Tuesday, January 02, 2007

أهلي أهلي

يا جدعان
النادي اللي اسمه الأهلي ده زودها قوي معايا بصراحه بشكل يستحيل السكوت عليه
هطق خلاص مش قادر
بعيدا عن المنافسه والصراع التقليدي بينه وبين النادي الموكوس اللي بشجعه بس انا فعلا ابتديت احس ان النادي ده اتعمل عشان يكفرني في عيشتي انا بالذات
من 5 سنين الزمالك كسب بطوله أفريقيا وكان المفروض يروح يلعب في بطوله العالم للأنديه وبعد ما اتعملت قرعه البطوله وخلاص راحت اتلغت قبلها بأسبوعين
بختنا كده لما نيجي نلعب في بطوله عالميه تتلغي ولما الأهلي يوصلها ما تتلغيش لأ وأيه يطلع تالت العالم كمان
من 4 سنين كان الأهلي بيلاعب فريق من أنجولا في استاد القاهره في بطوله أفريقيا ولأول مره في التاريخ كان الأهلي مهزوم 4 صفر سمعت النتيجه في الراديو وما صدقتش جريت ابص ع النتيجه في أقرب قهوه ومسافه ما وقفت ثواني راح الأهلي جايب جونين ورا بعض رحت واخد بعضي وماشي أحسن يتعادلوا ولا حاجه
ومن 3 سنين ريالمدريد جه مصر يلاعب الأهلي ماتش ودي ورحت شادد الرحال علي الاستاد عشان اشوف الأهلي وهو بيتقطع ما اهو مش معقول هيكسب ريال مدريد
بس عملوها ولاد الكلب وكسبوا
ومن شهرين كانوا بيلعبوا نهائي بطوله أفريقيا في تونس والحمد لله ما شفتش من الماتش غير دقيقه واحده
اللي ابو تريكه جاب فيها الجون الأسطوري طبعا
الأسبوع اللي فات كانوا بيلاعبوا إنبي في الدوري وحيث ان انا فكيك بقي واتعلمت ما اتفرجش عليهم ولا اسأل ولا أهتم نفضت خالص وبعدين عديت ع المكتبه وكان الماتش شغال في الراديو فسألت رزق اللي شغال معايا والذي يشجع الأهلي بجنون
النتيجه كام يا رزق؟
واحد واحد ومش فاضل غير خمس دقايق
قلتله طيب ما تقلقش هتجيبوا فيهم جون
المهم في أخر دقيقه بالفعل راح الأهلي جايب جون لكن نفاجأ ان الحكم حسبوا تسلل رحت قافل الراديو وجريت ع القهوه عشان ابص علي إعاده الهدف الملغي ومسافه ما وصلت راح الأهلي جايب جون

المهم كله كوم واللي حاصل من 4 ايام كوم تاني خالصصصصصصصصصصصص
إنتوا عارفين طبعا ان الأهلي لما رجع من اليابان اتعملتلوا زفه شعبيه كبيره وكان اللعيبه راكبين في أوتوبيس أحمر جميل مكشوف من غير سقف اتعملهم مخصوص

الاتوبيس ده ساب مصر كلها وراكن تحت البيت عندي

27 comments:

Ahmed Shokeir said...

ههههههه .. لأ بصراحة كده زودووها معاك اوي

Anonymous said...

أزيك يا باشا هما الأهلوية كده فاكرين نفسهم ولا ريال مدريد وهما ماينفعوش فريق كورة شراب وبعدين غير كده يكفى قلة أدبهم يعنى شايف بعض عنواين فى صحفهم يقولون : ـ الأهلى ذبح الزمالك يعنى هما بروح أمهم عاملين كان الزمالك ذبيحة العيد يبقى هما كده بيشبهوا الاهلى بالجزار ، عاش الزمالك رغم أنف الجميع وطزززززززززززززززززززززززززززززززززززززززززززززززززززززززززززززززز فى الأهلى

Anonymous said...

هههههههههههههههههههههههه مقدرتش امسك نفسي، فى الشغل كل الناس واقفة حواليا وانا ببص ع البوست، هههههههههههه يا بنى العيب مش فى اهلى ولا زمالك، العيب ع المشجع المنحوس اللى هو انت.افهمها بقي

ايوه يا سي اسلام الاهلي عمهم، صحيح انا بطلت اشجع اهلي من زمان، وتلاقيني ماشيا فى ديل رويال مدريد علشان خاطر عيون رونالدينو، او الاهلي بتاع ايطاليا اللى هو يوفنتوس، علشان مليان احلي مزززز ، لكن بما انك طلعت زمالكاوى فا انا هغيظك واقولك اللى مللاقاش ف الورد عيب قالوا يا احمر الخدين، مش ذنب الاهلي ان الزماك خيبة ولخمة وكمان نادى نحس وموكوس، وانا موافقة على تشبيه الذبيحة والجزار، لاني بصراحة بطلت احب اخد علي قفايا، ويا بخت من بات ظالم ولا بتش مظلوم، ويا بخت من بقي جزار ولا بقاش خروف، لان الكلام بتاع يا بخت من بقي مظلوم، والجنة للفقراء، هى سبب وكسة هذا الشعب حتى ف الكرة، سلام بقي اروح اكمل شغل
randa

Anonymous said...

