً مشغلها ليل مع نهار واللى خلى كل ذكريات الطفولة المرتبطة بجدى تتداعى كلما سمعت صوت واحد من مقرئين اذاعة القرآن او مقدمة برنامج من برامجها اللى متغيرتش من سنة 86
وفيه كمان برنامج الى ربات البيوت وابلة فضيلة وعلى الناصية ...
برامج الاذاعة دى عالم.... شريط موازى للتاريخ الشخصى لكل واحد فينا ... بتكلم على الطفولة يعنى وشوية من المراهقة على اساس انى نادرا ما بسمع الراديو الان واعتقد ان دا حال كتير مننا
تحياتى يا نديم
ناهد
الحاج جرجس
بالنسبه للحديث الذي وقعته نيابه عني
فانا طبعا كنت هموت من الضحك كالعاده
منك لله
--------------------
عشتار
وحشتينا والله
ميرسي يا ستي وانا والله نفسي اشوفك بصحيح
يا ريت تفضي نفسك ونشوفك قريب
تحياتي
------------------------------
ريكا
الله يخليكي يا ستي
وبعدين الله يكرمكم بلاش الكلام الكبير بتاع حامي حمي الوطن والحاجات دي أحسن ياخدوها بجد
وانتي عارفه العالم دي ما تعرفش ابوها
سلام يا زعيمه
وتحياتي
-----------------------------------
المواطن الخفي
نورتنا
------------------------
ناهد صديقتي العزيزه
مرحبا بكي في مدونتي المتواضعه
ويارب تعجبك
تحياتي
صباح الشوكلاته بالكراميل :):) ميرسي انك عديت عليا يا عمر و رديت على كلامك عندي .. و خلاص مش هاقول تاني الكلام الكبير اللي بالي بالك يا ... و لا بلاش خلاص ... طيب لو قلنا يا خارب اراضي الوطن و سارق فلوسه .. تفتكر ايه اللي هيحصل ساعتها .. اعتقد انك ممكن فعلا تبقى رمز من رموز بهية الاكابر و لا انت ايه رأيك ؟؟
نديم المواطن الخفي أنا بس ما اعرف ليش اختفيت عندك؟ والله انا ما خفيت نفسي
الراديو ده أختراع رائع
بل أن الراديو مرتبط بثقافة الناس
أفهمك زمان لما الراديو كان الوسيله الأولى للتسليه كان الشعب أكثر ثقافه
مع تقدم التكنولوبيا ضاع الراديو كذلك ضاع الكتاب وضاعت الثقافه
تانى أختراع مهم هو الغساله الفول أوتماتيك
معندكش كتاب عن الطبيخ وأثره فى تقدم الشعوب
العزيزة ريكا
العرض ساري لجميع طبقات الشعب الكادحة
إدين إنتي الباسورد بس وما تقلقيش
وبعدين إنتي مش بتيجي عندي تدوني ليه؟؟؟
=======================
العزيز عمر
شفت الأخت ناهد اللي جاية تعلق هنا يا باشا؟
بسبب دعايتي ليك يا حلو
يعني أفضالي عليك نغرقاك وما تنكرش
مش تعايرني وتقول لي هاشهرك ووديتك التلفزيون وانت آخرك هتودينا المعتقل
اللطيف في القصة إن الأخت ناهد عرفتك من عندي وجات دونت عندك مع إن عمرها ما عملتها عندي
حظووووووظ
على رأي عبسلام النابلسي
=========================
العزيزة عشتار
لأ معلش
كله إلا أغنية بحبك يا حمار
دي الأخ فارس بيقترح إنها تبقى النشيد القومي
الدكتور الهمام اللي شايل هم البلوجرز كلهم على كتافه / الحاج جرجس
بجد مش مصدقة نفسي انا جيالي دعوة عشان اجي في المدونة عندك لا و ايه منك شخصيا ... ده كثير اوي يا جماحة .. بس للعلم فقط انا فعلا بشوف المدونة عندك على طول بس كل ما افكر اعلق عندك تجيلي حاجة تشغلني .. بس خلاص يا فندم .. كلام سيادتك أوامر .
