حدوتة عادية جدا

مرة زمان ، كان في ولدوبنت بيحبوا بعض ، بس ما كانش ينفع للأسف ، الولد كان صريح جدا معاها وقالها انه بيحبها ، وهي رغم انها كانت بتحبه ، قالتله ما ينفعش ، فضلو عارفين بعض وكل ما يحاول معاها تقوله ما ينفعش ، بعدوا عن بعض وكل واحد راح لحاله ،لكنه فضل يحبها مع نفسه ،قفل باب الموضوع خالص لكنه برضوا بيحبها ، بعدوا عن بعض تماما وكل ما يحاول ينسي يلاقي انه لسه بيحبها ، المشكلة ان هي كمان كانت كده ، فضلت تحبه من بعيد بعيد ، لكنها ما تقدرش تقوله بحبك لأنه ما ينفعش ، مرت سنة واتنين وتلاتة وخمسة ،أصبح لكل منهم بيته وعالمه ودولته وبرضوا بيحبوا بعض بس ما ينفعش ، تمر الايام والسن يبتدي يسيب علاماته ويفضل الوضع زي ما هو بيحبوا بعض وما ينفعش ، في الوقت الضايع يكتشفوا ان حل القصة للأسف كان سهل جدا وللأسف كان ينفع