Sunday, December 03, 2006

ديسمبر وبس

بالذات ديسمبر
الحداشر شهر التانيين بتحس انهم شهور وخلاص أو علي الأقل انا بحس كده بس حقيقه مش لوحدي لأني قابلت ناس كتير زي حالاتي بتحس بحاله مختلفه بينها وبين ديسمبر
طيب ليه؟
يمكن عشان ديسمبر هو البدايه الحقيقيه للشتا؟
جايز
أو عشان اتولدت فيه؟
جايز برضه
أو عشان بنحس اننا بنودع سنه وبنستعد لسنه جديده ؟
جايز جدا خصوصا اننا بنعشق حاله الوداع (كله في المواني يا ابا ) وبنميل للشجن بالفطره
بس اللي القلم عايز يكتبه دلوقتي عن ديسمبر مش كتير قوي
عايز يكتب باختصار
عايز يكتب عن تلاتين نوفمبر بالليل وانت بتقلب النتيجه وبتلاقي بعدها واحد ديسمبر
وعن اربعه ديسمبر عيد ميلادك
وعن 13 ديسمبر 96
وعن 16 ديسمبر 2005 عيد ميلاد نور
وعن مشيك لوحدك في الشوارع لحد الفجر في عز البرد والمطره أييييه (حنيت لحياه العزوبيه) علي رأي ريكو




وعن أول طفل مسك حجر من ع الأرض ورماه علي جنود الاحتلال سنه 87
في شهر ديسمبر

21 comments:

مراقب مصري said...

هي عادتك بروح خالتك ولا هتشتريها؟؟؟

بأمارة خالد سعد والجمهور يسأل مين خالد سعد
والفيزا وكوندوليزا والجمهور برضه يتنيل يسأل إيه حكاية الفيزا
وبعدين اسمع اسمع يا رضا والجمهور يخبط راسه في الحيط ويسأل مين زفت رضا

والآن
فزورتك الجديدة هي ما الذي حدث في زفت تلاتاشر ديسمبر ستة وتسعين
طب تصدق إنك فقري؟
حتى اليوم اللي عجبك ومعلم في خلايا ذاكرتك المخية يوم نحس
ومستغرب إنك فقري
روح يا شيخ الله يكرمك

مراقب مصري said...

على ذكر الواد أبو حجر بتاع الانتفاضة
الواد دا عمل لي كالو في البوست الأخير لما اتسحبت من لساني وقارنت بين الانتفاضة بتاعة الواد أبو حجر والانتحاري الملثم
وعينك ما تشوف الا النور
برضه اتسب لي الدين مش عارف ليه
إيه علقة الاحتفاء ببتوع الحجارة بسب الدين المسيحي؟
أعتقد أنها نفس العلاقة الخفية بين الأوتوبيس والكومبيوتر

هههههههههههههههه

مراقب مصري said...

بمناسبة بقى أنه عداد عمرك هيلف لفة جديدة بكرة ما تيجي نفكر في تفكية بلطجية شوف هنتنيل نحتفل باللفة الديسمبرية دي إزاي؟

alnadeem said...

يعني ما فيش فايده في طوله لسانك؟
طيب يا أخي الأول قوللي يا سلا يا عمر ع الكتابه البديعه أو قولللي هي دي الكتابه علي حق ربنا وكده يعني وبعدين ابقي قل أدبك براحتك
ومش هقوللك أيه اللي حصل في 13 ديسمبر
هبقي اعمل ان شاء الله موضوع خاص كده هسميه خالد سعد 13 ديسمبر والفيزا عشان اشرح لحضرتك كل حاجه انت وبقيت الناس

alnadeem said...

بص يا حاج جرجس
انا طبعا متابع معركتك أو معاركك ع النت
وانت عارف كويس ان انا معاك في نفس الأراء التي تتبناها
بس في الحقيقه انت الغلطان
ليه؟
المعارك دي يا عزيزي لا تدار أبدا في العالم الافتراضي
لأنه يكون حوار الطرشان
أي واحد من اللي نازلين فيك شتيمه ع النت دول
ما يستحملش خمس دقايق في مواجهه مباشره يا عزيزي
سلام

ekraammalik said...