ايوا يا اسلام سورى انت ممكن تيجي تتشعبط وتنط من ع السور انت وعمر قناوى على المدونة دى
zenzana.blogspot
دى هدية من ابونا جرجس وحفصوتشا، بس ايه زنزانة هواها يرد الروح، وتشطيب لوكس ع المفتاح
randa

Anonymous said...

عيد سعيد عليكم
أنا أحب الأهلي وافرحلهم جدا
ووالله العظيم كنت حاسة بيك وهمه يغلبوا الزمالك

يله ياعم سعيد مع نور تعيس مع الزمالك عادي تحصل في احسن العوائل

اكرام

Anonymous said...

أيوه أنا دخلت مدونتك يا راندا بس مش عارف أكتب فيها آى تعليق ، يا ريت تشرح لنا أزاى نكتب تعليق فيها ، وكمان انا كنت عايز أسألك أنت ليكى مدونات غير دى ولا لأ
وانا النهاردهع حانزل وسط البلد وأتمنى أن أشوف كل الناس ، وأنت طبعاً

Anonymous said...

عمر

شوف خبرة السنين

بعد اعتناقى للزمالك لفترة قربت من العشرون عاما اٌصبت خلالها بكل امراض الاكتئاب والضغط النفسى قررت الكفر
وصبئت عن كونى زملكاوية وصبئت عن اعتناق اى فريق اخر حرصا على سلامة صحتى وقواى العقلية والباقى من عقلى مش كتير علشان افرط فيه

اما حالتك انت مش عارفة اقولك ايه بس حاول ما تطولش معاهم كتير علشان فى عناد غير طبيعى معاهم اقلب اهلاوى شوية يمكن الزمالك يكسب

وانزل من البيت وعلق ورقة على الاتوبيس الاحمر بسهم يشير الى الاعلى وتحتها هنا يقطن مواطن زملكاوى حزين خلو عندكم دم

ليك وحشة يا نديم

alnadeem said...

العزيز أحمد شقير
هما زودوها بعقل يازعيم
لسه لسه الحكايات عندي كتير
بس اما ابقي في مزاج رايق هبقي احكيلك كل حاجه
تحياتي
---------------------------
إسلام صديقي الجميل
انا كنت عارف طبعا ان حضرتك زملكاوي
ما اهو واحد عبقري إلي درجه الجنون زيك ما ينفعش يبقي حاجه تاني
هذا طبعا مع وجود احتمال ان يكون الزمالك هو السبيب في العبقريه التي وصلت إليها
سلام يا معلم
-------------------------
راندا المشاكسه
ما زلت حتي اللحظه ماسك لساني معاكي ومش عايز اتكلم احتراما لكونك من الجنس اللطيف
وانتي عارفه حساسيتي تجاه الجنس اللطيف طبعا
لكن يا بنت الناس إذا ما سيبتيش الواد الطيب الغلبان إسلام في حاله هيكون لي معاكي موقف مختلف
قدك ده عشان عشان تعملي فيه كده
الحق عموما مش عليكي الحق ع الللي وداكي بلد عصابات المافيا اللي واضح انهم سابوا فيكي تأثير كبير ومشعارفين نلمك من ساعتها
بس ما شي
أما اشوفك
-----------------------
إكرام العزيزه
تصدقي ان انتي اول عراقي اقبله بيشجع الأهلي
كل العراقيين اللي قابلتهم كانوا يشجعون الزمالك خالص تحياتي ووحشاني جدا والله
--------------------------------
صديقتي الصدوق توتا
وحشتيني جداجدا حمد الله ع السلامه
هقولك ايه بس
دايما بتفاجئيني بخبراتك اللي بتعلم منها بجد
بس في الموضوع ده تحديدا بفشل دايما
كل ما اقول هبطل تشجيع ولاد الموكوس دول
ما بقدرش
حمد الله ع السلامه ويا ريت اشوفك قريب
----------------------
إبيتاف
الأهلي فوق الجميع؟

لأ سوري الكلام ده تروحي تقوليه في مدونتك مش هنا
فوق أنهي جميع يا حراميه يا بتوع المكاسب اللي بالحظوالحكام
بذمتك الأهلي بتاعكوا ده ليه لازمه من غير الكام لعيب اللي اشترتوهم من الاسماعيلي يا لصوص
عموما الأيام دول بين الناس
ويمهل ولا يهمل

Anonymous said...

haaaa, this is Henry from Australia,

Omar ,sorry to write in English but i can not find keyboard in Arabic. by the way i have one short comment IN Arabic

ELY YKAFF MEN EL'afret Yetla'loo!

see you

Anonymous said...

