إتمخطري يا عروسه

أكيد معظمنا عارف اللحن بتاع سيد درويش اتمخطري يا عروسه واتهني بعريسك سيد العرسان
اللحن ده من الألحان الغريبه جدا
مفترض انه لحن فرح لكنه لحن شديد الشجن والحزن ورغم ان كلمات الأغنيه يفترض أنها كلمات مبهجه إلا انك لا تشعر أن اللحن متناقض معها
عموما سيد درويش كان معجزه موسيقيه لا شك فيها وكل شيئ متوقع منه

إمبارح وانا راكب المترو شفت بنت شكلها في أوائل العشرينات تقريبا شكلها كان غريب جدا حاطه كم من البودره ومساحيق التجميل بشكل مبالغ فيه لبسها شديد الغرابه أيضا ومعبر بوضوح عن عن افتقادها لأي معايير جماليه ومستوي مادي واجتماعي شديد الفقر وتأكدت وجهه نظري حينما بدأت في الكلام في التليفون
المهم شكلها الغريب ده كان مثار تعليقات وسخريه الكثيرين من الركاب ووصل الأمر إلي الاشتباك اللفظي بينها وبين إحدي الفتيات التي كانت تسخر بوضوح وصوت مسموع
لا أخفيكم سرا إنني تعاطفت بشده مع الفتاه وهو عموما موقف متوقع من أي أحد لكن انا الحاجات دي بتاخد معايا مساحه زياده عن اللزوم شويه لدرجه اني فضلت طول اليوم افكر فيها
كلنا عندنا تعاطف مع المظلوم طبعا ده شيئ مفروغ منه بس أكتر حاجه بتعاطف معاها انا شخصيا لما بشوف طفل نفسه في حاجه ومش طايلها أو لما اشوف بنت عندها مشكله مع جمالها خصوصا لما يكون نقص الجمال ده مرتبط بفقر وتدني مستوي اجتماعي

من حوالي 10 سنين كنت رايح الكليه المهم وانا في السكه حبيت اشرب عصير قصب أنا فيا داء غريب شويه إني بكلم نفسي وانا ماشي احيانا المهم وانا داخل المحل افتكرت حاجه ضحكتني فضحكت وتصادف إن كان فيه في المحل برضه بنتين شكلهم في الجامعه برضه وواحده فيهم كانت حاطه شويه مكياج زياده حبتين شكلها طيب جدا وفوجئت انها اتكسفت قوي لما لقيتني بضحك افتكرت اني بضحك علي شكلها لدرجه ان صاحبتها بصت لي وقالت بصوت واطي بتضحك علي ايه
إنتبهت لحظتها إني أحرجت البنت وما عرفتش اكلمهم واقول لهم اني والله كنت بكلم نفسي وشربت العصير ومشيت بس أبدا ما نسيتش هذا الموقف رغم انه فات عليه عشر سنين
حسيت اني من غير ما اقصد كسرت قلب بني أدمه كان نفسها تحس بجمالها ونفسها حد يقول لها (يا عليا شو حلوين ) أنا فاكر كويس علي فكره عينيها الواسعه مش قادر انساها نهائي مش عارف ليه
أنا مش عارف اكمل كتابه يمكن لأن ما فيش موضوع أصلا بس بصراحه أنا من امبارح في حاله نفسيه غريبه مشحونه بالشجن
شجن جميل صحيح بس تاعبني لأنه بيفكرني بحاجات مش عايز افتكرها
بيفكرني بكل المظلومين اللي الواحد قابلهم في حياته
إمبارح بالليل حلمت اني قابلت واحد من المظلومين دول أهمهم بالنسبه لي طبعا ويمكن هو أكتر واحد اتظلم في الدنيا دي قابلته في حياتي
حلمت اني عنده في البيت لم يعد هو الشخص الذي كنت أعرفه أصبح شخص بائس يحيا حياه بائسه وأصبح لديه أسره بائسه أيضا حلمت انه بيتخانق معايا وبيزعق مسكني من رقبتي قعد يقول انتوا مش مقدريني ليه ويكررها كتيروانا بقوله المشكله ان انا مقدرك جدا وبقولهالوا وانا بعيط
صحيت من النوم مفزوع وفي حاله لا توصف من الحزن مازالت مصاحباني لغايه اللحظه اللي بكتب لكم فيها دلوقتي
وبس