نقول كل عام وانت بخير او نأجلها لبكرة؟

شيمـــــاء said...

ديسمبر .. امل فى اللى جاى و محاسبة على اللى فات
شهر كده له رونق مختلف اوى

و على العموم كل سنة وانت طيب

Anonymous said...

يا ديسمبراتك يا معمرة

Anonymous said...

زى منت قلت بالضبط
ديسمير عيد ميلادى ، ديسمبر بدايه الشتاء ديسمبر سنه راحت من عمرى وعمر الدنيا دايماً بفتكر التلج فيه رغم ان مفيش فى بلدنا تلج

ديسمبر يعنى انتفاضه فلسطين فى 87 لما الفدائى فجر نفسه بالطياره وبعدين الحجاره طارت فى وشهم

ديسمبر عيد ميلاد جدتى ووفاه جدى فى نفس اليوم ، ديسمبر شهر الشجن والأمل والعمل عشان نص السنه بتكون قربت وكنا نديها مزاكره زمان

Anonymous said...

كل سنه و انت طيب يا أبو نور .. كان نفسى اشارك معاك فى احتفالاتك الديسمبريه .. بس الحقيقه من بدايات حياتى العمليه .ز ديسمبر كان يقترن عندى بعشرين ساعه شغل متواصل يوميا .. لأن فى آخره بيتم أعداد الميزانيات .. معلش .. مش قادر احب ديسمبر قوى .. لكن طبعا مادام فيه عيد ميلادك ... يبقى هاكرهه أكتر و أكتر و أكتر ..هاهاهاهاهه ..
كل سنه و انت طيب

Anonymous said...

يا أبو النكد اللى انت فيه يا سي عمر(ردح)،خلاص بدور لنا ع النكد بمنكاش، ممكن تفتكر حاجة حلوة حصلت فى ديسمبر؟ مش بس ان انت اتولدت وشرفتنى ف الدنيا، لكن ممكن تقول ان ابنك نور اتولدت، ودى بالنسبة لى كفاية،ديسمبر بالنسبة لى انى كبرت سنة، لان عيد ميلادي ف يناير،فيبدأ العد التنازلى ف ديسمبر،كمان اول حب كان ف ديسمبر، وسيبنا بعض برده ف ديسمبر، وكمان التاني والتالت، وكفاية كدة احسن تفتكرنى انثى فالنتينو، المهم صحيح دايما باخد ع قفايا ف ديسمبر، لكن فى حاجات حلوة تانية ف ديسمبر،زى اول منظر للتلج على جبال الالب كان ف ديسمبر، اول مرة اشوف النجوم ومنى للسما، وتحت راسي التلج كان ف ديسمبر، اول مرة اشوف كريسماس اكيد ف ديسمبر مش شهر تانى،اول مرة اخد كم هدايا كان ف ديسمبر، حتى اول قطعة غيار اياها كانت فى ديسمبر،أمى و ابويا اطلقوا ف ديسمبر، اما الكارثة انهم اتجوزوا تانى فى ديسمبر،و اما ديسمبر الحالى فأول شغل بداته النهارده من ست شهور كان ف ديسمبر،وها مين عارف لسه الشهر طويل، لعل وعسي امى وابويا يقرروا شيء ما، لكن الاكيد ان لا هحب ف ديسمبر، ولا هخلع من حد، بصراحة السحن الموجودة لا تشجع،فأكيد دا هيكون احلى ديسمبر، لانه هيكون اول ديسمبر الون، و محلاها عيشة الفلاح، (اقصد) الحرية، ...اما عنك انت يا عمر، فأعتقد ان كل شجنك دا بخصوص ديسمبر، هو ان عيد ميلادك ف ديسمبر، فا كل ديسمبر، انت بتثبت صحة الحقيقة العلمية اللى بتقول انك بتقرب من سن )اليأس(ها ها ها..سلام بقي احسن امى و ابويا شبطوا ف بعض وعليا ان اقوم بدور الحكم الدولى، وهطرد كل اللعيبة، مش ناقصة دوشة ف البيت دا،أو انهم يحققوا لى امنيتي ويخلصونى ...randa

Anonymous said...