اسفة لتدخلي لكن احب اساعد

الاخ هنري من استراليا و يا اي مدون معندوش كيبورد عربي

اذا حطيتوا في محرك بحث جوجل

arabic keyboard

حطتلع مواقع كتيرة
اختار اول واحد و ساعات التاني
حتلاقي ظهرت شاشة عليها لوحة مفاتيح
اكتب
كوبي
باست
اطبع في التعليق اللي عاوزه

انبسط
و عيش حياتك

تحياتي

yasser_auf said...

العزيز الغالي
لا تحزن بس نصيبك كدة نعملك اية ... عموما انا بعتبر الزمالك نادي اتعمل علشان يتفنن في حرقة دم الي بيحبوةو حرق دم جمهورة . ...مع انة و من مدة طويلة لم يلعب ماتش كما لعب ماتشة الاخير مع الاهلي بس نعملك اية بقي ...ارادة ربنا بجد الماتش الاخير مع الاهلي و من مدة الزمالك كان بيلعب كورة موش بيلم كور ... عموما ليك مني هدية اسطوانة اكسجين طبي .... تسلم الي ايهاب ابو سمرة لتوصيلها لكم
مع تحياتي

Anonymous said...

طبعا يا سيدى بما انى كنت فى الاساس اهلوية، وصعيدية، وعشت فى بلاد المافيا وكمان مفترية، والجدع فيكوا
يوريني عضلاته، ساعتها هشغل التوربيد المستورد واقول اجري الحق حراميييييي، واهرب
طبعا انا مقدرش افتح بقي مع سي عمررررررر، اصلي بحب اقول اسمك !!ههههههههههه
بالنسبة لاسلام انا عايزة عوده يشتد ويبقي واد عضمة ناشفة محدش يجرؤ يقوله بم، فهمتتتتتتتتتت يا سي الزعيم
لما يكون عندك ابن، بتعزه، لا لا لا متفهموش غلط دا انا اصغر من اسلام بتلات اربع سنين ..يعنى لما يكون عندك اخ كتكوت زى اسلام لازم تقسي عليه عشان يطلع واد كدة زى ما بيقولوا ايه؟
مش عارفة اجبها لكن اكيد انت فهمتنى.

شكرا جدا جدا يا توتة انتى وحفصوتشتى ع التليفونات.
النهاردة كان يوم سعدى وحظى الجميل جدا جداااااا عارفين ليه؟
جالى تليفون من احلى موزتين توتة و كمان حفصوتشا تخيلوا؟
انا لازم احتفل بالنهاردة ويبقي دا
عيد ميلادى التالت بما ان لى عيدين ميلادين، (شايفين التميز والسبق بما انى طبعا اهلاوية)
هههههههههههههههه
randa

Anonymous said...

مساء الخناق ووجع الدماغ بتاعك يا ست راندا ، بص يا عمر فى الأول والآخر انت السبب ، ما أنت لو عامل كنترول على التعليقات عندك مش آى حد حيقدر يعلق عندك ، لكن كده اللى يسوا واللى مايسواش بيعلق عندك ، لو أنت مش عارف تعمل كنترول أنا حاقول لك أزاى وبعدها تختار لتنشر تعلقي أنا أم تعليق الست راندا ، وبعدين ماشي يا عم المعلمة ، أبقى اجيللك فى الغرزة بتاعتك واجيب العدة المطاوى والسنج يعنى والحشيش ، عشان تدينى دروس فى نشفان العضم بتاعك ده ، وبعدين يعنى آيه حد يفهمك غلط ، مش علينا ، أنتى آخر مرة قلتى قدامنا كلنا أن عمرك 29 سنة وطبعاً ده أكيد بعد التخفيض 10 أو 15 سنة ، يعنى مع السلامة يا طنط رندا

yasser_auf said...