اما الجزء الخاص بالباسوورد ... فأنا عندي اقتراح جديد .. انا جاهلة بعلوم البلوجات الى حد كبير .. يعني يادوب عملت المدونة بتاعتي بالعافية .. فانا اتعب سيادتك و تعملي واحدة جديدة و ساعتها هاستغلك عشان تعلمني أب تدوين .. لو مش في مانع يعين :):)و تبقى شركة ما بينا ... ايه رأي سيادتك ؟؟
جرجس قال لى انك بتشرب سجاير ال م
فانا قلت له طاب ياجرجس ..عمر ما ينفعش يشرب مرلبورو.لان احتمال مالقيش ال ام فى نيويورك..جرجس قال لى اتصرف..علشان الحاج عمر مزاجه كده..
واتضح يا صديقى من دماغ الراديو دى انك فعلا دماغ
كان فى برنامج فى الراديو يا عمر الساعه 2 باليل بتاع بثينه كامل..بس مش فاكر اسمه..كان الناس بتصلوا يحكوا عن مشاكلهم وغراميتهم..
اسمه ايه البرنامج ده؟
الأخ العزيز : ـ عمر النديم
بعد كل هذة التعليقات والرغى ، وسرد كل شخص لقصة حياة الراديو فى حياته ، وبعد كل هذة الحكاوى والقصص التى حدثت بين المدونين والأشخاص المعلقين على هذا البوست بينهم وبعض ، تسمح لى أن أضيف تعليقى الخاص : ـ
أكيد بالطبع الراديو شئ مهم جداً فى حياتنا لأننا كلنا فى طفولتنا لم يظهر الكمبيوتر والإنترنت فكان بالطبع الراديو شئ مهم فى حياتنا وبالطبع أكيد كل شخص منا له ذكرياته السعيدة مع أبلة فضيلة وأنا أيضا كنت أحب أسمع الراديو عادة قبل النوم وكثيراً كنت بانام عليه ، على البرنامج الموسيق عادة
ويا ريت يا عم الحاج جرجس تاخذ بالك من ألفاظك شوية ، ذاكر فى تعليق واحد كلمة جمال ، وكلمة الرئيس ، يعنى هى الدنيا ضاقت عليك ولم تجد من معانى اللغة العربية الا هاتان اللفظين ، لازم يعنى تذكرنا بهذة السيرة العطرة ، العملية مش ناقصة والنبى
أما بالنسبة لصاحبك هذا يا عمر والذى فاكهته المفضلة هى الجوافة فالمسألة فى الأول والآخر أذواق ، وأنا على فكرة بأحب الجوافة قوى بس مش هى فاكهتى المفضلة ، أنما فاكهتى المفضلة هى العنب ، بس مش العنب بتاع سعد الصغير طبعاً ، أنما هو العنب البناتى طبعاً
الله الله
أغيب يومين عن المدونه ارجع الاقيكوا احتليتوها وقلبتوها سيرك
ماشي
براحتكوا
ليكوا مدونات يترد عليكم فيها برضه
--------------------------------------
ونبدأ بريكا
ميرسي علي الشوكولاته بالكراميل يا ستي وبعدين هو انتي ما عندكيش وسط أبدا
يعني من حامي حما الوطن إلي سارق الوطن
انا ضائع في الوطن
-----------------------------
إكرام
مشاغل والله بس غصب عني وراجع لكم
-----------------------------------
الست أوسا
نورتي المدونه أخيرا
علي فكره ربطك بين الراديو والكتاب في منتهي الذكاء
أحييكي
وثانيا موضوع الغساله الفول اوتوماتيك
انتي تاني حد يقول نفس الجمله دي
مراتي برضه شايفه ان الغساله الفول أوتوماتيك هي أهم اختراع علي الإطلاق
واضح ان الغسيل عامللكوا عقده نفسيه
أو تكونوا غاويين تناموا علي صوت الغساله مثلا
ما انتوا لازم تفسروا لي الموضوع ده
-----------------------
إبيتاف
أهلا بيكي