اه نسيت كل سنة وانت طيب،هابي بيرث داى، اللغة التانية اللي اتعلمت بعضها على كبر، تانتى اجورى ا تاtanti augurri a tiاقراها بالطريقة اللى هتعجبك اكيد هتبقي صح،او يلا حلا بالا حيوا عمر قناوى هيكون عيد ميلاده الليلة اجمل الاعياد، فليحيا عمر قناوى، وسمعنى العنب العنب..و وريني دينا بتتنط و بتتخانق.randa

Anonymous said...

اولاً كل سنة وانت طيب يا عمر
وحلو البوست
للأسف أحدث ذكرياتى عن شهر ديسمبر وبالتحديد 30 ديسمبر 2005 انو اليوم اللى انقض فيه الجيش المصرى فرع الامن المركزى على اللاجئين السودانيين الغلابة فى ميدان مصطفى محمود الساعة 3 الفجر وهاتك يا ضرب ويا تقتيل

ديسمبر هو الشهر اللى تبص فيه قدام على السنة الجديدة اللى جاية وتقول بأى حال جئت يا عيد


دايماً بتسائل مين العالم اللى اخترعت الوقت، الساعات، الايام، الشهور، السنين وخصوصاً رأس السنة وذيلها ديسمبر؟؟

يعنى كان نفسى اعمل تدخل متفائل ومبهج كدة بس جريمة 30 ديسمبر 2005 مسيطرة تماماً على كل ذكرياتى عن هذا الشهر الفضيل

ممكن اضيف ان ديسمبر وبالتحديد اخر يوم فيه دائماً فرصة للالتقاء بالاصدقاء اللى لينا زمان ماقبلناهمش.... وكمان بيديلنا فرصة نقعد نأرخ لليوم ده فنقول انا فى الكرسماس اللى فات او فى الكريسماس سنة 2000 وكدة

كل سنة وانتو طيبين

ناهد

مراقب مصري said...

يا عم الحاج عمر يعني الواحد ما يعرفش يهرب منك أبدا؟
أنا باغير الموضوع عشان ما أغلطش في شهور ربنا وقلت أحسن نتكلم في أي حاجة تاني
قوم انت تروح مصر ترجعني لموضوع البوست
ماشي يا عم
برضه زي ما ناهد قالت لك
كان نفسي أقول بقين حلوين في حق الراجل ديسمبر دا
بس هتعمل إيه
ديسمبر دا بالنسبة لي كآبة الشتا
يعني التغطية تحت الألحفة والبطاطين وبرضه ما تبقاش عارف سرسوب السقعة دا داخل لك منين
(طبعا دا أيام ما الشتا كانت شتا مش الشتا بتاع الاحتباس الحراري اللي الصبح تلاقيه حر ولعة وبالليل برد تلج)
ديسمبر يعني امتحانات الزفتة نص السنة كانت خلاص قربت
ولازم الواحد يقعد يحفظ ويصم ويذاكر زي الحمار لما عينيا اتمققت ويا ريت كان بفايدة في الأخر فشلت وبقيت دكتور!!

ديسمبر يعني شهر محاسبى النفس عن ما لم تنجزه خلال السنة المنيلة اللي فاتت
وهو شهر الإحباطات حيث تجد أن أمنياتك تاني لم تتحقق في هذه السنة أيضا أو لم يصبها الدور

وبعدين دا الشهر اللي بتموت فيه سنة بحالها وبتتخنق فيه ذكريات وبنتحر فيه أحلام

بس ولادتك طبعا في هذا الشهر الكريم وولادة نور باشا هما الحدثين اللطاف في الليلة الديسمبرية الغامقة دي
-------------

Anonymous said...