اكتب اليك بعد نتيجة ماتش اليوم الزمالك مع غزل المحلة ... يبدوا اني موش حبعتلك الاسطوانة مع فارس اخير ولاكن سوف احضرها بنفسي من الاسكندرية للسرعة القصوي بسبب حرقة و ارتفاع ضغط الدم
هاردلك ... و ما تزعلش هما بتوع ميت عقبة كدة تفننوا في حرقة دم جماهيرهم بقولك انت يا تقلب علي الارجنتين يا ريال مدريد

Anonymous said...

ههههههههههههههههههههههه


ROMIL

Anonymous said...

هلكتني من الضحك الله يخرب بيتك

يا بني كل دي إشارات ومش عاوز تستجيب برضو ، يا بني مش عشانك عشان الطفل البريء ده لازم يكبر في بيئة أهلاوية صحية

وبعدين الصورتين حلوين قوي على فكرة

عماد رفعت said...

والله انت زي العسل
بس مش شايف ان الاهلي ليه رموز وتحس كده ان ليه كيان فعلي يعني مش اسامي لاعيبه وبس انما تحس ان فيه اداره ومش اداره وبس لا تحس ان فيه اسماء تهز الجبل
ولا رايك ايه

so7ab said...

انا عارف والله الاهلي كده طلع ايمانتنا خالص

وبعيد عن التنظيره الشهيره بتاعه الزمالكويه زى حالاتى ان الزمالك نادى الشعب وان الاهلى نادى السلطه على مدار التاريخ

لكن كمان مستحيل ناس يبقو بيشجعو فرقه بتكسب على طول وياريتها بتلعب بشكل ممتع لا تلعب وحش وبرضه تكسب ايه المتعه فى انى اشوف حاجات متوقعه

ولايهمك يا بطل وبعدين كنت تقولينا من بدرى علشان نفسيلهم الكوتشات ولا حاجه

ekraammalik said...

اول مرة اعرف ان الاهلي نادي السلطة وان الزمالك نادي الشعب.... هو صحيح هذا الموضوع؟؟؟؟

Anonymous said...

شكرا يا سي عمر بنتهزء عندك، واسلام صنفنى على انى مسواش، شكرا لكن اذا نطق السفيه خير من ان تجبه السكوت، لكن السكوت مش قصر ديل ولكن باحترام لنفسي.

Anonymous said...

طب وانت ايه اللى حرقك بجاز يا سي اسلام عندى، اربعين ولا تلاتين، انت ناوى تطلب ايدى؟ ولا ايه الحكاية؟ع العموم انا متكلمين، عليا، فاهضطر اقولك روح العب بعيد، يا نونو.

كمان فى حد حكيم وفيلسوف قال ان عمرك الحقيقي بيتحسب بانجازاتك، وليس بأيام عمرك اللى فى شهادتك ميلادك.

بلاش اقولك بقي مين الحكيم الفيلسوف، احسن تنتحر من فوق اعلي حصيرة فى بيتكم، او تشرب لا مؤاخذة شوية نيدو، نيها هاههههه

Anonymous said...

والله انا مش عارف يا راندا أنت ليه أعتبرت نفسك من اللى مايسواش وما أعتبرتهاش من اللى يسوا والله كده العيب مش منى ، أنت اللى فاكر نفسك من اللى مايسواش أنا مقولتش حاجة عليكى ، وبعدين أنا مش فاهم حاجة من اللى كتبته بعد كده كلامك مش مجمع ليه كده هو آيه اللى سفيه أحسن من اللى مايتكلمش وسكوت ، وكلام كده غريب ، هى دى حالتك لما تكونى زعلانة ، معلش أصلى ماكنتش عارف حاخلى بالى بعد كده اما المتكلمين عليكى اللى بتقولى عليهم دول ربنا معاهم ، أما بالنسبة لكون العمر مايتحسبش بالسنين اكيد طبعاً والشخص بيكون بثقافته وفكره وقرأته وأنا الحمد الله واثق قوى من نفسي ، وفى النهاية أنتى بقى اللي بتجيبه لنفسك أنا ماتكلمتش ولا قلت حاجة ، كل الحكاية أن عمر قال لك سيبى الواد إسلام فى حاله رحت دخلتى فى شمال ،/ وأنت كل مرة بهذة الطريقة أنت اللى بتبدأ وبعدين ترجعى تعيضى معلش حابقى أوصى عمر يحط فى المدونة بتاعته كلينكس

alnadeem said...