علي فكره من الطبيعي جدا ان جيلكم يكون مالوش علاقه قوي بالراديو
ده التطور الطبيعي للحاجه الساقعه
بس انا بيتهيألي من خلال تصوراتي عن شخصيه حضرتك ان حضرتك والراديو ممكن تبقوا أصدقاء حميمين جدا
جميل االي حضرتك كتبتيه عن الموضوع
أما بخصوص ردك علي المهاجر المصري
فالإجابه صحيحه
وتكسبي معانا الألف جنيه
اتصلي بجرجس يديهوملك
وخليه ينفعك
المهاجر المصري
نورت يا معلم
مش لازم تتعب نفسك وتجيب سجاير ولا حاجه المهم توصل بالسلامه يا معلم
البرنامج فعلا كان اعترافات ليليه واظن ان إبيتاف ردت وقامت بالواجب
تحياتي يا أستاذ
الحاج جرجس
حظوظ ؟
بتقر فيها يا فالح؟
هو انا ناقصك
طيب ماشي انا هريحك خالص يا عم
من هنا ورايح انا هكتب الموضوعات واسيبك انت ترد
وبعدين استني هنا
يعني انا اتجوزت وخلفت وسيبت لكم الملاعب نهائيا
وبرضه مش عاجبكم؟
طيب اعمل لكم ايه تاني
إسلام حبيبي
مرحبا بك يا معلم في بيت الأمه والأمبراطويه التي لا تغرب عنها الشمس اللي هي مدونتي
فيما يخص صاحبي اللي فاكهته المفضله الجوافه
انت اتحمقت كده ليه عشانه هه قول
إوعي تكون انت كمان يا إسلام زيه
وديني ما اعرفك
سلام
تمام يا نديــم ما تقلقش من مــوضوع السجايـر ..اخوك عامل زى عربيه البطاطا علطول دخان طالع..
البرنامج اه كان اسمه اعترافات ليليه
ايبيتاف شكلها من بتوع زمان
بس كان فى مسلسل بيقولو فيه..انا البردعى يا رشدى..فاكره المسلسل ده..
تحباتى يا مان
واشوفك ان شاء الله كمان شهر ونصف
عم المهاجر
مساء الورد
طبعا فاكر المسلسل يا زعيم
المسلسل كان اسمه وبدأت العاصفه أو وهدأت العاصفه كان بطوله عبد الله غيث وليلي علوي وحسن مصطفي
واتعرض سنه 84
تحياتي يا زعيم وتيجي بالسلامه
هههههههههههههههههه
يخرب بيت دماغك يا نديم..صح المسلسل ده كان بتاع عبد لله غيث..
تحياتى يا مان
اشوفك ان شاء الله على خير
يا ابني أنا مش فاهم
أنا أقعد أرتب واعمل أفشخانات عشان الرأفتاني المهاجر يظبط لنا قد خمس ست خراطيش سجاير إل إم وف يالآخر انت تقوله ما تشغلش بالك بالسجاير
أنا رأيي بلاش انت خالص يا عمر يا حبيبي ترد ع الزباين خالص وتجيب الباسورد ونخلص
دا نا عملت اللي أخوف الراجل واقول له سيادة العقيد عمر باشا قناوي هيعكمك ع البوكس وهددته بعصاية المقشة وكلام جامد
وفي الآخر تقول له ما تشغلش بالك بالسجاير المهم ييجي بالسلامة
لأ يا راجل زعلتني
-------------------
بص يا رأفت
هات يا ابني معاك كل اللي تقدر تجيبه
ما خف حمله وغلا ثمنه يعني
وبعدين كله ما انت عارف هيبقى لمرتادي الإمبراطورية
وبعدين مش كفاية إننا هنعفك ببيرة (أصدي خيرة) شباب البلد
ههههههههههههههه
تيجي بالسلامة يا عم الحاج
ويا جماعة اللي مقراش البوست الآخراني بتاع الرأفتاني في جريدة المهاجر المصري
يروح يقراه بسرعة
البوست مسخرة
واسمه تعددت الأسباب والسجن قادم
واللازمة الأساسية فيه هي
يلا إركب البوكس
والله يا جرجـــس كما انا مشتاق لزيــاره الامبراطوريه النديميه الجرجسيه العمريه القناويه...