انا بس حبيت اصبح عليكم .. و اقولك كل سنة و انت طيب يا عمر .. اما موضوع ديسمبر .. مش عارفة دايما ديسمبر بيفكرني بالامتحانات اللي عمري ما خرجت في راس السنة بسببها .. دايما كان بيكون عندي امتحان يوم 1/1 فده كانت حاجة بتخنقني ... و لما خلصت دراسة و جيت هنا .. عمري ما حسيت بالسنة الجديدة اصلا :):):) بس مش يمنع ان يوم ميلاد اقرب اصحابي في ديسمبر .. فخلينا نقول انه شهر متعادل نوعا ما ... كل سنة و انت طيب تاني و عقبال 70 سنة يكونوا كلهم كويسين انشاء الله .
سلام

tota said...

عمر
كل سنة وانت طيب
وكل يوم يعدى عليك من بعد اول 4 ديسمبر يرسم بسمة ويمحى الم

هخلى تهنئة نور يوم 13 ديسمبر
تحياتى يا ابو نور

Anonymous said...

جميل يا عمر

محمد مسعد

Anonymous said...

يعنى يا سي اسلام اتفلحست فيها، وافتكرت لحقت سفر شادى حبيبي، و كمان كفاية، ومش عارف ايه الحدث الشخصي اللى حصل ف 13ديسمبر؟ ربما عمر اتولد ف يوم 13 مش يوم 4زى مابيضحك علينا، ولان الرقم 13 نحس،قاللك بلاش اقول، يبقي باسبور نحس، وكمان عيد ميلاد يوم 13، دى تتساوى مع جريمة حب الجوافة،
لكن فى احتمال ان عمر قرر يعمل ثورة13 ديسمبر،ومخبي علينا زى المطار السري، وفى الاخر يطلع كل ظبوط مشترك ف الثورة المجيدة، بتاعة 23ديسمبر،اوبس قصدى13 ديسمبر، والله يا قناوى خير ما اختارت، يوم 13، يلا زى بعضه هى ايامنا كلها ايام نحس جت على دى، على فكرة يوم13 ديسمبر، كان عيد ميلاد الست جارتى اناليزا موزة ف الخمسين بس لسه فيها الرمق شغالة على ودنه مافيا ودعارة، اللهم لا حسد!!randa

مراقب مصري said...

تهديد
====

إلى السيد رئيس الجمهورية السندبادية المتحدة المعروف كنية بأبي نور وفي رواية أخرى بالنديم

نعلن نحن جماعة السحلية البرتقالية عن تهديدنا ليادتكم بالإعدام بالمقشة في ميدان الله يرحمه الأخ سليمان الحلبي؟ (فاكر مات إزاي يا بتاع التاريخ)
وسنمنحك مهلة قدرها فرسخين من الزمان بلياليهم لكي ما تفصح عما حدث في 13 ديسمبر 1996 وإلا سبدأ نفضحك ونسيح لك وهنبدأ حملة على المدونات كلها اسمها ما الذي حدث في 13 ديسمبر؟
وتخيل لما كل مدون يقدح زناد فكره ويتخيل بقى وتتقال فضايح وسيح سيح يا عم الحاج

وساعتها كل حبايبك يا زعيم هيكتبوا بل أتصور أن الزعيمة توتا الممتنعة إختياريا عن الكتابة ستخرج عندئذ عن صمتها وتبعبع هي كمان وتتخيل ونطلق جميعا الخيال لعناننا
قصدي العننان لخيالنا
فرأيي إنك تستجيب للتهديد وتفضح نفسك بنفسك
وتقول إيه اللي حصل يوم 13 ديسمبر 1996

اللهم فاشهد إني قد بلغت

عشتار said...

تدوينة جميلة يا عمر
أكيد المطر والبرد وانتهاء سنة من حياتك وولادة نور
كلها تثير فيك زي ما تثير فينا الكثير
من الشجن ومن الاحاسيس المتناقضة.
بس ابتدأت تأخذ اسلوب جميل في التدوين أسلوب يعبر عن داخل النديم الحسي والحقيقي
كل سنة وانت طيب

Anonymous said...

متأخرة شويتين.. عذري الوحيد هو اني دلوقت بس اكتشفت مدونتك.. كل سنة وانت زي مانت..


.. ابقى خلينا نشوفك :)))

ابنك دمه خفيف على فكرة