برضه مافيش فايده فيكم
اغيب يومين ارجع الاقي الناس شبطت في بعض؟
عيب يا راندا اللي بتعملوه انتي والافندي إسلام ولو ما بطلتوش هطوح فيكوا ضرب ماشي

--------------------------------
الأستاذ هنري الخنيق
نورت المدونه يا زعيمي
هربت انت يا فالح وسايبنبي لوحدي مع ولاد الموكوسه دول
ماشي ياعم
فاكر يا واد هنري لما كنا بنروح الماتشات مع بعض
ياااااااااااااه
ده انا انتبهت دلوقتي ان أول ماتش رحناه سوا كان من 12 سنه فاكره؟
كان الزمالك والترجي في بطوله أفريقيا يوم 4 ديسمبر 1994
وخلص صفر صفر
أيام
علي فكره انا بطلت اروح الاستاد من يوم ماانت سافرت تخيل
واحشني بجد طبعا
ومين عارف قد يجمع الله الشتيتين
سلام
------------------------------
الغالي صاحب الغالي الأستاذ ياسر عوف
يعني ده يوم عيد لمدونه النديم والله انك تشرفها
تعرف ان كلامك مظبوط الزمالك ده اتعمل عشان يحرق دم جمهوره
والمصيبه ان جمهوره المسكين مش قادر يبطل
يا ريت تقوللي نصيحه يا معلم مين عارف يا دكتور يمكن يكون الشفا علي أيديك
تحياتي
---------------------
الأخ روميل
نورتنا
إضحك يا اخويا اضحك هو انت خاسس عليك حاجه
تحياتي
واوعي تطلع منهم وإلا
-----------------------
صديق العمر محمد خير
شفت العبث
المشكله يا محمد وانت بالذات سيد العارفين عارف كويس جدا ان الحاجات العبثيه دي أصبحت ملازمه لي باستمرار وما بقيتش فاهم فعلا ليه ده بيحصل معايا
أما بخصوص الإشارات عشان اطلعه أإهلاوي
فاحب اقولك ان ده في المشمش
وانت عارف مبدأي
انا ممكن انضم للحزب الوطني ولا ادخلش ابني النادي الأهلي
سلام يا زعيم
-----------------------
الأستاذ صاحب الإسم المميز جدا وله نهايه
انت اللي زي العسل ياباشا
وانا معاك ان الأهلي فيه ميزه مهمه وهي البناء المؤسسي الحقيقي والجاد
خالص مودتي ويا ريت نشوفك كتير
------------------------
العزيز صحاب
ولابيزنيس
أولا مرحبا بك
ثانيا مش عارف اقوللك ايه بختنا كده
ام بخصوص الكاوتش اللي عايز تنيمه فانا بقوللك يا سيدي اتفضل تعالي لأن الاوتوبيس مرابط تحت البيت من ساعتها ومش راضي يمشي
سلام يا جميل
------------------------------
العزيزه إكرام
نعم الأهلي هو نادي السلطه في مصر
بس بصراحه يعني هو الناديين بيتقاسموا الشعبيه وإن كطان جمهور الزمالك نخبوي أكتر مثلما يردد الكثيرين
سلامي علي اللي حاضر معانا
---------------------------------

مراقب مصري said...

يا عمر بلاش تزييف للتاريخ دا انت بتاع تاريخ
بقى الزمالك نادي الشعب؟؟؟
دا تصريح خانته الدقة وافتقر إلى المصداقية وتعطش حتى يبس لسانه إلى الشفافية (ام أستك من فوق).. دا ارتداد عن مبادئ اليسار القومي ونكوص عن التوجهات الماركسية التي تنتصر للبروليتاريا الكادحة التي يمثلها النادي "الأحمر"... نصيحتي اترك هذه الأكاذيب البرجوازية "البيضاء" ولتتوقف عن هذه الفصامية الإيديولوجية ولتمتنع من الآن عن خيانة مبادئك الماركسية اللينينية الحمراء لحساب البيت "الأبيض" والقلعة المتهدمة التي تمثل البرجوازية المتعفنة وكفاية زمالك كفاية مرتضى وكفاية جزم

ارجع إلى أصلك الأحمر وإلى مبادئك "الحمراء"... هي مش برضه مبادئك حمرا؟؟

نياهاهاهاااا

Anonymous said...

وليه يا عني لازم مبادؤه تبقي حمرا؟ ماهى ممكن تكون خضرا أو حتى بمبي، (مش بمبي سعاد حسنى) لكن بمبي يعنى نادى الترسانة ايام ما كان بياخد الدورى من الزمالك ف الكرة الشراب ههههههههه

ذو النون المصري said...

ياعم دا انت باين عليك منحوس خالص
احيانا بتيجي كده مع ناس كتير النحس بيحط عليهم كانه كان في سفر بعيد علي جمل و حط رحاله عليهم

Anonymous said...

قليل البخت يعضه الكلب فى الطياره

نياهاهاهاهاهاهاهاه