ده تلاقــى الامبراطــوريه دى كلهــا دخان ازرق فشـــر فيلم العار
إنت يا عم المهاجر
اولا مساء الخير
ثانيا يا سيدي الفاضل الإمبراطوريه دي مكان عام ومحترم جدا في مصر
وشكرا
ونشوفك علي خير يا أستاذنا
مسـاء الخير يا نديـــم
يا حاج انا متأكد انها مكان محترم..مش انت وجرجس بتروحها؟
تبقى طبعا مكان محترم
ان اسف لو كنت فهمت معنى الدخان الازرق غلط
انا كده لسانى عامل زى المدب بأحدف دبش
عم المهاجر
ولا يهمك يا حبيب قلبي
أنا برضه مدب في الكلام
عادي جدا يعني
صباح الفل
توضيح هام لكل رواد الإمبراطورية
الإمبراطوريه دي مكان عام ومحترم جدا في مصر
وشكرا
مش فاهم أنا بس الناس دي إيه يا رفيق عمر
دخان أزرق؟
هو بس يمكن قصده على الإل إم الزرقا على أساس إنه معتقد أن دخانها بيبقى أزرق
لأ الظريف إنك حتى وانت بتبضن على الواد رأفت عمت على عومه وبتقول له الإمبراطورية يعني حتى ما قلتش المكتبة
ههههههههه
عم رأفت ده تبعي وواد محترم أوي من بتوع اسكندرية ومن بحري وبنحبوه وأحيه واستناني ع القمة وسلفني تلاتة جني (مش جنيه هما بيقولوها جني) يعني محدش يقرب منه
وبعدين هو كان بيهزر يعني منطلعش عليه بقى ببشلة وموس من تحت لساننا ونقطع له وشه
يا عم النديم انت واحشني بجد
إنت يا لص بغداد يا جرجس
أولا
أنا عارف كويس جدا ان الأخ مهاجر شخص في منتهي الأحترام
وما كنتش مستني انك تقول ده يا فالح وبطل تصطاد في الميه العكره
ثانيا بقي وده الموضوع الغريب
الناس أو جمهور المكتبه تحديدا ابتدوا ينسوا كلمه سندباد وبقوا يرددوا كلمه الإمبراطوريه باستمرار
تسأل الواحد من دول انت رايح فين
يقوللك انا رايح الإمبراطوريه
جاي منين
جاي من الإمبراطوريه
مسأله محتاجه تحليل يا معلم
وانت واحشني جدا جدا بس انا ملخبط قوي
يا ريت اشوفك قريب
بما أن المسألة محتاجة تحليل
هات أنبوبتين اختبار وخش جوة املاهم لي وهات عينة وحصلني بالميكروسكوب
يوه ه انا زهقت بقي ساعة بحالها اقرا كلام عمر واخى ف الله الحاج جرجس، عاوزة اتكلم كفاية كبسين ع نفسي من بدرى، اول مرة شفت موضوع عمر عن الراديو، هرشت دماغى ونكشت شعري،وقولت اكتب ولا لاء؟ ف الاخر قلت خليني ف موضوع بق الاسد و مناقصة المقشات كفاية، بعدين احسن لو كتبت عن الراديو هيقولوا البت دى هبلة هو فى حد بيسمع راديو؟ طب دا عمر خلقت ربنا، لكن انا مليش حجة، ومع ذلك النهاردة شفت عمر واول حاجة قلتها بما اننا بنقعد ساعات مع بعض لكن زى المتخاصمين، معرفش ليه؟ شكله شاكك فيا احسن اكون مخبر، بما انى دايما شايلة جرنال، وفى عصايا ف ايدي، واحيانا شال اكبر منى حوالين قفايا ونص وشيي،لكن ما علينا، الراديو بالنسبة لى احلى حاجة ف الدنيا، واول اغنية سمعتها فيه كانت مسا الخير والسعادة ع السكر الزيادة واللى يشربها سادة ملوش مكان هنننننا بصوت وردة، بعدها كان برنامج ابلة فضيلة ع الصبح قبل ما اغسل وشي، الذي اصبح نادرا ما اغسله،الحكاية بقي ايه، ان اول راديو امتلكته بفلوسي، من اول تحويشة عمر اللى متكررتش،كنت ف خمسة ابتدائي، ومن جنان ابويا بالراديو كنت باخده معايا المدرسة، والم العيال ف الفسحة، وكنت بمشي منهم اللى ميعجبنيش، واللى يقعد زى الجزمة يسمع يقعد، لكن يا فرحة ماتمت لي ابن خال، الله يعمل فيه ويسوي، استلفه لفة يروح به الجيش، من ساعتها مشوفتوش، لم ينقذه منى بما انى مفترية غير ان جدتى، المثقفة الوحيدة ف العيلة وعدتنى بشراء راديو غيره، اذا نجحت اخر السنة، وقد كان، تخيلوا واحدة تدح طول السنة عشان راديو؟ شوفتوا اهبل من كدة؟ طبعا لا،اما احلى الذكريات مع الراديو، لما سافرت خارج الحدود،الى اطاليا(يرحم ايامك يا اطاليا)مبعرفش ولا كلمة طليانى، الناس بترطن ف كل حتة، وايدي بقت بتاكلنى، عاوزة اظبط كام موجة ان شااللة حتى الFM،امرى للخالق، طشاش ولا العمي كله، واخيرا اقنعت رئيسي انطونيو بن تريزا، انه يجيب لنا راديو، قال لى بس مش هتفهمى، قلت مش مهم المهم اسمع شخولة المحطات اللى مبتتظبطش،بعدها نقلت الاختراع ف البيت، كان المكان الوحيد اللى اقدر اسمعه فيه، تخيلوا فين؟الحمام، اه والله الحمام، علشان اسمع الراديو بس، واتعلمت اللغة مخصوص عشان الراديو، واول مرة اتعامل مع البوليس كان بسبب الراديو، الست اناليزا جارتى، ودى كانت ف الخمسين بس لسه موزة فيها الرمق، وشغالة بتاعة كله، مافيا ودعارة على ودنه،طلبت لى البوليس لان غرفة نومها كانت تحت الحمام بتاعى فكانت بتسمع الراديو، اللى ايدى تلمسه اول ما اسيب السرير وقبل ما اغسل وشي، كان يوم سبت الصبح، لقيت البوليس ع الباب، والست بتردح لى وانا معرفش هى بتقول ايه؟لحد البيه الظابط، ما دخل بنفسه الحمام وطفي الراديو، وعمل لى محضر، بعدها غيرت مكانه بقي المطبخ، يا سلام الصبح واحد قهوة، مع صوت اذاعة msr، وصوت فاسكو روسيي ف اغنية البا كيارا، تجنننننن، وقدامى شباك صغير ، وحواليه جبال الالب، يا لهوىىىىىىىى، عقبا لى يارب، والحاج جرجس، وعمر باشا،لكن طلع لى عفريت طبعا، وهى ان جارى اللى ف الشقة اللى جنبي خلاص مطرطق ودانه كل يوم الصبح لان المطبخ بتاعه قريب من مطبخى، طب اعمل ايه؟بقيت كل مرة اشوفه يشكوى من راديو، اعمل فيها عبده العبيط، وان مبعرفش اذيد من تشاو(يعنى سلام)لحد ما كبر دماغه، لكن بما انه ف دمى، كان بالصدفة فى محطة اذاعة ف المدينة، مشهورة شغالة لمدة 28سنة، بشكل تطوعى بتذيع باللغات كلها ومن ضمنها العربي، ولانى المصرية رقم 11، خمسة منهم فاتحين محل بيتزا تحت العمارة اللى انا فيها، المحطة عملت معايا حوار، عن ايه اللى جبنى ف الحتة المقطوعة دى؟ (مدينة بولزانو قرب الحدود الشمالية لايطاليا)كان فريق البرنامج العربي، كله مغاربة، وبما انى جاهلة مغربي اتكلمنا انجليزي، البرنامج كله كان عن موسيقي الراي كل اسبوع، هى هى الاغانى(ناصر الداودى)ودا عند المغاربة فى الدار البيضاء بالذات منطقة الشيخ حجيج،ولا عبد الحليم ف زمانه، بعدها سالونى ممكن اشترك معاهم ف يوم تانى وتالت، بعدها انا قلبت البرنامج سيرك، و اول اغنية كانت لفيروز، بعضها الشيخ امام البحر بيضحك ليه، البرنامج سمع لحد ميلانو، وعلشان خاطر الحاج جرجس، كان فى حاجات كتير عن بق الاسد والبيه وابوه، خصوصا اوقات الانتخابات، بعدها الاخوة المغاربة، خدتهم الجلالة واتعدوا منى (بما ان الحاج جرجس دكتور)و بدأوا يشتغلوا ع الواد بتاعهم اللى مسك بعد ابوه، وكانت هيصة ، وتحيا الراديو، وكل راديو هنا وهناك،طبعا يا اخ جرجس انا من جيل اعترافات ليلية، ونادى القلوب، كنت بسمعها ف البلكونة، عشان اعاكس بن الجيران، الله يمسيه بالخير،!!كفاية اعترافات ،المهم يا حج جرجس دلوقت انت بتقول لعمر يا ريس هل معنى ذلك اننا هنفذ مشروع المقشات ده معاه؟ ولا السيدة الاولى طنط رشا هتدخل؟اعتقد انها هتكون فى صفنا، وتقول يلا ريحونا منه خلى الواد يشوف نفسه، ويدلع دا ف سن حرجة واتعقد بما فيه الكفاية،ويمكن هى كمان تساندنا ف موضوع المقشات، واحتمال وارد انها تدفع تمن 70مليون مقشة، من البوك بتاعها اللى ف سويسرا، وهتتضامن معها، وتوصي حبيبنا انه ميقبوضش علينا الا بعد ما ننفذ مهمة المقاشات، وهتتقلب مراجيح، وكدة كدة هنتخذوق!!
اه على فكرة نسيت اقول لكم واطمنكم بما انى بدات اول اسبوع شغل ف المجتمع المدنى، بعد غياب سنتين، موضوع المقشات اتحل لقيت اننا ممكن نجيبهم بسعر مخفض، المهم استعدوا للتنفيذ، خصوصا ريكا وتوتا، وعمر، والحاج جرجس،خلاص انا هسلم البروبوزل، وهيكون فيه فند وفننن funnn، وهنشوف اللى (...(الحمرا
وتحيا الوحدة العربية، والصليب مع البطيخخخخخخخخخ، وتصبحوا ع خير
randa
نداء إلى السيدة الفاضلة راندا فاتنة روما ومحطمة قلوب شباب ميلانو
لا تشتري المقشة التي أرسلتي الواد عمر في طلبها
المقشة دي من النوع القاتل
فهي تتوغل وتنتشر وتنتشر وتستمر وتستمر وتستمر
ودا خطر جدا على صحة المجتمعات النامية اللي في سن مجتمعاتنا
أنا عاجبني جدا موضوع الراديو اللي فتحه الرئيس عمر النديم دا
شفتي ازاي كل واحد عبلا عن مكنوناته الداخلية وطلع درر من كنوز ذكرياته التي كانت مجمدة في فريزر العمر؟
أتمنى من فخامة الرئيس يتحفنا دايما بالمزيد من البوستات على هذه الشاكلة
يا بت يا راندا
لازم تعملي مدونة عشان تحكي فيها عن بلاويكي في إيطاليا ومغامراتك مع الشوباب المراهق في روما ويلانو وعلى الحدود الشمالية لإيطاليا أم الدونيا
نهاره أبيض
Post a Comment